Iâ-lī-bí 第 23 章 - 巴克禮全羅

1

Iâ-hô-hoa kóng, Bo̍k-chiá chân-hāi Góa ê chháu-tiûⁿ ê iûⁿ, hō͘ i sì-sòaⁿ; in ū chai-ē ah.

2

Só͘-í Í-sek-lia̍t ê Siōng-tè Iâ-hô-hoa chek-pī hiah-ê iúⁿ-chhī Góa ê peh-sìⁿ ê bo̍k-chiá, án-ni kóng, Lín phah-sòaⁿ Góa ê iûⁿ-kûn, lâi kóaⁿ in khì, bô khòaⁿ-kò͘ in; khòaⁿ ah, Góa beh chiàu lín só͘ kiâⁿ ê pháiⁿ lâi pān lín; che sī Iâ-hô-hoa kóng--ê.

3

Góa beh chū-chı̍p Góa ê iûⁿ-kûn só͘ chhun--ê, tùi Góa só͘ kóaⁿ in kàu ê ta̍k-kok; chhōa in koh tò-lâi in ê tiâu, hō͘ in siⁿ-thòaⁿ chōe-chōe.

4

Góa beh siat-lı̍p bo̍k-chiá tī-lí in, iúⁿ-chhī in; hō͘ in bô koh kiaⁿ-hiâⁿ gông-ngia̍h, ia̍h bô kiám-chió; che sī Iâ-hô-hoa kóng--ê.

5

Iâ-hô-hoa kóng, Jı̍t-chí beh kàu, Góa beh kā Tāi-pı̍t heng-khí gī ê Ki; I beh chòe ông lâi tī-lí; kiâⁿ tāi-chì ū tì-hūi, tī tōe-chiūⁿ kiâⁿ kong-pêng kap kong-gī.

6

Tng I ê jı̍t, Iû-tāi beh tit-tio̍h kiù; Í-sek-lia̍t beh an-jiân khiā-khí; I ê miâ beh chheng-chòe Iâ-hô-hoa lán ê gī.

7

Iâ-hô-hoa kóng, Khòaⁿ ah, jı̍t-chí beh kàu, lâng kí Iâ-hô-hoa ê éng-o̍ah lâi chiù-chōa, bô beh kóng, I sī chhōa Í-sek-lia̍t ê hō͘-è tùi Ai-kı̍p tōe chiūⁿ-lâi--ê.

8

In kí Iâ-hô-hoa ê éng-o̍ah lâi chiù-chōa, sī beh kóng, I tòa Í-sek-lia̍t ê hō͘-è chhōa in tùi pak-hng ê tōe, ia̍h tùi kìⁿ-nā Góa só͘ kóaⁿ in kàu ê tōe chiūⁿ--lâi; in beh khiā-khí tī pún só͘-chāi.

9

Lūn-kàu hiah ê sian-ti. Góa ê sim tī góa ê lāi-bīn iu-siong; góa ê kut lóng gī-gī-chhoah; ūi-tio̍h Iâ-hô-hoa kap I sèng ê ōe, góa chhin-chhiūⁿ chiú-chùi ê lâng, chhin-chhiūⁿ hō͘ chiú só͘ khah-iâⁿ ê lâng.

10

In-ūi tōe-hng móa-móa kiâⁿ îm-lōan ê lâng; koh in-ūi tú-tio̍h chiù-chó͘, tōe chiū pi-ai; khòng-iá ê chháu-tiûⁿ lóng ko͘-tâ; in só͘ kiâⁿ ê lō͘, chiū-sī pháiⁿ; in ê sè-le̍k bô chèng-tı̍t.

11

Liân sian-ti kap chè-si, to sī siat-to̍k--ê; chiū tī Góa ê chhù-lāi, Góa ia̍h khòaⁿ-kìⁿ in ê pháiⁿ; che sī Iâ-hô-hoa kóng--ê.

12

In-ūi án-ni, in ê lō͘ beh chhin-chhiūⁿ o͘-àm-tiong ku̍t-ku̍t ê tōe; in beh tú-tio̍h kóaⁿ-tio̍k, tī-hia po̍ah-tó; tng pān-lí in ê nî, Góa beh hō͘ chai-ē kàu tī in; che sī Iâ-hô-hoa kóng--ê.

