I-sài-a 第 35 章 - 巴克禮全羅

1

Khòng-iá kap ta-sò ê tōe tek-khak hoaⁿ-hí; soa-bô͘ ia̍h beh khòai-lo̍k, koh chhin-chhiūⁿ mûi-kùi khui-hoe.

2

I beh khui-hoe bō͘-sēng, lâi hoaⁿ-hí, beh ū hoaⁿ-hí kap chhiùⁿ-koa; Lī-pa-lùn ê êng-kng, Ka-bı̍t kap Sa-lûn ê súi, beh kui i; in beh khòaⁿ-kìⁿ Iâ-hô-hoa ê êng-kng, lán ê Siōng-tè ê bí-biāu.

3

Lín tio̍h hō͘ lóan-jio̍k ê chhiú ióng-chòng, bô-la̍t ê kha-thâu-u chū-chāi.

4

Tùi sió-táⁿ ê lâng kóng, Lín tio̍h kong-kiông, m̄-bián kiaⁿ; khòaⁿ ah, lín ê Siōng-tè beh lâi pò-siû, beh lâi kiâⁿ ke̍k-tōa ê pò-èng; I beh lâi chín-kiù lín.

5

Hit-sî chhiⁿ-mî lâng ê ba̍k-chiu beh khui, chhàu-hī-lâng ê hī-khang beh lāi.

6

Hit-sî pái-kha--ê beh tiô-thiàu chhin-chhiūⁿ lo̍k, é-káu ê chı̍h beh chhiùⁿ-koa; in-ūi chúi chhèng-chhut tī khòng-iá, khoe-lâu chhèng-chhut tī soa-bô͘.

7

Hoat-chhut-kng ê soa, beh pìⁿ-chòe chúi-tî, ta-sò ê tōe beh pìⁿ-chòe chúi-chôaⁿ; tī soaⁿ-káu tó teh-khùn ê só͘-chāi beh ū chhiⁿ-chháu lô͘-úi kap pô͘-chháu.

8

Tī-hia beh ū chı̍t tiâu kôaiⁿ ê lō͘, chit tiâu lō͘ beh chheng-chòe Sèng ê lō͘; ù-òe ê lâng bōe-tit-thang keng-kè; choan-choan beh chòe in ê lō͘-ēng; kiâⁿ-lō͘ ê lâng, sui-jiân gû-gōng, ia̍h bōe kiâⁿ-chhò.

9

Tī-hia tek-khak bô sai, béng-siù ia̍h-bô chiūⁿ chit tiâu lō͘; tī-hia lóng bô tú-tio̍h in; to̍k-to̍k tit-tio̍h sio̍k-hôe ê peh-sìⁿ tī-hia kiâⁿ.

10

Koh Iâ-hô-hoa kiù-sio̍k ê peh-sìⁿ beh tò-tńg--lâi, beh chhiùⁿ-koa lâi kàu Sek-an; tit-tio̍h éng-óan ê hoaⁿ-hí chòe bián-liû; in beh hoaⁿ-hí khòai-lo̍k, iu-būn thó͘-khùi lóng beh cháu--khì.