Iâ-lī-bí 第 44 章 - 巴克禮全羅

1

Ū ōe lîm-kàu Iâ-lī-bí, lūn-kàu it-chhè khiā-khí tī Ai-kı̍p tōe ê Iû-tāi lâng; chiū-sī khiā-khí tī Bı̍t-to̍at, Tap-pí-le̍k, Lô-hut, Pa-thek-lô kéng-lāi ê Iû-tāi lâng, kóng,

2

Bān-kun ê Iâ-hô-hoa Í-sek-lia̍t ê Siōng-tè án-ni kóng: Góa só͘ kàng-lo̍h tī Iâ-lō͘-sat-léng, kap Iû-tāi chiah ê siâⁿ it-chhè ê chai-ē, lín lóng khòaⁿ-kìⁿ; khòaⁿ ah, taⁿ in lóng pha-hng, bô lâng khiā-khí.

3

Che sī in-ūi in só͘ kiâⁿ ê pháiⁿ, in khì sio-hiuⁿ ho̍k-sāi pa̍t ê siōng-tè, chiū-sī in kap lín í-kı̍p lín ê lia̍t-chó͘ só͘ m̄-bat--ê; án-ni jiá Góa ê siū-khì.

4

Chóng-sī Góa bat chhe Góa ê chèng lô͘-po̍k sian-ti chiū-kūn lín; sī chá-chá khí-lâi chhe i, kóng, Chhiat-chhiat gōan lín m̄-thang kiâⁿ chit ê khó-ò͘ⁿ ê sū, Góa só͘ òan-hūn--ê.

5

To̍k-to̍k in bô thiaⁿ, ia̍h bô àⁿ hī-khang, bô o̍at-tńg lī-khui in ê pháiⁿ; iû-gôan sio-hiuⁿ tī pa̍t-hō ê siōng-tè.

6

In-ūi án-ni, Góa ê tōa siū-khì kap Góa ê siū-khì piàⁿ-chhut tī Iû-tāi chiah ê siâⁿ, kap Iâ-lō͘-sat-léng ê koe-chhī, chhin-chhiūⁿ hé to̍h--khí-lâi; tì-kàu in pha-hng léng-chēng; chhin-chhiūⁿ kin-á-jı̍t án-ni.

7

Taⁿ Iâ-hô-hoa bān-kun ê Siōng-tè, Í-sek-lia̍t ê Siōng-tè, án-ni kóng, Lín siáⁿ-sū kiâⁿ chit ê tōa pháiⁿ, hāi lín ka-kī; hō͘ lín ê ta-po͘-lâng, hū-jîn-lâng, gín-á, kap chia̍h-ni ê eⁿ-á, lóng tùi Iû-tāi tiong kā lín tû-khì, bô lâu chı̍t-ê? Sī in-ūi lín ēng lín ê chhiú só͘ chòe--ê kek Góa ê siū-khì;

8

tī só͘ khì kià-kha ê Ai-kı̍p tōe, sio-hiuⁿ tī pa̍t-hō ê siōng-tè, tì-kàu lín tú-tio̍h châu-bia̍t, tī thiⁿ-ē bān-kok tiong, chiâⁿ-chòe thang chiù-chó͘, thang lêng-jio̍k--ê.

9

Lí ê lia̍t-chó͘ ê pháiⁿ, Iû-tāi lia̍t-ông ê pháiⁿ, in ê hō͘-hui ê pháiⁿ, lín ka-kī ê pháiⁿ, lín ê bó͘ ê pháiⁿ, chiū-sī tī Iû-tāi tōe, Iâ-lō͘-sat-léng koe-chhī só͘ kiâⁿ--ê, lín bōe kì-tit mah?

10

In kàu-taⁿ iáu bô ka-kī khiam-pi, bô kiaⁿ-hiâⁿ, bô chun-thàn Góa tī lín ê bīn-chêng, kap lín ê lia̍t-chó͘ ê bīn-chêng, só͘ siat Góa ê hoat-tō͘, Góa ê lu̍t-lē.

