Hô-se-a 第 7 章 - 巴克禮全羅

1

Góa ài i-tī Í-sek-lia̍t ê sî, Í-hoat-liân ê chōe-kòa kap Sat-má-lī-a ê chōe-ok chiū lō͘-hiān; in-ūi in kiâⁿ tāi-chì hu-ké; lāi-bīn ū chha̍t jı̍p-lâi, gōa-bīn ū kui-tīn ê chhiúⁿ-kiap.

2

In sim-lāi bô siūⁿ kóng, Góa kì-tit in lóng-chóng ê pháiⁿ; taⁿ in só͘-chòe--ê, ûi-khùn in; sī tī Góa bīn-chêng.

3

In ēng kiâⁿ-pháiⁿ hō͘ kun-ông hoaⁿ-hí, ēng pe̍h-chha̍t hō͘ siú-léng khòai-lo̍k.

4

In lóng sī kiâⁿ-îm--ê; chhin-chhiūⁿ pek-piáⁿ ê, khí jia̍t ê hé-lô͘, i tùi chhiau-mī kàu i hoat-kàⁿ ê sî, chiah bô koh thà-hé.

5

Tī lán ê ông iàn-lo̍k ê jı̍t, chiah ê siú-léng, in-ūi chiú ê lia̍t, lâi phòa-pīⁿ; i kap bú-bān ê lâng khan-chhiú.

6

In bâi-ho̍k ê sî-chūn, pī-pān in ê sim, chhin-chhiūⁿ hé-lô͘; in pek-piáⁿ ê lâng, thong-mî teh khùn; kàu chá-khí-sî, i to̍h chhin-chhiūⁿ hé iām-iām.

7

In jia̍t chhin-chhiūⁿ hé-lô͘, thun-bia̍t in ê sū-su; in ê kun-ông lóng tó-lo̍h-khì; in tiong-kan bô lâng kiû-kiò Góa.

8

Í-hoat-liân ka-kī chham-chhap tī lia̍t-pang; Í-hoat-liân sī bô kè-péng ê piáⁿ.

9

Gōa-pang lâng í-keng thun-chia̍h i ê lêng-le̍k, i iā m̄-chai; thâu-mn̂g í-keng chham-pe̍h, i iā m̄-chai.

10

Í-sek-lia̍t ê kiau-ngō͘ tng-bīn kan-chèng in; sui-jiân tú-tio̍h che it-chhè, in iû-gôan bô kui-ǹg Iâ-hô-hoa in ê Siōng-tè, iā bô chhē-kiû I.

11

Í-hoat-liân chhin-chhiūⁿ chíⁿ-á gōng-gōng bû-ti; in kiû-kiò Ai-kı̍p, khì chiū-kūn A-su̍t.

12

In khì ê sî, Góa beh chiong Góa ê bāng pha tī in ê téng-bīn; Góa beh hō͘ i tūi-lo̍h, chhin-chhiūⁿ khong-tiong ê chiáu. Góa beh chiàu in ê hōe-chiòng só͘ thiaⁿ-kìⁿ-ê, khiàn-chek in.

13

In ū chai-ē ah, in-ūi in lī-khui Góa khì; in beh tú-tio̍h pāi-hōai, in-ūi in tek-chōe Góa. Góa beh kiù-sio̍k in, in iáu-kú kóng pe̍h-chha̍t kong-kek góa.

14

In bô ēng sim kiû Góa, sī tī bîn-chhn̂g âu-kiò; in ūi-tio̍h gō͘-kak kap sin-chiú lâi ka-kī chū-chı̍p; in lóng pōe-ge̍k Góa.

15

Góa kàu-tok in, hō͘ in ê chhiú-kut ū la̍t; in iáu-kú tô͘-bô͘ pháiⁿ-sū lâi kong-kek Góa.

16

In kui-ǹg, chóng-sī m̄-sī kui-ǹg Chì-kôaiⁿ--ê; in chhin-chhiūⁿ péng-lìn-tńg ê keng; in ê siú-léng in-ūi chı̍h ê hòng-chhiòng, beh tó tī to-ē; chit-ê beh tī Ai-kı̍p tōe chòe chhiò-pìⁿ.