I-sài-a 第 26 章 - 巴克禮全羅

1

Tng hit-jı̍t tī Iû-tāi tōe, lâng tek-khak chhiùⁿ chit ê koa, kóng, Góan ū kian-kò͘ ê siâⁿ; I beh ēng kiù-un lı̍p chòe siâⁿ-chhiûⁿ, chòe gōa-têng-siâⁿ.

2

Tio̍h khui chiah ê mn̂g, hō͘ siú sìn-sı̍t gī ê peh-sìⁿ tit-tio̍h chìn-jı̍p.

3

Kian-sim óa-khò Lí ê, Lí beh pó-siú i cha̍p-hun pêng-an, in-ūi i óa-khò Lí.

4

Lín tio̍h óa-khò Iâ-hô-hoa tı̍t-kàu éng-óan; in-ūi Chú Iâ-hô-hoa sī éng-óan ê chio̍h-pôaⁿ.

5

I hō͘ tiàm tī kôaiⁿ ê só͘-chāi--ê kap kôaiⁿ ê siâⁿ chòe chı̍t-ē pāi--lo̍h-khì; I beh chhia-tó i tī tōe--nih, lo̍h kàu tîn-ai.

6

Kha beh thún-ta̍h i, chiū-sī sòng-hiong lâng ê kha, khùn-khó͘ ê lâng ê kha-pō͘.

7

Gī-lâng lō͘ sī chèng-tı̍t; Lí chèng-tı̍t--ê ah, siu-pîⁿ gī-lâng ê lō͘.

8

Iâ-hô-hoa ah, góan tī Lí sím-phòaⁿ ê lō͘ thèng-hāu Lí; góan ê sim só͘ him-bō͘--ê, sī Lí ê miâ kap kì-liām Lí.

9

Góa ēng góa ê sim mî-kan him-bō͘ Lí; ia̍h ēng góa ê sîn thiⁿ-kng-chá chhē Lí; in-ūi Lí sím-phòaⁿ sè-chiūⁿ ê sî, chiū tōe-chiūⁿ ê peh-sìⁿ beh ha̍k-sı̍p gī.

10

Ēng un-hūi khóan-thāi pháiⁿ-lâng, i iû-gôan m̄ ha̍k-sı̍p gī; tī chèng-tı̍t ê tōe-hng, i beh kiâⁿ put-gī, ia̍h bô chù-ì Iâ-hô-hoa ê ui-giâm.

11

Iâ-hô-hoa ah, Lí ê chhiú kia̍h-kôaiⁿ, in iû-gôan m̄-khòaⁿ; in beh khòaⁿ-kìⁿ Lí ūi-tio̍h peh-sìⁿ ê jia̍t-sim lâi kiàn-siàu; koh ū hé sio-bia̍t Lí ê tùi-te̍k.

12

Iâ-hô-hoa ah, Lí beh chù-tiāⁿ góan tit-tio̍h pêng-an, in-ūi góan só͘ chòe it-chhè ê sū, lóng sī Lí kā góan chiâⁿ-ê.

13

Iâ-hô-hoa góan ê Siōng-tè ah, Lí í-gōa bat ū pa̍t ê chú kóan-hat góan; chóng-sī góan beh choan-choan óa-khò Lí, kì-liām Lí ê miâ.

14

In sí-liáu tek-khak bōe-ōe koh-o̍ah; in ê im-hûn bōe koh khí-lâi; in-ūi Lí lîm-kàu in, châu-bia̍t in, hō͘ in ê miâ lóng bô--khì.

15

Iâ-hô-hoa ah, Lí ke-thiⁿ kok-bîn, Lí ke-thiⁿ kok-bîn; Lí tit-tio̍h êng-kng; koh khui-khoah chit ê tōe sì-bīn ê kéng-kài.

16

Iâ-hô-hoa ah, in tī hōan-lān-tiong chhē Lí; Lí ê kéng-kài kàu in sin-chiūⁿ, in chiū piàⁿ-sim kî-tó Lí.

17

Chhin-chhiūⁿ hū-jîn-lâng hôai-īn, beh siⁿ ê sî, chiū kiau-ká, tī thòng-khó͘ ê sî âu-kiò; Iâ-hô-hoa ah, góan tī Lí ê bīn-chêng ia̍h sī án-ni.

18

Góan ia̍h bat hôai-īn bat kiau-ká, só͘-siⁿ--ê kéng-jiân chhin-chhiūⁿ hong; góan tī tōe--nih bē-bat kiâⁿ sím-mı̍h chín-kiù ê sū; sè-chiūⁿ khiā-khí ê peh-sìⁿ ia̍h bô po̍ah-lo̍h.

19

Lí ê sí-lâng beh koh-o̍ah; góa chiah ê sin-si beh koh khí--lâi; tó tī tîn-ai--ê ah, lín tio̍h cheng-sîn khí-lâi chhiùⁿ-koa; in-ūi Lí ê lō͘-chúi chhin-chhiūⁿ chháu-chhài-téng ê lō͘-chúi, tōe ia̍h beh kau-chhut im-hûn.

20

Góa ê peh-sìⁿ ah, lín tio̍h jı̍p ba̍t-pâng koaiⁿ lí ê mn̂g, bih tiap-á-kú, thèng-hāu siū-khì kè-khì.

21

In-ūi Iâ-hô-hoa tùi I ê só͘-chāi chhut-lâi, beh hêng-ho̍at tōe-chiūⁿ khiā-khí ê peh-sìⁿ ê chōe-ok; tōe ia̍h beh lō͘-chhut i só͘ ū ê huih, bô koh jia-khàm siū-thâi ê lâng.