11

Só͘-í bān-kun ê Iâ-hô-hoa Í-sek-lia̍t ê Siōng-tè án-ni kóng, Khòaⁿ ah, Góa beh ǹg lín pìⁿ-bīn, kàng chai-ē tì-kàu châu-bia̍t Iû-tāi ê chèng-lâng.

12

Iû-tāi só͘ chhun ê peh-sìⁿ, ngī-phīⁿ khì Ai-kı̍p tōe, beh tī-hia kià-kha--ê, Góa beh chhú lâi bia̍t--in; in beh tó tī Ai-kı̍p tōe, in beh tùi to-kiàm, tùi ki-hng, lâi bia̍t-bô, tùi sòe kàu tōa, lóng beh tùi to-kiàm, tùi ki-hng, lâi sí; in beh chiâⁿ-chòe thang chiù-chó͘, thang gông-ngia̍h, thang lóe-mē, thang lêng-jio̍k--ê.

13

In-ūi Góa beh ēng to-kiàm, ēng ki-hng, ēng un-e̍k, hêng-ho̍at khiā-khí Ai-kı̍p tōe--ê; chhin-chhiūⁿ Góa í-keng hêng-ho̍at Iâ-lō͘-sat-léng chı̍t-iūⁿ;

14

hō͘ hiah-ê khì Ai-kı̍p tōe só͘ chhun ê Iû-tāi lâng, lóng bōe-tit thoat-lī, á-sī lâu-teh, thang tò-lâi Iû-tāi tōe, chiū-sī in ê sim chin him-bō͘ tò-lâi khiā-khí ê só͘-chāi; in-ūi tit-tio̍h thoat-lī--ê ê í-gōa, bô chı̍t-ê thang tò-lâi.

15

Hiah-ê tòa tī Ai-kı̍p tōe Pa-thek-lô ê lâng, kìⁿ-nā chai in ê bó͘ bat tùi pa̍t ê siōng-tè sio-hiuⁿ--ê, kap tī piⁿ--thâu teh-khiā ê chèng hū-jîn, chū-chı̍p kui tōa-tīn, ìn Iâ-lī-bí kóng,

16

Lí hōng Iâ-hô-hoa ê miâ tùi góan só͘ kóng ê ōe, góan m̄ thiaⁿ--lí.

17

Góan koat-tòan beh chiâⁿ góan ê chhùi só͘ kóng it-chhè ê ōe, ǹg Thian-hō͘ sio-hiuⁿ, kòan-tiān, chiàu góan kap góan ê lia̍t-chó͘, góan ê kun-ông, góan ê kùi-cho̍k, tī Iû-tāi chiah ê siâⁿ, kap Iâ-lō͘-sat-léng ê koe-chhī, pêng-sò͘ só͘ kiâⁿ--ê chı̍t-iūⁿ; in-ūi hit-sî góan ê sı̍t-bu̍t chhiong-chiok, hióng-siū pêng-an; pēng-bô khòaⁿ-kìⁿ chai-ē.

18

Chóng-sī tùi góan thêng-chí bô sio-hiuⁿ, bô kòan-tiān tī Thian-hō͘, góan hóan-tńg khiàm-kheh it-chhè; koh tùi to-kiàm, tùi ki-hng lâi bia̍t-bô.

19

Góan tùi Thian-hō͘ sio-hiuⁿ kòan-tiān ê sî, góan chòe-piáⁿ lâi ho̍k-sāi i, tùi i kòan-tiān, góan tiōng-hu kiám bô hūn mah?

20

Iâ-lī-bí chiū ìn hiah ê peh-sìⁿ, chiū-sī tùi hiah ê ta-po͘ hū-jîn ēng chit ê ōe ìn--i ê peh-sìⁿ, kóng,

21

Lín kap lín ê lia̍t-chó͘, lín ê kun-ông, lín ê kùi-cho̍k, kap kok-lāi ê peh-sìⁿ, tī Iû-tāi chiah ê siâⁿ, kap Iâ-lō͘-sat-léng koe-chhī só͘ sio ê hiuⁿ, Iâ-hô-hoa kiám bô kì-tit--in, sim-lāi kiám bô siūⁿ mah?

