I-sài-a 第 33 章 - 巴克禮全羅

1

Chai-ē ah, lí chit-ê chhiúⁿ-to̍at lâng--ê, ka-kī bô siū chhiúⁿ-to̍at; kiâⁿ tāi-chì khúi-chà--ê, lâng bô ēng khúi-chà khóan-thāi lí! Lí chhiúⁿ-to̍at tú-á soah, ka-kī beh siū chhiúⁿ-to̍at; lí kiâⁿ khúi-chà tú-á soah, lâng beh ēng khúi-chà khóan-thāi lí.

2

Iâ-hô-hoa ah, kiû Lí si-un hō͘ góan; góan thèng-hāu Lí, kiû Lí ta̍k chá-khí chòe góan ê chhiú, tú-tio̍h hōan-lān ê sî, chòe góan ê chín-kiù.

3

Soan-hoa ê siaⁿ chı̍t-ē hoat, chèng peh-sìⁿ tô-cháu; Lí chı̍t-ē khí-lâi, lia̍t-kok sì-sòaⁿ.

4

Lín só͘-chhiúⁿ--ê beh hō͘ lâng siu-sı̍p, chhin-chhiūⁿ chián-á-thâng ê siu-sı̍p mı̍h; lâng cháu--khì hia, chhin-chhiūⁿ chháu-meh thiàu-lâi thiàu-khì.

5

Iâ-hô-hoa siū chun-chòe kôaiⁿ; in-ūi I tiàm tī kôaiⁿ ê só͘-chāi; I ēng kong-pêng kong-gī chhiong-móa Sek-an.

6

Lí it-seng it-sì beh tit-tio̍h an-ún, ū hong-sēng ê kiù-un, kap tì-hūi kap chai-bat; kèng-ùi Iâ-hô-hoa chòe lí ê pó-pòe.

7

Khòaⁿ ah, in ê hô-kia̍t tī gōa-bīn ai-siong; kiû-hô ê sù-chiá thòng-sim thî-khàu.

8

Tōa-lō͘ pha-hng, lóng bô lâng kè-lō͘; i pōe-iok, khòaⁿ-khin chiah ê siâⁿ, bô iàu-kín peh-sìⁿ.

9

Tōe-chiūⁿ pi-ai soe-thè; Lī-pa-lùn kiàn-siàu ko͘-tâ; Sa-lûn chhin-chhiūⁿ khòng-iá; Pa-san kap Ka-bı̍t ê chhiū-ba̍k lak kng-kng.

10

Iâ-hô-hoa kóng, Taⁿ Góa beh khí-lâi; taⁿ Góa beh heng-khí; taⁿ Góa beh ka-kī kôaiⁿ.

11

Lín hôai-īn chho͘-khng lâi siⁿ tiū-kó; lín ê khì beh chhin-chhiūⁿ hé lâi thun-bia̍t lín.

12

Lia̍t-pang beh chhin-chhiūⁿ í-keng sio ê chio̍h-he; chhin-chhiūⁿ í-keng koah ê chhì-phè, siū-sio tī hé-tiong.

13

Lín hn̄g ê lâng, tio̍h thiaⁿ Góa só͘-kiâⁿ--ê, lín kūn ê lâng tio̍h chai Góa ê tōa kôan-lêng.

14

Sek-an tiong ê chōe-jîn lóng kiaⁿ-hiâⁿ, bô kèng-khiân ê lâng beh tı̍t-tı̍t chhoah. Lán tiong-kan chī-chūi ōe kap thun-bia̍t ê hé saⁿ-kap tòa? Lán tiong-kan chī-chūi ōe kap éng-óan ê sio-húi saⁿ-kap tòa ah?

15

Kiâⁿ tāi-chì kong-gī, kóng-ōe chèng-tı̍t, òan-hūn le̍k-sek ê châi-lī, iô chhiú bô siū pò͘-lō͘, that-ba̍t hī-khang bô thiaⁿ lâu-huih ê ōe, khoeh ba̍k-chiu bô khòaⁿ pháiⁿ-tāi--ê;

16

i beh tiàm tī kôaiⁿ ê só͘-chāi; kian-kò͘ ê chio̍h-pôaⁿ chòe i ê ōe-só͘; beh ū bí-niû kiong-kip i, i ê chúi tek-khak bōe cho̍at-tn̄g.

17

Lí ê ba̍k-chiu beh khòaⁿ-kìⁿ ông ê súi, beh khòaⁿ-kìⁿ khui-khoah ê tōe.

18

Lí ê sim beh siàu-liām hit ê kiaⁿ-hiâⁿ ê sū; kóan-siàu--ê tī toh-lo̍h? phêng kòng-gûn ê tī toh-lo̍h? sǹg chiú-kiⁿ-lâu--ê tī toh-lo̍h?

19

Lí tek-khak bô khòaⁿ-kìⁿ kiông-béng ê peh-sìⁿ, chiū-sī kóng-ōe oh-thiaⁿ, lí bōe bêng-pe̍k; giân-gú gí-bú gí-ngiáu, lí bōe hiáu-tit--ê.

20

Lí tio̍h khòaⁿ Sek-an, lán siú sèng-choeh ê siâⁿ, lí ê ba̍k-chiu beh khòaⁿ-kìⁿ Iâ-lō͘-sat-léng chòe an-chēng ê chhù-the̍h, chòe bô î-sóa ê pò͘-pîⁿ, i ê khı̍t éng bô pu̍ih-chhut, i ê soh lóng bô tn̄g.

21

Tī-hia Iâ-hô-hoa beh hián-bêng ui-giâm kap lán saⁿ-kap tī-teh, chhin-chhiūⁿ kang-hô khui-khoah ê tōe; hit tiong-kan tek-khak bô ū kò-chiúⁿ ê chûn óng-lâi, ia̍h bô ū ui-hong ê chûn keng-kè.

22

In-ūi Iâ-hô-hoa sī lán ê sím-phòaⁿ-si, Iâ-hô-hoa sī kā lán siat lu̍t-hoat--ê; Iâ-hô-hoa sī lán ê ông; I beh chín-kiù lán.

23

Lí ê phâng-soh lóng lut--khì; chûn-ûi khiā-bōe-chāi; hong-phâng chhia bōe-khí-lâi; hit-sî chōe-chōe chhiúⁿ--lâi ê mı̍h hō͘ lâng pun--khì; pái-kha--ê ia̍h chhiúⁿ-tio̍h mı̍h.

24

Khiā-khí ê peh-sìⁿ tek-khak bô kóng, Góa ū phòa-pīⁿ; kî-tiong khiā-khí ê peh-sìⁿ, chōe-kòa lóng sià-bián.