Hô-se-a 第 12 章 - 巴克禮全羅

1

Í-hoat-liân chia̍h-hong, koh tui-jip tang-hong; jı̍t-jı̍t ke-thiⁿ pe̍h-chha̍t kap kiông-pō; kap A-su̍t lı̍p-iok, ēng iû sàng kàu Ai-kı̍p.

2

Iâ-hô-hoa kap Iû-tāi piān-lūn, beh chiàu Ngá-kok só͘-kiâⁿ--ê chek-ho̍at i, chiàu i só͘-chòe--ê pò-èng i.

3

I tī thai--nih khîⁿ-tiâu i ê hiaⁿ ê kha-āu-tiⁿ; chòng-liân ê sî kap Siōng-tè tàu-la̍t;

4

kap thiⁿ-sài tàu-la̍t, koh tit-tio̍h khah-iâⁿ; thî-khàu khún-kiû i; tī Pek-te̍k-lī tú-tio̍h I, I tī-hia kap lán kóng-ōe;

5

Iâ-hô-hoa chiū-sī bān-kun ê Siōng-tè; Iâ-hô-hoa sī I ê miâ.

6

Só͘-í lí tio̍h kui-ǹg lí ê Siōng-tè; chip-siú jîn-ài kong-pêng; siông-siông thèng-hāu lí ê Siōng-tè.

7

I sī seng-lí lâng, chhiú kia̍h bô kong-tō ê chhìn, ài ēng khi-phiàn.

8

Í-hoat-liân kóng, Góa sı̍t-chāi hó-gia̍h, í-keng tit-tio̍h châi-pó; tī góa só͘ tio̍h-bôa tit-tio̍h--ê, bô thang chhē-tio̍h góa ū put-gī, lâi sǹg-chòe chōe.

9

Tùi lí chhut Ai-kı̍p tōe ê sî, Góa chòe lí ê Siōng-tè Iâ-hô-hoa; Góa beh hō͘ lí koh khiā-khí tī pò͘-pîⁿ, chhin-chhiūⁿ tī tōa-hōe ê jı̍t chı̍t-iūⁿ.

10

Góa bat tùi chiah ê sian-ti kóng, koh ke-thiⁿ īⁿ-siōng; Góa iā thok sian-ti siat phì-jū.

11

Ki-lia̍t bô chōe mah? In chôan-jiân sī hu-ké--ê; tī Kiat-kah hiàn gû-á chòe chè; in ê chè-tôaⁿ chhin-chhiūⁿ chhân--nih lôe-chōa ê chiâⁿ-tui.

12

Chá-chêng Ngá-kok cháu kàu A-lân tōe, Í-sek-lia̍t in-ūi beh tit-tio̍h bó͘ lâi ho̍k-sāi lâng; in-ūi beh tit-tio̍h bó͘ lâi chhī-iûⁿ.

13

Iâ-hô-hoa koh ēng chı̍t ê sian-ti chhōa Í-sek-lia̍t chhut Ai-kı̍p, iā ēng chı̍t ê sian-ti pó-chôan i.

14

Í-hoat-liân jiá-tio̍h tōa siū-khì; só͘-í i hō͘ lâng lâu-huih ê chōe, beh kui tī i; Í-hoat-liân só͘ kiâⁿ lêng-jio̍k Chú ê sū, Chú beh pò-èng i.