I-sài-a 第 62 章 - 巴克禮全羅

1

Góa in-ūi Sek-an ê iân-kò͘ tek-khak bô chēng-chēng, in-ūi Iâ-lō͘-sat-léng ê iân-kò͘ tek-khak bô hioh-khùn, tı̍t-kàu i ê kong-gī chhin-chhiūⁿ kng teh hoat-chhut, i ê chín-kiù chhin-chhiūⁿ teng teh to̍h.

2

Lia̍t-kok beh khòaⁿ lí ê kong-gī, lia̍t-ông beh khòaⁿ lí ê êng-kng; lí beh tit-tio̍h chheng-ho͘ sin ê miâ, chiū-sī Iâ-hô-hoa chhin-chhùi só͘ chheng-ho͘--ê.

3

Lí beh tī Iâ-hô-hoa ê chhiú-tiong chòe súi ê ông-bō, tī lí ê Siōng-tè ê chhiú-chiúⁿ chòe bián-liû.

4

Lí bô koh chheng-chòe Siū-khì-sak--ê, lí ê tōe iā bô koh chheng-chòe Pha-hng--ê; lí beh chheng-chòe Góa só͘ hoaⁿ-hí--ê, lí ê tōe iā beh chheng-chòe Ū tiōng-hu--ê; in-ūi Iâ-hô-hoa hoaⁿ-hí lí, lí ê tōe iā beh chòe ū tiōng-hu--ê.

5

In-ūi chhin-chhiūⁿ siàu-liân lâng chhōa chāi-sek-lú, lí ê peh-sìⁿ iā beh án-ni chhōa lí; chhin-chhiūⁿ sin-kiáⁿ-sài hoaⁿ-hí sin-niû, lí ê Siōng-tè iā beh án-ni hoaⁿ-hí lí.

6

Iâ-lō͘-sat-léng ah, Góa tī lí ê siâⁿ-téng siat-lı̍p siú-bāng-ê, in thong-jı̍t thong-mî bô chēng-chēng; khún-kiû Iâ-hô-hoa ê,

7

lín m̄-thang hioh-khùn, iā m̄-thang hō͘ I hioh-khùn, tı̍t-kàu I kiàn-lı̍p Iâ-lō͘-sat-léng, hō͘ Iâ-lō͘-sat-léng tī tōe-chiūⁿ chiâⁿ-chòe thang o-ló--ê.

8

Iâ-hô-hoa kí ka-kī ê chiàⁿ-chhiú kap tōa kôan-lêng ê chhiú-kut chiù-chōa kóng, Góa tek-khak bô koh chiong lí ê gō͘-kak hō͘ lí ê tùi-te̍k chòe chia̍h-mı̍h, gōa-pang lâng iā bô koh lim lí só͘ tio̍h-bôa lâi tit-tio̍h ê sin-chiú;

9

to̍k-to̍k hiah ê siu-koah--ê beh chia̍h i, lâi o-ló Iâ-hô-hoa; hiah ê siu-khioh--ê beh tī Góa sèng-só͘ ê īⁿ-lāi lim i.

10

Lín tio̍h tùi siâⁿ-mn̂g keng-kè, pī-pān peh-sìⁿ ê lō͘; thūn-kôaiⁿ thūn-kôaiⁿ tōa-lō͘; tû--khì chio̍h-thâu; ūi-tio̍h lia̍t-kok khiā tōa-kî.

11

Khòaⁿ ah, Iâ-hô-hoa bat thôan-pò kàu tōe-ke̍k, lín tio̍h kā Sek-an ê peh-sìⁿ kóng, Khòaⁿ ah, lí ê chín-kiù lâi lah; khòaⁿ ah, I ê siúⁿ-sù tī I hia, I ê pò-tap tī I ê bīn-chêng.

12

Lâng beh chheng in chòe Sèng ê peh-sìⁿ, Iâ-hô-hoa só͘ sio̍k-hôe ê; lí iā beh chheng-chòe Chhē--tio̍h--ê, Bô siū-pàng-sak ê siâⁿ.