Hô-se-a 第 8 章 - 巴克禮全羅

1

Lí ê chhùi tio̍h pûn sàu-kak; tùi-te̍k chhin-chhiūⁿ eng kong-kek Iâ-hô-hoa ê chhù; in-ūi chit ê peh-sìⁿ pōe Góa ê iok, hōan-tio̍h Góa ê lu̍t-hoat.

2

In beh âu-kiò Góa kóng, Góan ê Siōng-tè ah, góan Í-sek-lia̍t bat Lí.

3

Í-sek-lia̍t pàng-sak siān-liông; tùi-te̍k beh tui-jip i.

4

In siat-lı̍p kun-ông, m̄-sī tùi Góa siat-lı̍p i; in siat-lı̍p siú-léng, Góa iā m̄-chai. In ēng in ê gûn, in ê kim, chō ngó͘-siōng, tì-kàu in siū chián-tû.

5

Sat-má-lī-a ah, I ū pàng-sak lí ê gû-á; Góa tōa siū-khì in; in kàu tī-sî chiah tit-tio̍h bô-chōe ah?

6

Chit-ê chhut tī Í-sek-lia̍t; sī sai-hū só͘ chō-ê, i m̄-sī Siōng-tè; Sat-má-lī-a ê gû-á koat-tòan beh tú-tio̍h phah-chhùi.

7

I só͘ chèng-ê sī hong, só͘ siu-ê sī kńg-lê-hong; bô chiâⁿ-châng; só͘ hoat ê bô kiat-sı̍t; chiū nā kiat-sı̍t, gōa-pang lâng iā beh chia̍h i.

8

Í-sek-lia̍t í-keng siū thun-bia̍t; hiān-chāi tī lia̍t-kok-tiong chhin-chhiūⁿ lâng bô hoaⁿ-hí ê khì-kū.

9

In chiūⁿ-khì A-su̍t, chhin-chhiūⁿ ka-kī tiàm ê iá-lû; Í-hoat-liân bóe lâng thiàⁿ i.

10

In sui-jiân tī lia̍t-kok-tiong bóe lâng thiàⁿ in, Góa beh chū-chı̍p in; in in-ūi kun-ông kap siú-léng só͘ hē ê tāng-tàⁿ chiām-chiām soe-bî.

11

Í-hoat-liân-ke khí chè-tôaⁿ tì-kàu hōan-chōe; in-ūi án-ni chè-tôaⁿ hō͘ in hōan-chōe.

12

Góa ūi i siá Góa ê lu̍t-hoat chiâⁿ-bān tiâu; chóng-sī i khòaⁿ-chòe kap i lóng bô kan-sia̍p.

13

Lūn-kàu hiàn-hō͘ Góa ê lé-mı̍h, in hiàn-bah ka-kī chia̍h--i; chóng-sī Iâ-hô-hoa bô chiap-la̍p--in; taⁿ beh kì-tit in ê chōe-kòa, pān in ê chōe-ok; in beh tò-tńg-khì Ai-kı̍p.

14

In-ūi Í-sek-lia̍t bōe-kì-tit chhòng-chō in ê Chú, khí keng-biō; Iû-tāi ke khí kian-kò͘ ê siâⁿ; Góa beh kàng-hé tī i ê siâⁿ, sio in ê iâⁿ-pôaⁿ.