Hô-se-a 第 4 章 - 巴克禮全羅

1

Í-sek-lia̍t lâng ah, lín tio̍h thiaⁿ Iâ-hô-hoa ê ōe; in-ūi Iâ-hô-hoa kap chit só͘-chāi ê lâng piān-lūn; in-ūi tī chit ê tōe-hng bô sêng-sı̍t, bô jîn-chû, bô lâng bat Siōng-tè.

2

Chí-ū chiù-chōa, pōe-iok, thâi-lâng, thau-the̍h, kan-îm, kiông-pō, thâi lâng bô soah.

3

Só͘-í chit ê tōe-hng beh pi-ai, kî-tiong khiā-khí ê lâng, kap chhân-iá ê siù, khong-tiong ê chiáu, lóng beh soe-bî; hái-tiong ê hî iā beh bô--khì.

4

Chóng-sī lâng m̄-thang piān-lūn, m̄-thang saⁿ chek-pī; in-ūi lí ê peh-sìⁿ chhin-chhiūⁿ kap chè-si piān-pok--ê chı̍t-iūⁿ.

5

Lí beh tī jı̍t--sî po̍ah-tó, sian-ti iā beh tī mî--sî kap lí saⁿ-kap po̍ah-tó, Góa beh bia̍t-bô lí ê lāu-bú.

6

Góa ê peh-sìⁿ in-ūi bû-ti lâi bia̍t-bô; in-ūi lí khì-sak tì-sek, Góa iā beh khì-sak lí, hō͘ lí bô thang koh chòe chè-si ho̍k-sāi Góa; lí kì-jiân bōe-kì-tit lí ê Siōng-tè ê lu̍t-hoat, Góa iā beh bōe-kì-tit lí ê kiáⁿ-jî.

7

In ke-thiⁿ ná-chōe, chiū ná tek-chōe Góa; Góa beh hō͘ i ê êng-kng piàn-chòe lêng-jio̍k.

8

In chia̍h Góa ê peh-sìⁿ ê sio̍k-chōe-chè, ì-ài in hōan-chōe.

9

Chiong-lâi peh-sìⁿ cháiⁿ-iūⁿ, chè-si iā beh án-ni; Góa beh in-ūi in só͘ kiâⁿ--ê lâi pān in, chiàu in só͘ chòe--ê lâi pò-èng in.

10

In chia̍h iā bōe tit-tio̍h pá, kiâⁿ-îm iā bô ke-thiⁿ lâng; in-ūi in pàng-sak Iâ-hô-hoa, m̄ thiaⁿ-thàn--I.

11

Îm-hēng kap chiú kap sin-chiú sī to̍at lâng ê sim.

12

Góa ê peh-sìⁿ mn̄g in ê chhâ-thâu, koh in ê kóaiⁿ-á chí-sī in; in-ūi in kiâⁿ-îm ê sim hō͘ in sit-bê; in kiâⁿ-îm lī-khui in ê Siōng-tè ê kóan-hat.

13

In hiàn-chè tī soaⁿ-téng, sio-hiuⁿ tī soaⁿ-thâu, tī siōng-chhiū, iông-chhiū, lek-chhiū ê ē-bīn, in-ūi in ê ìm-ńg ê hó; só͘-í lín ê cha-bó͘-kiáⁿ îm-lōan, lín ê sin-niû kiâⁿ-îm.

14

Lín ê cha-bó͘-kiáⁿ îm-lōan, lín ê sin-niû kiâⁿ-îm, Góa bô hêng-ho̍at in; in-ūi hiah ê ta-po͘-lâng kap chhiong-ki lēng-gōa tòa, kap biō-lāi ê ki-lú saⁿ-kap hiàn-chè; chit-hō bû-ti ê peh-sìⁿ tek-khak chhia-tó.

15

Í-sek-lia̍t ah, lí sui-jiân kiâⁿ-îm, chóng-sī Iû-tāi m̄-thang hōan-chōe; m̄-thang khì kiat-kah, iā m̄-thang chiūⁿ-kàu Pek-a-bûn, iā m̄-thang kí éng-o̍ah ê Iâ-hô-hoa lâi chiù-chōa.

16

Í-sek-lia̍t ngī-phīⁿ, chhin-chhiūⁿ ngī-phīⁿ ê gû-bú; taⁿ Iâ-hô-hoa beh chhī in, chhin-chhiūⁿ chhī iûⁿ tī khui-khoah ê tōe.

17

Í-hoat-liân kiat-liân ngó͘-siōng, chhut-chāi--i.

18

In só͘ lim--ê í-keng hoat-sng, in siông-siông kiâⁿ-îm, in ê koaⁿ-tiúⁿ chin hoaⁿ-hí kiàn-siàu sū.

19

Hong ēng i ê sı̍t kńg--i; in beh ūi-tio̍h in ê chè-sū, tì-kàu kiàn-siàu.