Hô-se-a 第 6 章 - 巴克禮全羅

1

Lâi ah, lán tio̍h kui-óa Iâ-hô-hoa; I thiah-lı̍h lán, iā beh i-hó lán; I phah lán, iā beh pau lán ê siong.

2

Kè nn̄g jı̍t I beh hō͘ lán koh-o̍ah; kàu tē-saⁿ-jı̍t, I beh hō͘ lán khí-lâi, lán chiū o̍ah tī I ê bīn-chêng.

3

Lán tio̍h jīn-bat Iâ-hô-hoa, chhut-la̍t chìn-chêng lâi bat I; I ún-tàng chhut-hiān chhin-chhiūⁿ thiⁿ-kng-chá ê kng, I beh lîm-kàu lán, chhin-chhiūⁿ hō͘, iā chhin-chhiūⁿ chhun-thiⁿ ê hō͘, lūn-te̍k thó͘-tōe.

4

Í-hoat-liân ah, Góa beh cháiⁿ-iūⁿ khóan-thāi lí? Iû-tāi ah, Góa beh cháiⁿ-iūⁿ khóan-thāi lí? in-ūi lí ê siān-liông chhin-chhiūⁿ chá-khí-sî ê hûn-bū, koh chhin-chhiūⁿ kín-kín ta ê lō͘-chúi.

5

In-ūi án-ni, Góa ēng sian-ti thâi-siah in: ēng Góa chhùi-lāi ê ōe, thâi-sí in. Góa ê sím-phòaⁿ chhin-chhiūⁿ kng hoat-chhut.

6

In-ūi Góa ài lîn-bín, m̄-ài chè-sū, ài lâng bat Siōng-tè, iâⁿ-kè sio-chè.

7

Chóng-sī in pōe-iok chhin-chhiūⁿ A-tong; tī-hia ǹg Góa kiâⁿ khúi-chà.

8

Ki-lia̍t chiū-sī kiâⁿ-pháiⁿ--ê ê siâⁿ, bak-tio̍h huih-jiah.

9

Chhin-chhiūⁿ kui-tīn ê chha̍t bâi-ho̍k teh tng--lâng, chè-si kiat-tóng; iā chhin-chhiūⁿ án-ni, tī Sī-kiàm ê lō͘ thâi lâng; koh sı̍t-chāi kiâⁿ siâ-îm.

10

Tī Í-sek-lia̍t-ke Góa khòaⁿ-kìⁿ ke̍k thang iàm-ò͘ⁿ ê sū; tī-hia ū Í-hoat-liân ê îm-hēng, Í-sek-lia̍t bak--tio̍h lâ-sâm.

11

Iû-tāi ah, Góa hō͘ Góa siū-lia̍h ê peh-sìⁿ tò-lâi ê sî, chiū beh ūi lí pī-pān siu-koah.