13

Tī Sat-má-lī-a ê sian-ti, Góa í-keng khòaⁿ-kìⁿ in ê gû-gōng; in thok Pa-le̍k lâi chhàm-gú, hō͘ Góa ê peh-sìⁿ Í-sek-lia̍t kiâⁿ chha-lō͘.

14

Tī Iâ-lō͘-sat-léng ê sian-ti, Góa í-keng khòaⁿ-kìⁿ khó-ò͘ⁿ ê sū; in kiâⁿ kan-îm, chòe sū pe̍h-chha̍t; koh chō͘ pháiⁿ lâng ê chhiú ná ū la̍t; tì-kàu bô lâng hôe-thâu lī-khui i ê pháiⁿ; in tī Góa ê bīn-chêng, lóng chhin-chhiūⁿ Só͘-to-má; khiā-khí tī-hia ê peh-sìⁿ lóng chhin-chhiūⁿ Gô-mô͘-la̍h.

15

Só͘-í bān-kun ê Iâ-hô-hoa lūn-kàu chiah ê sian-ti, ū án-ni kóng; Khòaⁿ ah, Góa beh ēng in-tîn hō͘ in chia̍h, koh ēng khó͘ ê chúi hō͘ in lim; in-ūi siat-to̍k ê sū chhut tī Iâ-lō͘-sat-léng ê sian-ti, liû-hêng piàn-tōe.

16

Bān-kun ê Iâ-hô-hoa án-ni kóng, Chiah ê sian-ti tùi lín chhàm-gú--ê, lín bo̍h-tit thiaⁿ in ê ōe; in ēng hu-ké kà-sī lín; só͘ kóng ê īⁿ-siōng sī chhut tī in ê sim; m̄-sī chhut tī Iâ-hô-hoa ê chhùi.

17

In siông-siông tùi biáu-sī Góa ê lâng kóng, Iâ-hô-hoa kóng lín beh hióng-siū pêng-an; koh tùi it-chhè chiàu in sim ê kong-ngī lâi kiâⁿ ê lâng kóng, Tek-khak bô ū chai-ē lîm-kàu lín.

18

Chī-chūi kap Iâ-hô-hoa khè-ha̍p, tit-tio̍h thiaⁿ I ê ōe lâi hiáu-ngō͘ ah?

19

Chī-chūi chù-ì thiaⁿ I ê ōe ah? Khòaⁿ ah, Iâ-hô-hoa ê siū-khì chhin-chhiūⁿ tōa hong hoat-chhut; chiū-sī chin thàu ê kńg-lê-hong, beh tńg-se̍h lâi kong-kek pháiⁿ-lâng ê thâu-khak.

20

Iâ-hô-hoa ê sim só͘ gí-tiāⁿ--ê, iáu-bē chòe, iáu-bē chiâⁿ; I ê siū-khì tek-khak bô tò-tńg, jı̍t-āu lín beh bêng-pe̍k thàu-thiat.

21

Hiah ê sian-ti, Góa bô chhe in, in ka-kī cháu; Góa bô tùi in kóng, in ka-kī soan-thôan.

22

In nā kap Góa khè-ha̍p, chiū tek-khak hō͘ Góa ê peh-sìⁿ thiaⁿ Góa ê ōe; hō͘ in hôe-thâu lī-khui in ê pháiⁿ-lō͘, kap in só͘ kiâⁿ ê pháiⁿ.

23

Iâ-hô-hoa kóng, Góa kiám chòe kūn ê Siōng-tè, bô chòe hn̄g ê Siōng-tè mah?

24

Iâ-hô-hoa kóng, Lâng kiám ōe bih tī ún-ba̍t ê só͘-chāi, hō͘ Góa khòaⁿ i bōe tio̍h mah? Iâ-hô-hoa kóng, Góa kiám bô chhiong-móa tī thiⁿ-tōe mah?

25

Góa í-keng thiaⁿ-kìⁿ hiah ê sian-ti só͘ kóng-ê, chiū-sī thok Góa ê miâ soan-thôan pe̍h-chha̍t; in kóng, Góa ū bāng-kìⁿ, góa ū bāng-kìⁿ.

26

Soan-thôan pe̍h-chha̍t ê sian-ti, chiū-sī soan-thôan in ê sim ê khúi-chà; in chûn chit-hō ê sim, beh kàu tī-sî ah?

