I-sài-a 第 61 章 - 巴克禮全羅

1

Chú Iâ-hô-hoa ê Sîn lîm-kàu góa; in-ūi Iâ-hô-hoa ēng iû boah góa, hō͘ góa thôan hok-im hō͘ sòng-hiong ê lâng; chhe góa i-hó siong-sim ê lâng, pò-kò siū-lia̍h-ê tit-tio̍h tháu-pàng, siū-koaiⁿ-ê chhut kaⁿ-lô;

2

pò-kò Iâ-hô-hoa hoaⁿ-hí ê nî, kap lán ê Siōng-tè pò-siû ê jı̍t; an-ùi it-chhè pi-ai ê lâng;

3

tī Sek-an pi-ai ê lâng ēng hoe-bō siúⁿ-sù i, lâi thòe hé-hu, hoaⁿ-hí ê iû lâi thòe pi-ai, o-ló ê saⁿ lâi thòe iu-chhiû ê sim, hō͘ in chheng-chòe kong-gī ê chhiū, chiū-sī Iâ-hô-hoa só͘ chai--ê, lâi hián-bêng ka-kī ê êng-kng.

4

In beh khí-chō kó͘-chá pha-hng ê só͘-chāi, kiàn-lı̍p chá-chêng léng-chēng ê ūi-chhù, iā beh siu-lí pha-hng ê siâⁿ, chiū-sī tāi-tāi léng-chēng ê ūi-chhù.

5

Gōa-bīn lâng beh khí-lâi kò͘ lín ê iûⁿ-kûn, gōa-pang lâng beh kā lín choh-chhân, chiàu-kò͘ lín ê phû-tô-hn̂g.

6

Chóng-sī lín beh chheng-chòe Iâ-hô-hoa ê chè-si; lâng beh chheng lín chòe lán ê Siōng-tè ê chhe-ēng; lín beh chia̍h-ēng lia̍t-kok ê châi-bu̍t, tit-tio̍h in ê êng-kng lâi khoa-kháu.

7

Lín beh tit-tio̍h ka-pē ê hok-khì lâi thòe só͘ siū ê kiàn-siàu; in beh hoaⁿ-hí tī in só͘ tit-tio̍h ê hūn-gia̍h, lâi thòe só͘ siū ê lêng-jio̍k; só͘-í tī kéng-lāi beh tit-tio̍h ka-pē ê sán-gia̍p, éng-óan ê khòai-lo̍k beh kui hō͘ in.

8

In-ūi Góa Iâ-hô-hoa ài kong-pêng, òan-hūn put-gī ê chhiúⁿ-kiap; Góa beh chiàu sêng-sı̍t pò-èng in, iā beh kap in lı̍p éng-óan ê iok.

9

In ê hō͘-è beh tī lia̍t-kok-tiong hō͘ lâng bat i, in ê kiáⁿ-sun tī chèng peh-sìⁿ-tiong iā sī án-ni; kìⁿ-nā khòaⁿ-kìⁿ in--ê beh jīn in, sī Iâ-hô-hoa sù-hok ê hō͘-è.

10

Góa in-ūi Iâ-hô-hoa tōa-tōa hoaⁿ-hí, góa ê sim-sîn in-ūi góa ê Siōng-tè chiū khòai-lo̍k; in-ūi I ēng chín-kiù chòe saⁿ kā góa chhēng, ēng kong-gī chòe phàu kā góa moa, chhin-chhiūⁿ sin-kiáⁿ-sài tì súi ê bō, koh chhin-chhiūⁿ sin-niû chng-thāⁿ pó-mı̍h.

11

In-ūi thó͘-tōe cháiⁿ-iūⁿ hō͘ pah-hāng ê gō͘-kak puh-gê, hn̂g cháiⁿ-iūⁿ hō͘ só͘-chèng--ê hoat-siⁿ, Chú Iâ-hô-hoa iā beh án-ni hō͘ kong-gī kap o-ló hoat-siⁿ tī bān-kok ê bīn-chêng.