I-sài-a 第 27 章 - 巴克禮全羅

1

Kàu hit-jı̍t Iâ-hô-hoa beh ēng I kong-ngī ū-la̍t ê tōa ki to hêng-ho̍at go̍k-hî, chiū-sī hit-hō gâu-cháu ê chôa, hêng-ho̍at go̍k-hî chiū-sī hit-hō oan-oan oat-oat ê chôa; ia̍h beh thâi-sí hái-tiong ê lêng.

2

Tng hit-jı̍t ū chhut hó-chiú ê phû-tô-hn̂g, lín tio̍h kí chit ê hn̂g chhiùⁿ-koa,

3

kóng, Góa Iâ-hô-hoa sī kò͘-siú phû-tô-hn̂g--ê; Góa sî-khek kòan-ak i, mî-jı̍t kò͘-siú i, bián-tit lâng sún-hāi i.

4

Góa bô chûn siū-khì; gōan ū chhì-phè chı̍t-lê kap Góa kau-chiàn, Góa chiū hó-táⁿ chìn-chêng khì chhē i, kā i chòe chı̍t-ē sio--khì.

5

Nā-bô án-ni, hō͘ i khîⁿ-tio̍h Góa ê lêng-le̍k, lâi kap Góa hô-hó; gōan i kap Góa hô-hó.

6

Chiong-lâi Ngá-kok beh tèng i ê kun, Í-sek-lia̍t beh hoat-gê khui-hoe; in ê ké-chí beh chhiong-móa sè-kài.

7

Chú phah i, kiám chhin-chhiūⁿ phah hiah-ê bat phah-i ê lâng mah? i siū-thâi, kiám chhin-chhiūⁿ hiah-ê thâi-i--ê ê siū-thâi mah?

8

Lí chhe in khì, sī chiàu só͘ ha̍p-gî kap in saⁿ-chiⁿ; khí tang-hong ê jı̍t, chiū ēng tōa-hong kā in kóaⁿ--khì.

9

Só͘-í Ngá-kok ê chōe-ok beh án-ni tit-tio̍h sóe-tû, i ê chōe-kòa tit-tio̍h tû--khì ê hāu-kó, chāi-tī chit-ê; hit-sî i hō͘ chè-tôaⁿ ê chio̍h-thâu pìⁿ-chòe phah-chhùi ê he-chio̍h; tì-kàu chhâ-thiāu kap jı̍t-siōng bô koh khiā--teh.

10

In-ūi kian-kò͘ ê siâⁿ pìⁿ-chòe chhiⁿ-chhìn; lō͘-ke sòaⁿ-the̍h chhin-chhiūⁿ khòng-iá; gû-á beh chia̍h-chháu tī-hia, tó tī-hia, ia̍h beh chia̍h-ôan i ê chhiū-ki.

11

I ê ki ko͘-tâ siū at-chı̍h, hū-jîn-lâng beh lâi kā i sio-lio--khì; in-ūi chiah ê peh-sìⁿ gōng-gōng; só͘-í chō-hòa in--ê, bô beh lîn-bín in, chō-chiâⁿ in--ê, bô beh si-un hō͘ in.

12

Kàu hit-jı̍t Iâ-hô-hoa beh khà i ê ké-chí, tùi Tōa-hô kàu Ai-kı̍p ê khoe; lín Í-sek-lia̍t lâng chı̍t-ê chı̍t-ê hō͘ I siu-khioh.

13

Tng hit-jı̍t beh pûn tōa ê hō-thâu; kìⁿ-nā phiau-liû tī A-su̍t tōe, kap siū-kóaⁿ tī Ai-kı̍p tōe-ê, lóng beh lâi tī sèng-soaⁿ, tī Iâ-lō͘-sat-léng, kèng-pài Iâ-hô-hoa.