I-sài-a 第 6 章 - 巴克禮全羅

1

Tng Ou-se-a ông sí hit-nî, góa khòaⁿ-kìⁿ Chú chē tī kôaiⁿ-kôaiⁿ ê pó-chō, I ê i-ho̍k sûi-lo̍h móa-tiān.

2

Tī I ê téng-bīn ū se-la̍h-peng kun-sûi teh khiā; kok ū la̍k ê sı̍t, ēng nn̄g ê sı̍t jia-bīn, nn̄g ê sı̍t jia-kha, nn̄g ê sı̍t teh-pe.

3

Chit-ê chhiùⁿ, hit-ê hō, kóng, Sèng--chài, sèng--chài, sèng--chài, bān-kun ê Iâ-hô-hoa; I ê êng-kng chhiong-móa chôan-tōe.

4

Mn̂g-kheng in-ūi chhiùⁿ-hō ê siaⁿ lâi tín-tāng; tiān chiū ū ian-hûn móa-móa.

5

Hit-sî góa kóng, Góa ū chai-ē ah, góa bia̍t-bô lah; in-ūi góa sī chhùi-tûn bô chheng-khì ê lâng, koh tiàm tī chhùi-tûn bô chheng-khì ê peh-sìⁿ tiong; in-ūi góa ba̍k-chiu ū khòaⁿ-kìⁿ Ông, bān-kun ê Iâ-hô-hoa.

6

Ū chı̍t ê se-la̍h-peng pe--lâi óa góa, i ê chhiú the̍h jia̍t-jia̍t ê thòaⁿ, sī ēng hé-khîⁿ tùi tôaⁿ-téng the̍h--lâi-ê.

7

Chiong thòaⁿ hē tī góa ê chhùi, kóng, Khòaⁿ ah, chit-ê hē tī lí ê chhùi-tûn, lí ê chōe-kòa chiū tû--khì, lí ê chōe-ok chiū sià-bián.

8

Góa koh thiaⁿ-kìⁿ Chú ê siaⁿ kóng, Góa thang chhe chī-chūi ah? chī-chūi beh ūi Góan khì? Góa chiū kóng, Góa tī-chia, thang chhe góa.

9

I kóng, Lí khì kā chit ê peh-sìⁿ kóng, Lín thiaⁿ sī beh thiaⁿ, chóng-sī bōe bêng-pe̍k; khòaⁿ sī beh khòaⁿ, chóng-sī bōe hiáu--tit.

10

Hō͘ chit ê peh-sìⁿ sim tūn, hī-khang tāng, ba̍k-chiu khoeh-ba̍t; bián-tit in ēng ba̍k-chiu khòaⁿ-kìⁿ, ēng hī-khang thiaⁿ-kìⁿ, sim hiáu-ngō͘, o̍at-tò-tńg lâi tit-tio̍h i-hó.

11

Góa chiū kóng, Chú ah, che beh jōa-kú ah? I kóng, Kàu chiah ê siâⁿ pha-hng, bô lâng khiā-khí, chhù-lāi bô lâng, thó͘-tōe ke̍k-kî pha-hng;

12

koh kàu Iâ-hô-hoa chhian-sóa hiah ê lâng kàu hn̄g-hn̄g, chit ê tōe chōe-chōe pàng-hē teh.

13

Tī hit tiong-kan nā iáu chhun cha̍p-hūn ê chı̍t-hūn, ia̍h beh siū thun-bia̍t, chhin-chhiūⁿ lek-chhiū siōng-chhiū, sui-jiân chhò--khí-lâi, chóng-sī chhiū-thâu iáu lâu-teh; án-ni ū chit ê sèng ê hō͘-è, chiū-sī hit ê chhiū-thâu.