I-sài-a 第 7 章 - 巴克禮全羅

1

Ou-se-a ê sun, Iok-thán ê kiáⁿ, Iû-tāi ông A-hap-su chē-ūi ê sî, A-lân ông Lī-sìn, kap Í-sek-lia̍t ông Lī-má-lī ê kiáⁿ Pí-ka, chiūⁿ-lâi kong-kek Iâ-lō͘-sat-léng, chóng-sī kong bōe-phòa.

2

Ū lâng kā Tāi-pı̍t ê ke kóng, A-lân kap Í-hoat-liân í-keng hōe-bêng; ông ê sim kap peh-sìⁿ ê sim lóng iô-tāng, chhin-chhiūⁿ chhiū-nâ-lāi ê chhiū hō͘ hong chhe tín-tāng chı̍t-iūⁿ.

3

Iâ-hô-hoa tùi Í-sài-a kóng, Taⁿ lí kap lí ê kiáⁿ Si-a-ngá-su̍t chhut-khì kàu téng ê tî ê chúi-kau-kháu, tī phiò-pò͘ sai-hū ê chhân ê tōa-lō͘, ngiâ-chih A-hap-su;

4

tùi i kóng, Lí tio̍h kín-sīn an-chēng; bo̍h-tit in-ūi chí(**chit) nn̄g-ki chhut-ian ê hé-pé-thâu, chiū-sī A-lân ê Lī-sìn kap Lī-má-lī ê kiáⁿ, lia̍t ê siū-khì lâi kiaⁿ-hiâⁿ sit-táⁿ.

5

In-ūi A-lân kap Í-hoat-liân kap Lī-má-lī ê kiáⁿ siat pháiⁿ ê kè-bô͘ hāi lí,

6

kóng, Lán tio̍h chiūⁿ-lâi khì, kong-kek Iû-tāi, jiáu-lōan i, kong-phòa i, tī i ê tiong-kan siat-lı̍p Tha-pí-le̍k ê kiáⁿ chòe ông.

7

Chú Iâ-hô-hoa kóng, Chit ê kè-bô͘ bōe kiàn-lı̍p, ia̍h bōe sêng.

8

In-ūi Tāi-má-sek chòe A-lân ê thâu, Lī-sìn chòe Tāi-má-sek ê thâu; tī la̍k-cha̍p-gō͘ nî lāi, Í-hoat-liân tek-khak phò-hōai, tì-kàu bōe chiâⁿ chòe kok.

9

Koh Sat-má-lī-a chòe Í-hoat-liân ê thâu, Lī-má-lī ê kiáⁿ chòe Sat-má-lī-a ê thâu; siat-sú lín m̄-sìn, chiū tek-khak bōe-ōe khiā-chāi.

10

Iâ-hô-hoa koh hoan-hù A-hap-su kóng,

11

Lí tio̍h tùi Iâ-hô-hoa lí ê Siōng-tè kiû chı̍t ê tiāu-thâu; thang kiû i tī chhim-ian á-sī ke̍k-kôaiⁿ ê thiⁿ.

12

A-hap-su kóng, Góa m̄-kiû, ia̍h m̄-chhì Iâ-hô-hoa.

13

Í-sài-a kóng, Tāi-pı̍t ê ke ah, lín tio̍h thiaⁿ; lín hō͘ lâng ûi-lân, kiám sǹg-chòe sió-khóa sū, ia̍h beh hō͘ góa ê Siōng-tè ûi-lân mah?

14

In-ūi án-ni, Chú pún-sin beh hō͘ lín chı̍t ê tiāu-thâu; khòaⁿ ah, ū chāi-sek-lú beh hôai-īn siⁿ-kiáⁿ, kā i hō-miâ kiò Í-má-lōe-lī.

15

Kàu i ōe hiáu-tit pàng-sak pháiⁿ, kéng hó ê sî, i chiah beh chia̍h lin-iû kap bı̍t.

16

In-ūi tī chit ê gín-ná iáu-bē hiáu-tit pàng-sak pháiⁿ kéng hó ê tāi-seng, lí só͘ kiaⁿ ê hit nn̄g ê ông ê tōe beh tú-tio̍h pàng-sak.

17

Iâ-hô-hoa beh hō͘ hōan-lān ê jı̍t lîm-kàu lí kap lí ê peh-sìⁿ, í-kı̍p lí lāu-pē ê ke, tùi Í-hoat-liân lī-khui Iû-tāi í-lâi, bē-bat ū chit-hō ê jı̍t, chiū-sī A-su̍t ông lâi.

18

Hit-sî Iâ-hô-hoa beh chhut kháu-hō, chio Ai-kı̍p kang-hô ê gôan-thâu ê hô͘-sîn, í-kı̍p A-su̍t tōe ê phang.

19

Lóng beh pe--lâi, hioh tī pha-hng ê soaⁿ-kok, chio̍h-phāng, kap it-chhè ê chhì-phè, kap it-chhè ê chháu-tiûⁿ.

20

Hit-sî Chú beh ēng tùi Hô-gōa kò͘-chhiàⁿ ê thì-thâu-to, chiū-sī A-su̍t ông, lâi thì in ê thâu, kap kha ê mn̂g; ia̍h beh it-chīn khun in ê chhùi-chhiu.

21

Hit-sî chı̍t-lâng beh chhī chı̍t chiah gû-bú, nn̄g chiah mî-iûⁿ-bú.

22

In-ūi chhut lin chōe, i beh chia̍h lin-iû; tī kéng-lāi só͘ chhun ê lâng lóng beh chia̍h lin-iû kap bı̍t.

23

Chêng hōan-nā chai chı̍t-chheng châng ê phû-tô-chhiū, ta̍t chı̍t-chheng gûn, kàu hit-sî beh siⁿ chhì-phè kap chı̍t-lê.

24

Lâng chiūⁿ--khì hia, tio̍h tòa keng-chìⁿ, in-ūi piàn-tōe móa-móa chhì-phè kap chı̍t-lê.

25

Só͘ ū ēng ti(**tî)-thâu ku̍t ê soaⁿ-tōe, lí in-ūi kiaⁿ chhì-phè kap chı̍t-lê m̄-káⁿ chiūⁿ--khì hia, put-kò chòe pàng-gû ê só͘-chāi, chòe iûⁿ thún-ta̍h ê ūi.