I-sài-a 第 34 章 - 巴克禮全羅

1

Lia̍t-kok ah, lín tio̍h kūn-chêng lâi thiaⁿ; chèng peh-sìⁿ ah, lín tio̍h àⁿ hī-khang lâi thiaⁿ; tōe kap i só͘ chhiong-móa--ê, sè-kài kap kìⁿ-nā tùi i lâi chhut--ê, lóng tio̍h thiaⁿ.

2

In-ūi Iâ-hô-hoa siū-khì kàu lia̍t-kok, tōa siū-khì in ê chôan-kun; gí-tiāⁿ lóng bia̍t i, chiong in kau hō͘ lâng thâi.

3

In siū-thâi-ê tek-khak hiat-ka̍k, sin-si ê chhàu-bī chhèng--khí-lâi, chiah ê soaⁿ siū in ê huih iûⁿ-hòa.

4

Thiⁿ ê bān-siōng beh siau-bô, thiⁿ beh chhin-chhiūⁿ chhak kńg--khí-lâi; i ê bān-siōng beh soe-pāi, chhin-chhiūⁿ phû-tô-chhiū ê hio̍h soe-pāi, koh chhin-chhiūⁿ bû-hoa-kó-chhiū ê soe-pāi chı̍t-iūⁿ.

5

In-ūi Góa ê to tī thiⁿ--nih í-keng lim kàu-gia̍h; khòaⁿ ah, chit ê to beh kàu Í-tong, í-kı̍p Góa só͘ gí-tiāⁿ beh bia̍t-bô ê peh-sìⁿ, lâi sím-phòaⁿ i.

6

Iâ-hô-hoa ê to ū huih móa-móa, bak-tio̍h iû kap iûⁿ-á-kiáⁿ kap soaⁿ-iûⁿ ê huih, í-kı̍p kang ê mî-iûⁿ io-chí ê iû; in-ūi Iâ-hô-hoa tī Pho-su-la̍h ū chè-sū, tī Í-tong tōe ū tōa thâi-lâng ê sū.

7

Iá-gû beh kap in lo̍h--lâi, gû-á kap kang ê gû ia̍h sī án-ni; in ê tōe in-ūi huih lâi chùi, in ê thô͘-hún in-ūi iû lâi pûi.

8

In-ūi Iâ-hô-hoa ū pò-siû ê jı̍t, ūi-tio̍h Sek-an ê àn-kiāⁿ, ū pò-èng ê nî.

9

Í-tong chiah ê khoe beh pìⁿ-chòe le̍k-chhiⁿ, thô͘-hún beh pìⁿ-chòe jiû-n̂g, i ê tōe chiâⁿ-chòe í-keng to̍h ê le̍k-chhiⁿ.

10

Mî-jı̍t lóng bô sit; i ê ian éng-óan chhèng--khí-lâi, tāi-tāi pha-hng; éng-óan bô lâng keng-kè.

11

Thê-ô͘ hô-ti beh tit-tio̍h chòe-gia̍p; niau-thâu-eng o͘-a beh tiàm tī hit tiong-kan; I beh chiong hong-hòe ê chún-chîn, hūn-tūn ê tūi-sòaⁿ, khan tī i ê téng-bīn.

12

In beh kiò chun-kùi ê lâng lâi tī-lí kok, tī-hia lóng bô chı̍t-ê, kùi-cho̍k ia̍h lóng bô.

13

In ê keng-tiān beh hoat chhì-phè, ōe-só͘ beh hoat chı̍t-lê kap chháu-chhì; beh chòe soaⁿ-káu ê hia̍t, tô-chiáu ê siū.

14

Iá-siù kap chhâi-lông saⁿ tú-tio̍h; iá-soaⁿ-iûⁿ beh kap i ê phōaⁿ tùi-kiò; mî--sî ê iau-kòai beh tī-hia hioh, ka-kī chhē an-hioh ê só͘-chāi.

15

Chìⁿ-chôa beh tī-hia choh siū, siⁿ-nn̄g, pū-nn̄g, chhut-kiáⁿ, koh chū-chı̍p kiáⁿ tī i ê pak-tó͘-ē; eng-chiáu kui-tùi chū-chı̍p tī-hia.

16

Lín tio̍h káng-kiù Iâ-hô-hoa ê chheh lâi tha̍k i; kî-tiong bô-khiàm chı̍t-hāng bô chı̍t-chiah bô phit-phòe; in-ūi Góa ê chhùi í-keng chhut bēng-lēng, I ê sîn í-keng chū-chı̍p in.

17

I ia̍h ūi in liam-khau, koh chhin-chhiú ēng chún-chîn kā in pun-tōe; in beh éng-óan tit-tio̍h i chòe-gia̍p, ta̍k sè-tāi tiàm tī-hia.