Iâ-lī-bí 第 24 章 - 巴克禮全羅

1

Pa-pí-lûn ông Nî-pò͘-kah-nî-sat chiong Iû-tāi ông Iok-ngá-kèng ê kiáⁿ Iâ-ko-nî-ngá, kap Iû-tāi ê kùi-cho̍k, í-kı̍p kang-chhiūⁿ, thih-chhiūⁿ, tùi Iâ-lō͘-sat-léng lia̍h--khì tòa kàu Pa-pí-lûn. Chit ê sū liáu-āu, Iâ-hô-hoa kí hō͘ góa khòaⁿ; ū nn̄g kheng ê bû-hoa-kó, hē tī Iâ-hô-hoa ê tiān-chêng.

2

Chı̍t khia kheng tóe siōng-hó ê bû-hoa-kó, chhin-chhiūⁿ khí-thâu se̍k ê bû-hoa-kó; chı̍t khia kheng tóe chin-pháiⁿ ê bû-hoa-kó, bōe-chia̍h--tit, in-ūi chin-pháiⁿ.

3

Iâ-hô-hoa chiū kā góa kóng, Iâ-lī-bí ah, lí khòaⁿ-kìⁿ sím-mı̍h? Góa ìn kóng, Bû-hoa-kó; hó--ê chin-hó, pháiⁿ--ê chin-pháiⁿ, bōe-chia̍h--tit, in-ūi chin-pháiⁿ.

4

Iâ-hô-hoa ê ōe koh lîm-kàu góa kóng,

5

Iâ-hô-hoa Í-sek-lia̍t ê Siōng-tè án-ni kóng, Siū lia̍h--khì ê Iû-tāi lâng, chiū-sī Góa chhe in lī-khui chit só͘-chāi kàu Ka-le̍k-tí lâng ê tōe--ê; Góa beh khòaⁿ in chhin-chhiūⁿ chiah ê hó ê bû-hoa-kó; hō͘ in tit-tio̍h hok-khì.

6

Góa beh kòan-kò͘ in, hō͘ in tit-tio̍h hok-khì; chhōa in tò-lâi chit só͘-chāi; Góa ia̍h beh kiàn-lı̍p in, bô koh húi-hōai in; chai-pôe in, bô kā i pu̍ih--khí-lâi.

7

Góa beh hō͘ in ū hit-hō sim, ōe bat Góa; chai Góa sī Iâ-hô-hoa; in beh chòe Góa ê peh-sìⁿ, Góa beh chòe in ê Siōng-tè; in-ūi in beh chı̍t-sim kui-ǹg Góa.

8

Iâ-hô-hoa án-ni kóng, Iû-tāi ông Se-tí-ka, kap i chiah ê kùi-cho̍k, kap Iâ-lō͘-sat-léng só͘ chhun, iáu lâu tī chit só͘-chāi ê peh-sìⁿ, í-kı̍p khiā-khí tī Ai-kı̍p tōe--ê; Góa khòaⁿ in chhin-chhiūⁿ chiah ê pháiⁿ ê bû-hoa-kó, bōe-chia̍h--tit, in-ūi chin pháiⁿ.

9

Góa beh chiong in kau-chhut, hō͘ in liû-lo̍h tī thiⁿ-ē bān-kok, tú-tio̍h kan-khó͘; ia̍h tī Góa kóaⁿ in kàu ê ta̍k só͘-chāi, chiâⁿ-chòe lêng-jio̍k, chòe ōe-pìⁿ, chòe ki-chhì, chòe chiù-chó͘.

10

Góa beh ēng to-kiàm, ēng ki-hng, ēng un-e̍k, kàu in tiong-kan; tı̍t-kàu in siū bia̍t tī Góa só͘ siúⁿ-sù in kap in lia̍t-chó͘ ê tōe.