27

In ta̍k-lâng chiong só͘ bāng--ê saⁿ-kap kóng-khí; siūⁿ beh hō͘ Góa ê peh-sìⁿ bōe-kì-tit Góa ê miâ; chhin-chhiūⁿ in ê lia̍t-chó͘ in-ūi Pa-le̍k, lâi bōe-kì-tit Góa ê miâ chı̍t-iūⁿ.

28

Sian-ti nā ū bāng-kìⁿ thang kóng-khí i ê bāng; tit-tio̍h Góa ê ōe--ê, tio̍h ēng sêng-sı̍t thôan Góa ê ōe; chho͘-khng kap be̍h thái ōe pí-tit? Che sī Iâ-hô-hoa kóng--ê.

29

Iâ-hô-hoa kóng, Góa ê ōe kiám m̄-sī chhin-chhiūⁿ hé, koh chhin-chhiūⁿ ōe phah-phòa chio̍h-pôaⁿ ê tōa-thûi mah?

30

Iâ-hô-hoa kóng, Khòaⁿ ah, hiah ê sian-ti tùi i ê tâng-phōaⁿ thau-the̍h Góa ê ōe--ê, Góa kong-kek--in.

31

Iâ-hô-hoa kóng, Hiah ê sian-ti ēng chhùi-chı̍h kóng, Che sī Iâ-hô-hoa kóng--ê; Góa kong-kek in.

32

Iâ-hô-hoa kóng, Khòaⁿ ah, hiah-ê ēng ké ê bāng lâi chòe sian-ti--ê; in kóng-khí in ê bāng; ia̍h ēng in ê pe̍h-chha̍t, kap in ê hong-hàm, hō͘ Góa ê peh-sìⁿ kiâⁿ chha-lō͘; Góa kong-kek in; in-ūi Góa bô chhe in, ia̍h bô bēng-lēng in, in lóng bô lī-ek chit ê peh-sìⁿ; che sī Iâ-hô-hoa kóng--ê.

33

Nā chit ê peh-sìⁿ, á-sī sian-ti, á-sī chè-si, mn̄g lí kóng, Iâ-hô-hoa ū sím-mı̍h tāng-tàⁿ ê be̍k-sī? lí chiū tio̍h kā in kóng, Sím-mı̍h tāng-tàⁿ ê be̍k-sī ah! Iâ-hô-hoa kóng, Góa beh khì-sak lín, chiū-sī.

34

Kìⁿ-nā sian-ti, á-sī chè-si, á-sī peh-sìⁿ, kóng, Iâ-hô-hoa tāng-tàⁿ ê be̍k-sī--ê; hit-hō lâng, Góa beh hêng-ho̍at i kap i ê ke.

35

Lín ta̍k-lâng tùi i ê chhù-piⁿ, ta̍k-lâng tùi i ê hiaⁿ-tī, tio̍h án-ni kóng, Iâ-hô-hoa ū ìn sím-mı̍h? Iâ-hô-hoa ū kóng sím-mı̍h?

36

Iâ-hô-hoa tāng-tàⁿ ê be̍k-sī, chit-kù lín m̄-thang koh kóng; in-ūi ta̍k-lâng só͘ kóng ê ōe, beh chòe in pún-sin ê tāng-tàⁿ; in-ūi lín chiong éng-o̍ah ê Siōng-tè, bān-kun ê Iâ-hô-hoa, lán ê Siōng-tè ê ōe kóe hō͘ i chho̍ah--khì.

37

Lí tio̍h tùi sian-ti án-ni kóng, Iâ-hô-hoa ìn lí sím-mı̍h? Iâ-hô-hoa kóng sím-mı̍h?

38

Lín nā kóng, Iâ-hô-hoa tāng-tàⁿ ê be̍k-sī, Iâ-hô-hoa chiū án-ni kóng, Góa chhe lâng kàu lín hia, kā lín kóng, M̄-thang kóng Iâ-hô-hoa tāng-tàⁿ ê be̍k-sī; lín iáu teh kóng chit-kù Iâ-hô-hoa tāng-tàⁿ ê be̍k-sī;

39

só͘-í Góa beh chôan-jiân bōe-kì-tit lín, chiong lín kap Góa só͘ siúⁿ-sù lín, í-kı̍p lín ê lia̍t-chó͘ ê siâⁿ, tùi Góa ê bīn-chêng khì-sak.

40

Koh beh hō͘ éng-óan ê lêng-jio̍k, kap kú-tn̂g ê kiàn-siàu, lîm-kàu lín; kú-tn̂g bô bōe-kì--tit.