Iâ-lī-bí 第 42 章 - 巴克禮全羅

1

Chèng kun-tiúⁿ kap Ka-lī-a ê kiáⁿ Iok-hap-lân, kap Hô-sa-ngá ê kiáⁿ Iâ-sat-nî-a, í-kı̍p chèng peh-sìⁿ, tùi sòe kàu tōa, lóng chìn-chêng lâi.

2

Tùi sian-ti Iâ-lī-bí kóng, Kiû lí chún góan tī lí ê bīn-chêng só͘ kiû, thòe góan chiah ê chhun ê lâng kî-tó Iâ-hô-hoa lí ê Siōng-tè; góan pún-jiân chin-chōe, taⁿ só͘-chhun-ê chin-chió, che sī lí chhin-ba̍k khòaⁿ-kìⁿ--ê.

3

Gōan Iâ-hô-hoa lí ê Siōng-tè chí-sī góan só͘ tio̍h kiâⁿ ê lō͘, só͘ tio̍h chòe ê sū.

4

Sian-ti Iâ-lī-bí kā in kóng, Góa í-keng thiaⁿ-kìⁿ; hó, góa beh chiàu lín ê ōe, kî-tó Iâ-hô-hoa lín ê Siōng-tè; bô-lūn Iâ-hô-hoa ìn lín sím-mı̍h, góa tek-khak lóng beh kā lín kóng, bô tùi lín khǹg-ba̍t chı̍t-kù.

5

Tùi án-ni in kā Iâ-lī-bí kóng, Góan nā bô chiàu Iâ-hô-hoa lí ê Siōng-tè chhe lí lâi kóng it-chhè ê ōe khì kiâⁿ, chiū gōan Iâ-hô-hoa tī lí góan ê tiong-kan chòe chin-sı̍t tiong-sìn ê kan-chèng.

6

Góan chit-sî chhiáⁿ lí kàu Iâ-hô-hoa góan ê Siōng-tè ê bīn-chêng; I só͘ kóng--ê, bô lūn sī hó sī pháiⁿ, góan lóng beh thiaⁿ-thàn I ê ōe; góan thiaⁿ-thàn Iâ-hô-hoa góan ê Siōng-tè ê ōe, chiū thang tit-tio̍h heng-thong.

7

Kè cha̍p-jı̍t, ū Iâ-hô-hoa ê ōe lîm-kàu Iâ-lī-bí.

8

I chiū chiong Ka-lī-a ê kiáⁿ Iok-hap-lân, í-kı̍p kap i saⁿ-kap tī-teh ê chèng kun-tiúⁿ, kap chèng peh-sìⁿ, tùi sòe kàu tōa, lóng kiò in lâi;

9

tùi in kóng, Iâ-hô-hoa Í-sek-lia̍t ê Siōng-tè, chiū-sī lín chhe góa kàu I ê bīn-chêng lâi hiàn lín só͘ kiû--ê,

10

I án-ni kóng, Lín nā iû-gôan beh tiàm tī chit só͘-chāi, Góa chiū beh kiàn-chō lín, bô húi-hōai lín; beh chai-pôe lín, bô pu̍ih-chhut lín; in-ūi Góa ū thè-hóe Góa só͘ kàng hō͘ lín ê chai-ē.

11

Bo̍h-tit kiaⁿ lín só͘ kiaⁿ ê Pa-pí-lûn ông; Iâ-hô-hoa kóng, Bo̍h-tit kiaⁿ--i; in-ūi Góa kap lín tī-teh, beh chín-kiù lín, hō͘ lín thoat-lī i ê chhiú.

12

Góa beh lîn-bín lín, hō͘ in ia̍h lîn-bín lín; hō͘ lín tò-lâi pún só͘-chāi.

13

Siat-sú lín kóng, Góan m̄ tiàm chit só͘-chāi, án-ni chiū-sī lín m̄ thiaⁿ-thàn Iâ-hô-hoa lín ê Siōng-tè ê ōe.

14

Nā kóng, M̄--ah, góan beh jı̍p--khì Ai-kı̍p tōe; tī-hia bô khòaⁿ-kìⁿ kau-chiàn, bô thiaⁿ-kìⁿ sàu-kak ê siaⁿ, ia̍h put-tì bô thang chia̍h lâi iau-gō; góan beh tòa hia khiā-khì.

15

Taⁿ lín Iû-tāi só͘ chhun ê peh-sìⁿ ah, tio̍h thiaⁿ Iâ-hô-hoa ê ōe; bān-kun ê Iâ-hô-hoa Í-sek-lia̍t ê Siōng-tè án-ni kóng, Lín nā kèng-jiân ngī-phīⁿ beh khì Ai-kı̍p, tòa hia kià-kha,

16

chiū lín só͘ kiaⁿ ê to-kiàm beh tī-hia jip-tio̍h lín tī Ai-kı̍p tōe; koh lín só͘ kiaⁿ ê ki-hng, beh tī Ai-kı̍p tōe kā lín tè-tiâu-tiâu; lín beh sí tī-hia.

17

Kìⁿ-nā ngī-phīⁿ beh khì Ai-kı̍p, kià-kha tī-hia ê lâng, lóng beh án-ni; in beh tùi to-kiàm, tùi ki-hng, tùi un-e̍k lâi sí; kî-tiong bô chı̍t-ê lâu--teh, ia̍h bô chı̍t-ê thoat-lī Góa só͘ kàng hō͘ in ê chai-ē.

18

In-ūi bān-kun ê Iâ-hô-hoa Í-sek-lia̍t ê Siōng-tè, án-ni kóng, Góa ū cháiⁿ-iūⁿ chiong Góa ê siū-khì kap tōa siū-khì piàⁿ tī Iâ-lō͘-sat-léng khiā-khí ê peh-sìⁿ; lín khì Ai-kı̍p ê sî, Góa ia̍h beh chiàu án-ni chiong Góa ê tōa siū-khì piàⁿ tī lín ê sin-chiūⁿ; hō͘ lín chiâⁿ-chòe thang chiù-chó͘, thang gông-ngia̍h, thang lóe-mē, thang lêng-jio̍k; lín ia̍h bô koh khòaⁿ-kìⁿ chit ê só͘-chāi.

19

Lín Iû-tāi só͘ chhun ê peh-sìⁿ ah, Iâ-hô-hoa lūn-kàu lín ū kóng, Bo̍h-tit khì Ai-kı̍p; lín tio̍h khak-sı̍t chai, góa kin-á-jı̍t ū chèng-bêng khòan-kài lín lah.

20

Lín kiâⁿ chha-biū liân-lūi ka-kī; in-ūi lín chhe góa kàu Iâ-hô-hoa lín ê Siōng-tè hia, kóng, Kiû lí thòe góan kî-tó Iâ-hô-hoa, lán ê Siōng-tè; chiàu Iâ-hô-hoa lán ê Siōng-tè it-chhè só͘ kóng--ê, kā góan kóng; góan beh kiâⁿ--i.

21

Góa kin-á-jı̍t ū kā lín kóng lah; nā-sī lín ê Siōng-tè Iâ-hô-hoa ê siaⁿ, kap I chhe góa it-chhè chí-sī lín--ê, lín lóng bô chun-thàn.

22

Taⁿ lín tio̍h khak-sı̍t chai, lín tī só͘ beh khì kià-kha ê tōe, beh tùi to-kiàm, tùi ki-hng, tùi un-e̍k lâi sí.