I-sài-a 第 25 章 - 巴克禮全羅

1

Iâ-hô-hoa ah, Lí sī góa ê Siōng-tè, góa beh chun lí chòe-kôaiⁿ, góa beh o-ló lí ê miâ; in-ūi Lí ēng tiong-sìn sêng-sı̍t kiâⁿ kî-biāu ê sū, chiū-sī Lí tùi kó͘-chá só͘ gí-tiāⁿ--ê.

2

In-ūi Lí hō͘ siâⁿ pìⁿ-chòe thô͘-tui, hō͘ kian-kò͘ ê siâⁿ pìⁿ-chòe hāu-phiaⁿ-phè, hō͘ gōa-pang lâng ê keng-tiān bô koh chòe-siâⁿ, éng-óan bô koh khí-chō.

3

Só͘-í ióng-béng ê peh-sìⁿ beh êng-kng Lí, kiông-pō ê kok ê siâⁿ beh kiaⁿ-ùi Lí.

4

In-ūi tng kiông-pō ê lâng chhui-pek lâng ê sî, chhin-chhiūⁿ tōa-hong tı̍t-tı̍t chhe chhiûⁿ-piah, Lí chiū chòe sòng-hiong lâng ê ōe-só͘, chòe khùn-khó͘ lâng kip-lān-tiong ê ōe-só͘, chòe siám-pī tōa-hong ê só͘-chāi, chòe siám-pī iām-jia̍t ê ìm-ńg.

5

Lí beh chó͘-chí gōa-pang lâng ê soan-hoa, chhin-chhiūⁿ ta-tōe ê jia̍t-khì hê--lo̍h-khì; kìm-chí kiông-pō ê lâng chhiùⁿ thâi-iâⁿ ê koa, chhin-chhiūⁿ jia̍t-khì siū hûn ê iáⁿ siau-bô.

6

Tī chit ê soaⁿ bān-kun ê Iâ-hô-hoa beh ūi-tio̍h bān peh-sìⁿ ēng hó-mı̍h pâi-siat iân-toh, ēng kū-chiú kap kut-chhé móa-móa ê hó-mı̍h, í-kı̍p chē-chheng ê kū-chiú, pâi-siat iân-toh.

7

Koh tī chit ê soaⁿ I beh tû--khì tà bān peh-sìⁿ ê phè, kap jia-khàm bān-kok ê pò͘-phâng.

8

I ū thun-bia̍t sí-bô kàu éng-óan; Chú Iâ-hô-hoa beh chhit-khì chèng-lâng bīn--nih ê ba̍k-sái; koh tùi phó͘-thiⁿ-ē tû--khì I ê peh-sìⁿ ê kiàn-siàu; in-ūi che sī Iâ-hô-hoa kóng ê.

9

Kàu hit-jı̍t lâng beh kóng, Khòaⁿ ah, che sī góan ê Siōng-tè, góan pêng-sò͘ thèng-hāu I. I beh chín-kiù góan; che sī Iâ-hô-hoa; góan pêng-sò͘ thèng-hāu I, góan beh in-ūi I ê kiù-un lâi hoaⁿ-hí khòai-lo̍k.

10

Iâ-hô-hoa ê chhiú beh hōaⁿ tī chit ê soaⁿ, Mô͘-ap lâng tī só͘ khiā-khí ê tōe beh siū thún-ta̍h, chhin-chhiūⁿ ta-chháu siū thún-ta̍h tī pùn-sò-tî ê chúi-lāi.

11

I beh tī hit tiong-kan thí-khui chhiú, chhin-chhiūⁿ siû-chúi--ê thí-khui chhiú teh siû; chóng-sī I beh hō͘ i ê kiau-ngō͘ kap i ê chhiú só͘ kiâⁿ ê khúi-kè, chòe chı̍t-ē pāi--lo̍h-khì.

12

Lí siâⁿ-chhiûⁿ kian-kò͘ ê kôaiⁿ-tâi, I beh chhia-tó i, húi-bia̍t i, thiah kàu pîⁿ-tōe, kē kàu tîn-ai.