I-sài-a 第 8 章 - 巴克禮全羅

1

Iâ-hô-hoa tùi góa kóng, Lí the̍h chı̍t ê tōa ê pâi, ēng lâng thong-hêng ê jī lâi siá, Lūn-khí Má-hek-jíⁿ-sa-la̍h-le̍k-hap-si-pā-su.

2

Góa beh kiò sêng-sı̍t ê kan-chèng, chiū-sī chè-si Ou-lī-a, kap Iâ-pí-lí-ka ê kiáⁿ Sat-ka-lī-a, lâi chòe kan-chèng.

3

Góa kap sian-ti-niû tâng-pâng; i hôai-īn siⁿ-kiáⁿ. Iâ-hô-hoa chiū tùi góa kóng, Kā i hō-miâ kiò Má-hek-jíⁿ-sa-la̍h-le̍k-hap-si-pā-su.

4

In-ūi chit ê eⁿ-á bōe hiáu kiò, A-pa, A-bú, ê tāi-seng, Tāi-má-sek ê châi-pó kap Sat-má-lī-a siū-chhiúⁿ ê mı̍h lóng poaⁿ tī A-su̍t ông ê bīn-chêng.

5

Iâ-hô-hoa koh tùi góa kóng,

6

In-ūi chit ê peh-sìⁿ iàm-chiān Se-lô-a bān-bān lâu ê chúi, hoaⁿ-hí Lī-sìn kap Lī-má-lī ê kiáⁿ;

7

só͘-í Chú beh hō͘ hit ê Hô chin-tōa chin-hiông ê chúi lâu--lâi im--in, chiū-sī A-su̍t ông, kap i it-chhè ê êng-kng, beh pôaⁿ-kè i it-chhè ê chúi-kau, tiòng-móa i chiah ê hōaⁿ;

8

beh chhiong-jı̍p Iû-tāi, tiòng-móa sì-kòe im, kôaiⁿ kàu ām-kún; Í-má-lōe-lī ah, i ê sı̍t thí-khui, piàn-móa lí ê tōe.

9

Lia̍t-kok ê peh-sìⁿ ah, chhut-chāi lín soan-hoa, kàu-bé tek-khak phò-hōai; hn̄g ê lâng ah, tio̍h àⁿ hī-khang lâi thiaⁿ; chhut-chāi lín hâ-io, tek-khak beh phò-hōai, chhut-chāi lín hâ-io, tek-khak beh phò-hōai.

10

Chhut-chāi lín siat kè-bô͘, tek-khak kui khang-khang; chhut-chāi lín gī-lūn, tek-khak bōe sêng-lı̍p; in-ūi Siōng-tè kap góan tī-teh.

11

Iâ-hô-hoa ēng tōa kôan-lêng ê chhiú chí-sī góa ēng ōe kéng-kài góa, kóng, M̄-thang kiâⁿ chit ê peh-sìⁿ só͘ kiâⁿ ê lō͘, tùi góa kóng,

12

Chit ê peh-sìⁿ só͘ kóng kiò-chòe kiat-tóng ê, lín bo̍h-tit kóng chòe kiat-tóng; in só͘ kiaⁿ--ê, lín bo̍h-tit kiaⁿ, ia̍h bo̍h-tit lún.

13

To̍k-to̍k tio̍h chun bān-kun ê Iâ-hô-hoa chòe-sèng; I sī lín só͘ tio̍h kiaⁿ--ê, só͘ tio̍h lún--ê.

14

I beh chòe sèng-só͘; ia̍h beh ǹg Í-sek-lia̍t nn̄g-ke chòe po̍ah-tó lâng ê chio̍h, that-gāi lâng ê chio̍h-pôaⁿ; ǹg Iâ-lō͘-sat-léng khiā-khí ê peh-sìⁿ, chòe o̍ah-tauh kap lô-bāng.

15

Chōe-chōe lâng beh tī hit téng-bīn tio̍h-tak po̍ah-tó, po̍ah-kàu chhùi-chhùi, ia̍h hō͘ i bāng-tio̍h lia̍h-tio̍h.

16

Lí tio̍h chiong kan-chèng ê ōe kńg ân-ân, hong-ba̍t lu̍t-hoat tī Góa ha̍k-seng ê tiong-kan.

17

Góa beh thèng-hāu Iâ-hô-hoa, chiū-sī ka-kī ng I ê bīn tī Ngá-kok ê ke--ê, góa ia̍h beh ǹg-bāng I.

18

Khòaⁿ ah, góa kap Iâ-hô-hoa só͘ hō͘ góa ê kiáⁿ, lóng sī bān-kun ê Iâ-hô-hoa, tiàm tī Sek-an soaⁿ-ê, só͘ ēng chòe tiāu-thâu kì-hō, tī Í-sek-lia̍t tiong--ê.

19

Nā ū lâng tùi lín kóng, Lín tio̍h khì mn̄g tâng-ki kap kiâⁿ siâ-su̍t--ê, in ê siaⁿ-im ki-ki kiu̍h-kiu̍h, giân-gú sòe-sòe; tio̍h ìn kóng, Peh-sìⁿ kiám m̄-tio̍h mn̄g i ê Siōng-tè mah? kiám thang ūi o̍ah-lâng khì mn̄g hiah ê sí--ê mah?

20

Lâng tio̍h chiàu lu̍t-hoat kap kan-chèng ê ōe; nā bô thàn chit ê ōe lâi kóng, chiū bōe tit-tio̍h khòaⁿ-kìⁿ chá-khí-sî ê kng.

21

In beh keng-kè chit ê tōe siū kan-khó͘ siū iau-gō; iau-gō ê sî, sim-lāi ka-kī siū-khì, chiù-chó͘ in ê ông, kap in ê Siōng-tè,

22

kia̍h-thâu khòaⁿ thiⁿ, àⁿ-lo̍h khòaⁿ tōe, bô phah-sǹg it-chīn sī kan-khó͘ o͘-àm, kap thòng-khó͘ ê o͘-àm, siū kóaⁿ tī o͘-o͘ àm-àm ê lāi-bīn.