Hô-se-a 第 13 章 - 巴克禮全羅

1

Chá-chêng Í-hoat-liân kóng-ōe, lâng lóng ngia̍uh-ngia̍uh-chhoah; i tī Í-sek-lia̍t-tiong tiàm-tī kôaiⁿ-ūi; chóng-sī i tī Pa-le̍k ê sū hōan-chōe, chiū tì-kàu sí.

2

Taⁿ in ê chōe-kòa ná-hōan ná-chōe, ēng in ê gûn ūi ka-kī chng-pu̍t, in chiàu in ê kî-khiáu lâi chō ngó͘-siōng, lóng sī sai-hū só͘ chòe; in gī-lūn kóng, Hiàn-chè ê lâng tio̍h kap gû-á chim-chhùi.

3

In-ūi án-ni, in beh chhin-chhiūⁿ chá-khí-sî ê hûn, iā chhin-chhiūⁿ khòai-khòai ta ê lō͘-chúi, chhin-chhiūⁿ gō͘-kak-tiûⁿ ê phàⁿ-chhek hō͘ kông-hong chhe--khì, koh chhin-chhiūⁿ ian tùi thang-á chhèng-chhut-khì.

4

Tùi lí chhut Ai-kı̍p tōe ê sî, Góa chòe lí ê Siōng-tè Iâ-hô-hoa; Góa í-gōa lí m̄-thang jīn-bat pa̍t ê Siōng-tè; koh Góa í-gōa bô ū Kiù-chú.

5

Tī khòng-iá ta-sò ê tōe, Góa í-keng bat lí.

6

In chiàu in ê bí-niû tit-tio̍h chia̍h-pá; í-keng chia̍h-pá, in ê sim chiū chū-ko, tùi án-ni bōe-kì-tit Góa.

7

Só͘-í Góa tùi-tī in chhin-chhiūⁿ sai, koh chhin-chhiūⁿ pà bih tī lō͘-piⁿ.

8

Góa tú-tio̍h in chhin-chhiūⁿ sit-lo̍h kiáⁿ ê hîm-bú, thiah-lı̍h in ê heng-ha̍h; tī-hia Góa beh chhin-chhiūⁿ bú ê sai thun-chia̍h in; iá-siù beh thiah-lı̍h in.

9

Í-sek-lia̍t ah, lí ê pāi-bô chiū-sī in-ūi hóan-tùi Góa, chiū-sī hóan-tùi pang-chān lí--ê.

10

Hiān-kim lí ê ông tī toh-lo̍h, hō͘ i tī lí chiah ê siâⁿ chín-kiù lí ah? lí ê sū-su chiū-sī lí só͘ bat kóng, Kā góan siat-lı̍p chı̍t ê ông kap siú-léng--ê, taⁿ in tī toh-lo̍h ah?

11

Góa tī siū-khì-tiong kā lí siat-lı̍p ông, iā tī Góa ê tōa siū-khì hòe--i.

12

Í-hoat-liân ê chōe-kòa kì-tiâu-teh, i ê chōe-ok siu-khǹg-teh.

13

Hū-jîn-lâng siⁿ-kiáⁿ ê thàng-thiàⁿ beh kàu-tī i; i sī bô tì-hūi ê kiáⁿ, in-ūi i ê sî í-keng kàu; m̄ eng-kai iân-chhiân tī chú-kiong-kháu.

14

Góa beh sio̍k-hôe in thoat-lī im-hú ê kôan; Góa beh chín-kiù in thoat-lī sí-bô; Sí-bô ah, lí ê chai-hāi tī toh-lo̍h? Im-hú ah, lí ê húi-bia̍t tī toh-lo̍h? Góa koat-tòan bô thè-hóe.

15

I tī hiaⁿ-tī tiong, sui-jiân kiat-sı̍t chōe-chōe, chóng-sī beh ū tang-hong chhe-lâi, chiū-sī Iâ-hô-hoa ê hong tùi khòng-iá khí, i ê chúi-chôaⁿ beh ta, i ê gôan-thâu beh cho̍at, i beh chhiúⁿ-the̍h só͘ chek-chū it-chhè thang hoaⁿ-hí ê pó-khì.

16

Sat-má-lī-a beh tam-tng i ê chōe; in-ūi pōe-ge̍k i ê Siōng-tè; i beh tó tī to-ē, in ê eⁿ-á beh hō͘ lâng siak-sí, in ū-sin ê hū-jîn-lâng beh hō͘ lâng phòa-pak.