Iâ-lī-bí 第 41 章 - 巴克禮全羅

1

Chhit-ge̍h-kan, Í-lī-sa-má ê sun, Nî-thàm-ngá ê kiáⁿ, Í-sı̍t-má-lī, i sī ông-chhin, ia̍h sī ông ê tāi-sîn, chhōa cha̍p-lâng lâi Bí-su-pa, kìⁿ A-hi-kam ê kiáⁿ Ki-tāi-lī; in tī Bí-su-pa saⁿ-kap chia̍h.

2

Nî-thàm-ngá ê kiáⁿ Í-sı̍t-má-lī, í-kı̍p kap i lâi ê hit cha̍p-lâng, khí-lâi, ēng to thâi-sí Sa-hoan ê sun, A-hi-kam ê kiáⁿ, Ki-tāi-lī, chiū-sī Pa-pí-lûn só͘ lı̍p lâi kóan-hat chit ê tōe--ê.

3

Í-sı̍t-má-lī koh thâi-sí tī Bí-su-pa kui-óa Ki-tāi-lī lóng-chóng ê Iû-tāi lâng; í-kı̍p tī-hia só͘ tú-tio̍h Ka-le̍k-tí ê kun-peng.

4

I thâi-sí Ki-tāi-lī liáu-āu, tē-jī-jı̍t iáu bô lâng chai;

5

hit-tia̍p ū poeh-cha̍p lâng tùi Sī-kiàm, tùi Sī-lô, tùi Sat-má-lī-a lâi; thì chhùi-chhiu, thiah-lı̍h saⁿ, ka-kī koah sin-khu, chhiú the̍h lé-mı̍h kap jú-hiuⁿ, beh tòa i kàu Iâ-hô-hoa ê chhù.

6

Nî-thàm-ngá ê kiáⁿ, Í-sı̍t-má-lī, tùi Bí-su-pa chhut-lâi ngiâ-chih in; ná-kiâⁿ ná-khàu; kàu tú-tio̍h in, chiū kā in kóng, Lín lâi khì kìⁿ A-hi-kam ê kiáⁿ Ki-tāi-lī.

7

In kàu siâⁿ-tiong, Nî-thàm-ngá ê kiáⁿ Í-sı̍t-má-lī, kap tè i ê lâng, chiū thâi-sí in, hiat in tī ta-chíⁿ.

8

In tiong-kan ū cha̍p-lâng tùi Í-sı̍t-má-lī kóng, Bo̍h-tit thâi-sí góan; in-ūi góan ū chōe-chōe sió-be̍h, tōa-be̍h, iû, bı̍t, khǹg tī chhân--nih; i chiū thêng-chhiú, bô thâi in tī in ê hiaⁿ-tī-tiong.

9

Í-sı̍t-má-lī thâi chiah ê lâng, óa-kūn Ki-tāi-lī hia, chiong in ê sin-si hiat tī chíⁿ--nih; chit ê chíⁿ sī chiông-chêng A-sat ông in-ūi kiaⁿ Í-sek-lia̍t ông Pa-sa ê iân-kò͘ só͘ khui--ê; Nî-thàm-ngá ê kiáⁿ Í-sı̍t-má-lī chiong só͘ thâi ê sin-si thūn-móa--i.

10

Í-sı̍t-má-lī lia̍h Bí-su-pa só͘ chhun ê peh-sìⁿ, chiū-sī ông ê chèng cha-bó͘-kiáⁿ, í-kı̍p iáu tòa tī Bí-su-pa ê peh-sìⁿ, chiū-sī sī-ōe-tiúⁿ Nî-pò͘-sat-la̍h-tàn só͘ kau-tài A-hi-kam ê kiáⁿ Ki-tāi-lī--ê. Nî-thàm-ngá ê kiáⁿ Í-sı̍t-má-lī lia̍h i khì, beh kè--khì A-bûn cho̍k hia.

11

Ka-lī-a ê kiáⁿ Iok-hap-lân, í-kı̍p kap i tī-teh ê chèng kun-tiúⁿ, thiaⁿ-kìⁿ Nî-thàm-ngá ê kiáⁿ Í-sı̍t-má-lī só͘ kiâⁿ it-chhè ê pháiⁿ,

12

chiū chhōa chèng-lâng chìn-chêng khì, beh kap Nî-thàm-ngá ê kiáⁿ Í-sı̍t-má-lī kau-chiàn; tī Ki-piàn ê tōa-chúi-piⁿ chhē--tio̍h-ê.

13

Í-sı̍t-má-lī só͘ tòa--khì hiah ê peh-sìⁿ khòaⁿ-khì Ka-lī-a ê kiáⁿ Iok-hap-lân, í-kı̍p kap i lâi ê chèng kun-tiúⁿ, chiū lóng hoaⁿ-hí.

14

Tùi án-ni Í-sı̍t-má-lī tùi Bí-su-pa só͘ lia̍h-khì ê chèng-peh-sìⁿ lóng o̍at-tńg lâi kui Ka-lī-a ê kiáⁿ Iok-hap-lân.

15

Nî-thàm-ngá ê kiáⁿ Í-sı̍t-má-lī, kap poeh ê lâng thoat-lī Iok-hap-lân ê chhiú, cháu-khì A-bûn cho̍k hia.

16

Āu-lâi Ka-lī-a ê kiáⁿ Iok-hap-lân, kap tè--i ê chèng kun-tiúⁿ, chiong só͘ chhun ê peh-sìⁿ, chiū-sī Nî-thàm-ngá ê kiáⁿ Í-sı̍t-má-lī phah-sí A-hi-kam ê kiáⁿ Ki-tāi-lī í-āu, tùi Bí-su-pa só͘ tòa--khì ê ta-po͘-lâng, ióng-sū, hū-lú, gín-á, thài-kàm, koh sī i tùi Ki-piàn tòa--lâi-ê.

17

In chiū khí-sin kàu Pek-lī-hêng piⁿ-á Kim-hán ê kheh-tiàm thêng-hioh, siūⁿ beh khì Ai-kı̍p.

18

Che sī in-ūi Ka-le̍k-tí lâng ê iân-kò͘; in-ūi Nî-thàm-ngá ê kiáⁿ Í-sı̍t-má-lī ū thâi-sí A-hi-kam ê kiáⁿ Ki-tāi-lī, chiū-sī Pa-pí-lûn ông só͘ lı̍p lâi kóan-hat chit ê thó͘-tōe--ê, só͘-í in kiaⁿ.