22

Iâ-hô-hoa in-ūi lín só͘ chòe ê pháiⁿ, só͘ kiâⁿ khó-ò͘ⁿ ê sū, bōe koh lún--tit; só͘-í lín ê tōe pha-hng, chiâⁿ-chòe thang gông-ngia̍h, thang chiù-chó͘, bô lâng khiā-khí, chhin-chhiūⁿ kin-á-jı̍t chit-khóan.

23

In-ūi lín sio-hiuⁿ, ia̍h in-ūi lín tek-chōe Iâ-hô-hoa, ia̍h bô thiaⁿ Iâ-hô-hoa ê ōe, bô thàn I ê lu̍t-hoat, I ê tiâu-lē, I ê kan-chèng ê ōe, só͘-í lín tú-tio̍h chit ê chai-ē, chhin-chhiūⁿ kin-á-jı̍t chit-khóan.

24

Iâ-lī-bí koh tùi chèng peh-sìⁿ kap chèng hū-jîn-lâng kóng, Lín tī Ai-kı̍p tōe it-chhè ê Iû-tāi lâng, tio̍h thiaⁿ Iâ-hô-hoa ê ōe.

25

Bān-kun ê Iâ-hô-hoa Í-sek-lia̍t ê Siōng-tè án-ni kóng, Lín kap lín ê bó͘ bat ēng chhùi kóng, ēng chhiú chiâⁿ--i, kóng, Góan só͘ hē ê gōan, koat-tòan beh kiâⁿ--i, chiū-sī beh tùi Thian-hō͘ sio-hiuⁿ, ia̍h beh tùi i kòan-tiān; taⁿ chòe lí kian-kò͘ lí ê gōan, lâi kiâⁿ lí ê gōan.

26

Só͘-í lín tòa Ai-kı̍p tōe it-chhè ê Iû-tāi lâng, tio̍h thiaⁿ Iâ-hô-hoa ê ōe; Iâ-hô-hoa kóng, Khòaⁿ ah, Góa kí Góa ê tōa-miâ lâi chiù-chōa, tī Ai-kı̍p chôan-tōe, Góa ê miâ bô koh hō͘ Iû-tāi cho̍k chı̍t-lâng ê chhùi só͘ chheng-ho͘, kóng, Chú Iâ-hô-hoa sī éng-o̍ah.

27

Khòaⁿ ah, Góa beh tì-ì tī in, beh kàng chai-ē, bô kàng hok-khì, tī Ai-kı̍p tōe it-chhè ê Iû-tāi lâng beh tùi to-kiàm, tùi ki-hng lâi bia̍t-bô, kàu lóng liáu.

28

Thoat-lī to-kiàm, beh tùi Ai-kı̍p tōe tò-lâi Iû-tāi tōe--ê, in ê lâng-gia̍h chin-chió; hiah-ê só͘ chhun ê Iû-tāi lâng khì Ai-kı̍p tōe, beh tī-hia kià-kha-ê, beh chai chī-chūi ê ōe tit-tio̍h èng-giām, sī Góa-ê á-sī in-ê.

29

Iâ-hô-hoa kóng, Góa tī chit ê só͘-chāi beh hêng-ho̍at lín, beh ū chit ê tiāu-thâu, hō͘ lín chai Góa só͘ kóng kàng chai-ē hō͘ lín hiah ê ōe tek-khak èng-giām.

30

Iâ-hô-hoa án-ni kóng, Khòaⁿ ah, Góa beh chiong Ai-kı̍p ông Hoat-ló Ha̍p-hut-la̍h kau tī i ê tùi-te̍k ê chhiú, kap siàu-siūⁿ i ê sìⁿ-miā ê lâng ê chhiú; chhin-chhiūⁿ Góa ū chiong Iû-tāi ông Se-tí-ka kau tī i ê tùi-te̍k, chiū-sī siàu-siūⁿ i ê sìⁿ-miā ê Pa-pí-lûn ông Nî-pò͘-kah-nî-sat ê chhiú.