I-sài-a 第 24 章 - 巴克禮全羅

1

Khòaⁿ ah, Iâ-hô-hoa hō͘ tōe khang-hu, pìⁿ-chòe pha-hng, koh chiong tōa-tōe hoan-lìn-tńg, hō͘ khiā-khí ê peh-sìⁿ sì-sòaⁿ.

2

Hit-sî peh-sìⁿ cháiⁿ-iūⁿ, chè-si ia̍h-sī án-ni; lô͘-po̍k cháiⁿ-iūⁿ, chú-lâng ia̍h-sī án-ni; lú-pī cháiⁿ-iūⁿ, chú-bú ia̍h-sī án-ni; bóe-mı̍h--ê cháiⁿ-iūⁿ, bōe-mı̍h--ê ia̍h-sī án-ni; pàng-chè--ê cháiⁿ-iūⁿ, chioh-chè-ê ia̍h-sī án-ni; the̍h lī-sek--ê cháiⁿ-iūⁿ, chhut lī-sek--ê ia̍h-sī án-ni.

3

Tōe beh chòe-chı̍t-ē khang-hu, lóng tú-tio̍h chhiúⁿ-kiap; in-ūi chit ê ōe sī Iâ-hô-hoa kóng--ê.

4

Tōe-chiūⁿ pi-ai soe-thè, sè-kài hú-pāi soe-thè, tōe-chiūⁿ tiàm-tī kôaiⁿ-ūi ê lâng ia̍h hú-pāi.

5

Tōe hō͘ khiā-khí hit ê téng-bīn ê peh-sìⁿ phah lâ-sâm, in-ūi in hōan-tio̍h hiah ê lu̍t-hoat, hòe-bô lu̍t-lē, pōe-biū éng-óan ê iok.

6

Só͘-í tōe hō͘ chiù-chó͘ thun-bia̍t, khiā-khí tī hit téng-bīn--ê siū gí-chōe; tōe-chiūⁿ khiā-khí ê peh-sìⁿ siū-sio, só͘-chhun ê lâng chió-chió.

7

Sin ê chiú pi-ai, phû-tô-chhiū húi-hōai; sim-lāi khòai-lo̍k--ê lóng-chóng thó͘-khùi.

8

Phah-kó͘ ê khòai-lo̍k chēng-chēng, iàn-lo̍k--ê ê siaⁿ-im lóng soah; tôaⁿ-khîm ê khòai-lo̍k ia̍h chēng-chēng.

9

In bōe tit-tio̍h chhiùⁿ-koa lim-chiú; kāu-chiú tùi tī lim ê lâng beh chiâⁿ-chòe khó͘.

10

Pha-hng ê siâⁿ í-keng thiah-húi; ta̍k-keng chhù lóng koaiⁿ-mn̂g, lâng lóng bōe-tit jı̍p.

11

Tī koe-lō͘ in-ūi chiú ū pi-ai ê siaⁿ; it-chhè ê hoaⁿ-hí pìⁿ-chòe o͘-àm, tōe-chiūⁿ ê khòai-lo̍k lóng bô--khì.

12

Siâⁿ-lāi í-keng pha-hng, siâⁿ-mn̂g lóng húi-hōai.

13

In-ūi tī tōe-chiūⁿ, bān peh-sìⁿ ê tiong-kan, beh chhin-chhiūⁿ phah-kè-liáu ê kaⁿ-ná-chhiū, koh chhin-chhiūⁿ phû-tô bán-liáu iáu chhun--ê chı̍t-iūⁿ.

14

Chiah ê lâng beh chhut tōa-siaⁿ, beh hoaⁿ-hí kiò; in ūi-tio̍h Iâ-hô-hoa ê ui-giâm, tùi hái--nih lâi âu-kiò.

15

In-ūi án-ni lín tio̍h tī tang-hng êng-kng Iâ-hô-hoa; tī chiah ê hái-sū êng-kng Iâ-hô-hoa Í-sek-lia̍t Siōng-tè ê miâ.

16

Góan thiaⁿ-kìⁿ tùi tōe-ke̍k ū lâng chhiùⁿ-koa, kóng, Êng-kng kui tī gī ê lâng. Chóng-sī góa kóng, Góa siau-bia̍t lah, góa siau-bia̍t lah; góa ū chai-ē ah, khúi-chà--ê kiâⁿ khúi-chà, khúi-chà-ê tōa kiâⁿ khúi-chà.

17

Tōe-chiūⁿ khiā-khí ê peh-sìⁿ ah, kiaⁿ-hiâⁿ, hām-khiⁿ, o̍ah-tauh lóng lîm-kàu lí.

18

Siám-pī kiaⁿ-hiâⁿ ê siaⁿ--ê, beh po̍ah-lo̍h hām-khiⁿ; tùi hām-khiⁿ khí-lâi--ê beh hō͘ o̍ah-tauh tauh-tio̍h; in-ūi thiⁿ-téng ê thang-á lóng khui, tōe ê kun-ki ia̍h tín-tāng.

19

Tōe chòe chı̍t-ē phò-hōai, tōe it-chīn pang-lı̍h, tōe tōa-tōa iô-choah.

20

Tōe beh tian-tian tó-tó, chhin-chhiūⁿ chiú-chùi ê lâng; koh iô-lâi iô-khì, chhin-chhiūⁿ tiàu-chhn̂g; chōe-kòa tāng-tāng teh--in, tek-khak tó--lo̍h-khì, bōe-ōe koh khí-lâi.

21

Kàu hit-jı̍t Iâ-hô-hoa tī kôaiⁿ ê só͘-chāi chek-ho̍at kôaiⁿ ê só͘-chāi ê chèng kun-peng; tī tōe-chiūⁿ beh chek-ho̍at tōe-chiūⁿ ê lia̍t-ông.

22

In beh siū chū-chı̍p, chhin-chhiūⁿ hōan-lâng siū chū-chı̍p tī hām-khiⁿ; ia̍h beh siū koaiⁿ tī kaⁿ-lāi; chōe-chōe jı̍t liáu-āu, chiū beh ū lîm-kàu in--ê.

23

Hit-sî ge̍h beh kiàn-siàu, jı̍t beh làu-khùi; in-ūi bān-kun ê Iâ-hô-hoa beh tī Sek-an soaⁿ tī Iâ-lō͘-sat-léng chòe-ông, tī I ê tióng-ló ê bīn-chêng beh ū êng-kng.