Iâ-lī-bí 第 43 章 - 巴克禮全羅

1

Iâ-lī-bí tùi chèng peh-sìⁿ kóng bêng-pe̍k Iâ-hô-hoa in ê Siōng-tè it-chhè ê ōe, chiū-sī Iâ-hô-hoa in ê Siōng-tè chhe--i só͘ kóng it-chhè ê ōe.

2

Hô-sa-ngá ê kiáⁿ A-sat-lī-ngá, kap Ka-lī-a ê kiáⁿ Iok-hap-lân, kap it-chhè kiau-ngō͘ ê lâng, chiū tùi Iâ-lī-bí kóng, Lí kóng bô-iáⁿ ōe, Iâ-hô-hoa lán ê Siōng-tè pēng-bô chhe lí lâi kóng, Lín m̄-thang khì Ai-kı̍p, lâi kià-kha tī-hia;

3

che sī Nî-lī-a ê kiáⁿ Pa-lio̍k kiau(**kàu)-so lí hāi góan, beh chiong góan kau tī Ka-le̍k-tí lâng ê chhiú, hō͘ in thâi-sí góan, á-sī lia̍h góan kàu Pa-pí-lûn.

4

Tùi án-ni, Ka-lī-a ê kiáⁿ Iok-hap-lân, kap it-chhè kun-tiúⁿ, kap chèng peh-sìⁿ, m̄ thiaⁿ-thàn Iâ-hô-hoa ê ōe, lâi tiàm tī Iû-tāi tōe.

5

Ka-lī-a ê kiáⁿ Iok-hap-lân, kap it-chhè ê kun-tiúⁿ, chiū chiong chhun ê Iû-tāi lâng, chiū-sī tùi in siū kóaⁿ--khì hiah ê kok tò-lâi, beh kià-kha tī Iû-tāi tōe--ê,

6

put-lūn ta-po͘-lâng, hū-jîn-lâng, gín-á kap ông hiah ê cha-bó͘-kiáⁿ, kap sī-ōe-tiúⁿ Nî-pò͘-sat-la̍h-tàn só͘ lâu lâi kau-tài Sa-hoan ê sun, A-hi-kam ê kiáⁿ, Ki-tāi-lī ê chèng-lâng, kap sian-ti Iâ-lī-bí, í-kı̍p Nî-lī-a ê kiáⁿ Pa-lio̍k, lóng tòa khì Ai-kı̍p tōe, kàu Tap-pí-le̍k.

7

Che sī in-ūi in m̄ thiaⁿ-thàn Iâ-hô-hoa ê ōe.

8

Tī Tap-pí-le̍k, Iâ-hô-hoa ê ōe lîm-kàu Iâ-lī-bí kóng,

9

Lí tio̍h ēng chhiú the̍h kúi-tè tōa lia̍p chio̍h, tī Iû-tāi lâng ê bīn-chêng, khǹg tī thia̍p-chng ê he-thô͘-lāi, chiū-sī tī Tap-pí-le̍k Hoat-ló ê ông-kiong-mn̂g hia;

10

kā in kóng, Bān-kun ê Iâ-hô-hoa Í-sek-lia̍t ê Siōng-tè án-ni kóng, Khòaⁿ ah, Góa beh tiàu Góa ê lô͘-po̍k Pa-pí-lûn ông Nî-pò͘-kah-nî-sat lâi; tī só͘ khǹg ê chio̍h-thâu-téng, Góa beh an-tì i ê pó-chō, i beh tī hí(**hit) chio̍h-téng tah súi ê pò͘-pîⁿ.

11

I beh lâi kong-kek Ai-kı̍p tōe, eng-kai sí-ê chiū sí, eng-kai lia̍h-ê chiū siū-lia̍h, eng-kai hō͘ to thâi-ê chiū hō͘ to thâi.

12

Góa iā beh khí hé tī Ai-kı̍p hiah ê sîn-bêng ê biō; i beh sio i, lia̍h in khì; i beh tit-tio̍h Ai-kı̍p tōe chhin-chhiūⁿ bo̍k-chiá chhēng i ê saⁿ; tùi hia an-jiân chhut-khì.

13

I tek-khak phah-chhùi Ai-kı̍p tōe Pek-sī-be̍k tiau-khek ê thiāu, ēng hé sio Ai-kı̍p chiah ê sîn-bêng ê biō.