Hô-se-a 第 5 章 - 巴克禮全羅

1

Chè-si ah, lín tio̍h thiaⁿ chit-ê; Í-sek-lia̍t-ke ah, lín tio̍h chù-ì; ông-chhin ah, lín tio̍h àⁿ hī-khang; in-ūi sím-phòaⁿ koan-hē tī lín, in-ūi lín chòe o̍ah-tauh tī Bí-su-pa, chòe lô-bāng tiuⁿ tī Tha-po̍k.

2

Chiah ê pōe-ge̍k ê lâng tōa kiâⁿ thâi-lâng; Góa beh chek-ho̍at in.

3

Góa bat Í-hoat-liân, Í-sek-lia̍t iā bōe ún-ba̍t tī Góa; Í-hoat-liân ah, taⁿ lí kiâⁿ-îm, Í-sek-lia̍t bak-tio̍h lâ-sâm.

4

In só͘-chòe--ê chó͘-tòng in kui tī in ê Siōng-tè; in-ūi îm-lōan ê sim tī in lāi-bīn, in iā m̄-bat Iâ-hô-hoa.

5

Í-sek-lia̍t ê kiau-ngō͘ tng-bīn kan-chèng in; só͘-í Í-sek-lia̍t kap Í-hoat-liân, beh in-ūi in ê chōe-kòa lâi tio̍h-tak; Iû-tāi iā beh kap in saⁿ-kap tio̍h-tak.

6

In beh tòa gû-kûn iûⁿ-kûn khì chhē Iâ-hô-hoa, chóng-sī chhē-bōe-tio̍h; in-ūi I í-keng lī-khui in.

7

In ǹg Iâ-hô-hoa kiâⁿ khúi-chà, thau-siⁿ kiáⁿ; taⁿ kàu ge̍h ê chhoe-it, in kap in ê sán-gia̍p beh siū thun-bia̍t.

8

Lín tio̍h tī Ki-pí-a pûn sàu-kak, tī La̍h-má pûn hō-thâu; tī Pek-a-bûn chhut kéng-kò ê siaⁿ, kóng, Piān-ngá-bín ah, tī lí ê āu-bīn.

9

Tī chek-ho̍at ê jı̍t, Í-hoat-liân beh pha-hng; Góa tī Í-sek-lia̍t chiah ê chi-phài tiong, hō͘ in chai chiong-lâi tek-khak ū ê sū.

10

Iû-tāi ê siú-léng chhin-chhiūⁿ chhian-sóa tōe-kài ê lâng; Góa beh piàⁿ Góa ê siū-khì tī in ê sin-chiūⁿ, chhin-chhiūⁿ piàⁿ-chúi chı̍t-iūⁿ.

11

Í-hoat-liân siū pō-gio̍k, siū sím-phòaⁿ ap-chè; in-ūi i kam-sim thàn bēng-lēng.

12

Só͘-í Góa tùi tī Í-hoat-liân, chhin-chhiūⁿ chiù-thâng, tùi tī Iû-tāi chhin-chhiūⁿ hiú-hōai i--ê.

13

Í-hoat-liân khòaⁿ-kìⁿ ka-kī ū pīⁿ, Iû-tāi khòaⁿ pún-sin ū siong; Í-hoat-liân chiū khì A-su̍t, chhe lâng khì kìⁿ Iâ-lûi-pò͘ ông; i bōe-ōe i-hó lí, iā bōe-ōe hō͘ lí ê siong hó.

14

Góa tùi-tī Í-hoat-liân beh chhin-chhiūⁿ sai, tùi-tī Iû-tāi ke chhin-chhiūⁿ ióng ê sai; Góa beh thiah-lı̍h chiah khì; Góa beh kā khì, bô ū kiù i--ê.

15

Taⁿ góa beh khì, tò-khì Góa ê só͘-chāi, kàu in jīn ka-kī ê chōe, kiû kìⁿ Góa ê bīn; in tī kip-lān ê sî, beh chhiat-chhiat chhē-kiû Góa.