Hô-se-a 第 9 章 - 巴克禮全羅

1

Í-sek-lia̍t ah, bo̍h-tit hoaⁿ-hí, bo̍h-tit khòai-lo̍k chhin-chhiūⁿ gōa-pang lâng; in-ūi lí kiâⁿ siâ-îm lī-khui lí ê Siōng-tè; tī ta̍k ê gō͘-kak-tiûⁿ ài lâng sàng-mı̍h.

2

Gō͘-kak-tiûⁿ kap chiú-khut bô beh iúⁿ-chhī in; ǹg-bāng sin-chiú iā khang-khang.

3

In bô thang khiā-khí Iâ-hô-hoa ê tōe; chóng-sī Í-hoat-liân beh tò-khì Ai-kı̍p, beh tī A-su̍t chia̍h bô chheng-khì ê chia̍h-mı̍h.

4

In bô thang ǹg Iâ-hô-hoa tiān-chiú; in ê chè-mı̍h iā bô tit-tio̍h I hoaⁿ-hí; beh chhin-chhiūⁿ tú-tio̍h sí-sit ê ke ê chia̍h-mı̍h, kìⁿ-nā chia̍h--ê tek-khak bak-tio̍h lâ-sâm; in-ūi in ê chia̍h-mı̍h thang chòe ka-kī ê lō͘-ēng, bōe thang jı̍p Iâ-hô-hoa ê tiān.

5

Tī tōa-hōe ê jı̍t, kap Iâ-hô-hoa ê choeh-kî, lín beh cháiⁿ-iūⁿ chòe ah?

6

Khòaⁿ ah, in siám-pī chai-hāi khì; Ai-kı̍p lâng beh chū-chı̍p in, Mô͘-hut lâng beh bâi-chòng in; in ēng gûn só͘ chòe thang ì-ài ê, beh hoat chı̍t-lê; in ê tiùⁿ-pâng-lāi, beh hoat chhì-phè.

7

Hêng-ho̍at ê jı̍t í-keng kàu, pò-èng ê jı̍t í-keng kàu; Í-sek-lia̍t beh chai; sian-ti gû-gōng, siū sîn kám-tōng--ê tian-kông, in-ūi lí ê chōe-kòa chin-chōe, òan-hūn iā chin-tōa.

8

Í-hoat-liân kap lán ê Siōng-tè chòe siú-bāng--ê; lūn-kàu sian-ti, tī i lóng-chóng ê lō͘ chòe lia̍h-chiáu ê lô-bāng, tī i ê Siōng-tè ê chhù-lāi khǹg òan-hūn.

9

In chhim-chhim ka-kī pāi-hōai, chhin-chhiūⁿ tī Ki-pí-a ê jı̍t; I beh kì-tit in ê chōe-kòa, pān in ê chōe-ok.

10

Góa chhē-tio̍h Í-sek-lia̍t, chhin-chhiūⁿ phû-tô tī khòng-iá; Góa khòaⁿ-kìⁿ lín ê lia̍t-chó͘, chhin-chhiūⁿ bû-hoa-kó thâu-kùi khí-thâu-se̍k ê ké-chí; chóng-sī in chiū-kūn Pa-le̍k-pí-jíⁿ, choan-sim kèng-pài hit ê thang kiàn-siàu-ê, chiū chiâⁿ-chòe khó-ò͘ⁿ--ê, kap in só͘ lôan-ài--ê chı̍t-iūⁿ.

11

Lūn-kàu Í-hoat-liân, in ê êng-kng beh chhin-chhiūⁿ chiáu pe--khì; beh bô siⁿ-kiáⁿ, bô tòa-sin, bô hôai-īn.

12

Chiū nā chhī-kiáⁿ kàu tōa-hàn, Góa iā beh hō͘ i sí-kiáⁿ, kàu bô lâu chı̍t-ê; Góa lī-khui in, in chiū ū chai-ē.

13

Góa khòaⁿ Í-hoat-liân chhin-chhiūⁿ Chhui-lô, chai tī pûi ê tōe; chóng-sī Í-hoat-liân beh chhōa i ê kiáⁿ-jî chhut--lâi kau hō͘ thâi-sí lâng--ê.

14

Iâ-hô-hoa ah, Lí tio̍h hō͘ in; beh hō͘ in sím-mı̍h? hō͘ in ka-la̍uh-sin ê thai, lin ta--khì.

15

In it-chhè ê pháiⁿ-tāi lóng tī Kiat-kah, Góa tī-hia òan-hūn in; in-ūi in só͘ kiâⁿ ê pháiⁿ, Góa beh tùi Góa ê ke kóaⁿ in chhut-khì, bô koh thiàⁿ-sioh in; in ê siú-léng lóng sī pōe-ge̍k--ê.

16

Í-hoat-liân siū phah, in ê kun-thâu ko͘-tâ, bōe-ōe kiat ké-chí; in chiū nā siⁿ-kiáⁿ, Góa beh thâi-sí in só͘-siⁿ só͘-thiàⁿ--ê.

17

Góa ê Siōng-tè tek-khak khì-cho̍at in, in-ūi in m̄ thiaⁿ-thàn I; in iā tek-khak phiau-liû tī lia̍t-kok-tiong.