Hô-se-a 第 10 章 - 巴克禮全羅

1

Í-sek-lia̍t sī bō͘-sēng ê phû-tô-chhiū, i kiat i ê ké-chí; i ê ké-chí kiat ná-chōe, chiū khí chè-tôaⁿ ná-chōe; thó͘-tōe ná-pûi, chiū chō thiāu-siōng ná-súi.

2

In chûn nn̄g-iūⁿ ê sim, taⁿ beh siū tēng-chōe; Iâ-hô-hoa beh thiah in ê chè-tôaⁿ, húi in ê thiāu-siōng.

3

In-ūi in taⁿ beh kóng, Góan bô ông, in-ūi góan bô kèng-ùi Iâ-hô-hoa; ông ōe thòe góan chòe sím-mı̍h?

4

In kóng pe̍h-chha̍t-ōe, lām-sám chiù-chōa lı̍p-iok; só͘-í sím-phòaⁿ hoat-khí, chhin-chhiūⁿ hn̂g-kau ê in-tîn.

5

Sat-má-lī-a khiā-khí ê peh-sìⁿ beh in-ūi Pek-a-bûn ê gû-á kiaⁿ-hiâⁿ; in-ūi i hiah ê peh-sìⁿ beh ūi-tio̍h i iu-būn; i ê chè-si ūi-tio̍h i ê êng-kng bô--khì, iā beh ngia̍uh-ngia̍uh-chhoah.

6

I beh hō͘ lâng tòa-kàu A-su̍t, chòe lé-mı̍h lâi sàng hō͘ Iâ-lûi-pò͘ ông; Í-hoat-liân beh siū lêng-jio̍k, Í-sek-lia̍t beh ūi-tio̍h ka-kī ê kè-bô͘ lâi kiàn-siàu.

7

Lūn-kàu Sat-má-lī-a, i ê ông bia̍t-bô, chhin-chhiūⁿ chúi-bīn ê phe̍h chı̍t-iūⁿ.

8

A-bûn ê soaⁿ-thâu, Í-sek-lia̍t ê chōe, beh tú-tio̍h húi-bia̍t; chhì-phè kap chı̍t-lê beh hoat tī in hiah ê tôaⁿ-téng; in beh tùi tōa-soaⁿ kóng, Khàm góan, tùi sió-soaⁿ kóng, Teh góan.

9

Í-sek-lia̍t ah, lí tùi Ki-pí-a ê jı̍t í-lâi, chiū hōan-chōe; in tī-hia khiā; bián-tit tī Ki-pí-a kong-kek put-gī ê lâng ê kau-chiàn kàu tī in.

10

Góa ū chú(**chù)-ì ê sî, chiū beh chek-ho̍at i; in hō͘ nn̄g-hāng chōe pé-pa̍k ê sî, lia̍t-pang beh chū-chı̍p lâi kong-kek in.

11

Í-hoat-liân sī khòai-chiūⁿ-kà bú ê gû-á, ài ta̍h gō͘-kak--ê; Góa ēng taⁿ kòa tī i pûi-súi ê ām-kún; Góa beh hō͘ Í-hoat-liân thoa-chhia; Iû-tāi beh lôe-chhân; Ngá-kok beh pē-sang chhân-thô͘.

12

Lín tio̍h ūi ka-kī ēng kong-gī iā-chéng, chiàu jîn-chû lâi siu-koah; khai-khún pha-hng ê tōe; in-ūi che sī chhē-kiû Iâ-hô-hoa ê sî, thèng-hāu I lâi, ēng kong-gī chhin-chhiūⁿ hō͘ kàng-lo̍h tī lín.

13

Lín bat chèng-choh kan-ok, siu-sêng chōe-kòa; chia̍h pe̍h-chha̍t ê ké-chí; in-ūi óa-khò ka-kī ê só͘-kiâⁿ, iā óa-khò lí chōe-chōe ê ióng-sū.

14

Só͘-í tī lí ê peh-sìⁿ-tiong beh heng-khí jiáu-lōan, lí lóng-chóng ê ōe-só͘ beh siū thiah-húi, sī chhin-chhiūⁿ Sa-le̍k-bān tī kau-chiàn ê jı̍t thiah-húi Pek-a-pí-le̍k; hit-sî chòe lāu-bú-ê kap in ê kiáⁿ, chòe chı̍t-ē siū siak-sí.

15

Pek-te̍k-lī iā beh án-ni khóan-thāi lín, in-ūi lín ê tōa-pháiⁿ; kàu thiⁿ-kng, Í-sek-lia̍t ông koat-tòan beh bia̍t-bô.