Iok-hān 第 5 章 - 巴克禮全羅

1

Chiah ê sū í-āu, ū Iû-thài lâng ê choeh-kî; Iâ-so͘ chiūⁿ Iâ-lō͘-sat-léng.

2

. Tī Iâ-lō͘-sat-léng, kūn Iûⁿ-mn̂g, ū tî, Hi-pek-lâi ê khiuⁿ-kháu kiò chòe Pit-sū-tāi, ū gō͘ ê léng-lông.

3

. Hit lāi-bīn ū chhiⁿ-mî ê, pái-kha ê, huih ko͘-tâ ê, chōe-chōe pīⁿ lâng tó-teh.

4

.

5

. Tī hia ū chı̍t lâng, phòa-pīⁿ saⁿ-cha̍p-poeh nî.

6

. Iâ-so͘ khòaⁿ-kìⁿ i tó-teh, chai i ê pīⁿ í-keng kú, kā i kóng, Lí ài tit-tio̍h hó mah?

7

. Phòa-pīⁿ ê lâng ìn I kóng, Chú ah, chúi tín-tāng ê sî, bô lâng thang hû góa lo̍h tî; kàu góa lâi ê sî, pa̍t lâng tāi-seng góa lo̍h-khì lah.

8

. Iâ-so͘ kā i kóng, Khí-lâi, giâ lí ê pho͘-á khì kiâⁿ.

9

. Hit lâng chek-sî hó, chiū giâ i ê pho͘-á khì kiâⁿ.

10

. Hit jı̍t sī an-hioh-jı̍t, Iû-thài lâng chiū kā tit-tio̍h i-hó ê lâng kóng, kin-á-jı̍t sī an-hioh-jı̍t, lí giâ pho͘-á sī m̄ ha̍p-gî.

11

. Nā-sī i ìn kóng, Hit-ê i-hó góa ê kā góa kóng, Giâ lí ê pho͘-á lâi kiâⁿ.

12

. In mn̄g i, kóng, Kā lí kóng, Giâ pho͘-á lâi kiâⁿ ê, sī sím-mı̍h lâng?

13

. Tit-tio̍h hó ê lâng m̄ chai I sī chī-chūi; in-ūi Iâ-so͘ í-keng khì pa̍t ūi, sī hit só͘-chāi ê lâng chōe.

14

. Āu-lâi Iâ-so͘ tī tiān-nı̍h tú-tio̍h i, chiū kā i kóng, Lí í-keng tit-tio̍h hó; bo̍h-tit koh hōan-chōe, kiaⁿ-liáu lí tú-tio̍h koh khah chhám.

15

. Hit lâng chiū khì kā Iû-thài lâng kóng, i-hó i ê chiū-sī Iâ-so͘.

16

. Só͘-í Iû-thài lâng khún-tio̍k Iâ-so͘, in-ūi I tī an-hioh-jı̍t chòe chiah ê tāi-chì.

17

. Iâ-so͘ ìn kóng, Góa ê Pē kiâⁿ tāi-chì kàu taⁿ, góa ia̍h kiâⁿ tāi-chì.

18

. Só͘-í Iû-thài lâng it-hoat beh thâi I, in-ūi I m̄ nā hōan-tio̍h an-hioh-jı̍t, koh kóng Siōng-tè chòe I ê Pē, chiong pún-sin sǹg chòe kap Siōng-tè pîⁿ.

19

. Iâ-so͘ chiū ìn kóng, Góa sı̍t-sı̍t kā lín kóng, Kiáⁿ nā m̄ sī khòaⁿ-kìⁿ Pē kiâⁿ ê, chiū ka-kī bōe kiâⁿ sím-mı̍h; in-ūi kìⁿ-nā Pē só͘ kiâⁿ ê, Kiáⁿ ia̍h chiàu án-ni kiâⁿ.

20

. In-ūi Pē thiàⁿ Kiáⁿ, chiong pún-sin só͘ kiâⁿ ê lóng-chóng hō͘ I khòaⁿ; ia̍h beh chiong pí chiah-ê khah tōa ê só͘ kiâⁿ hō͘ I khòaⁿ, tì-kàu lín kî-kòai.

21

. In-ūi chhin-chhiūⁿ Pē hō͘ sí-lâng khí-lâi, koh hō͘ in o̍ah, Kiáⁿ ia̍h sī án-ni hō͘ I só͘ ài ê lâng koh o̍ah.

22

. In-ūi Pē ia̍h bô sím-phòaⁿ lâng, to̍k-to̍k ēng sím-phòaⁿ ê sū lóng kau-tāi Kiáⁿ; beh hō͘ chèng lâng lóng chun-kèng Kiáⁿ, chhin-chhiūⁿ chun-kèng Pē.

23

. Bô chun-kèng Kiáⁿ ê lâng, chiū-sī bô chun-kèng chhe I ê Pē.

24

. Góa sı̍t-sı̍t kā lín kóng, Thiaⁿ góa ê ōe, ia̍h sìn chhe góa ê, chiū ū éng-o̍ah, bōe kàu siū sím-phòaⁿ, sī í-keng chhut sí jı̍p o̍ah lah.

25

. Góa sı̍t-sı̍t kā lín kóng, Sî beh kàu, hiān-chāi chiū-sī lah, sí-lâng teh-beh thiaⁿ-kìⁿ Siōng-tè ê Kiáⁿ ê siaⁿ, iā thiaⁿ-kìⁿ ê lâng teh-beh o̍ah.

26

. In-ūi chhin-chhiūⁿ Pē tī pún-sin ū o̍ah-miā, I ia̍h sī án-ni hō͘ Kiáⁿ tī pún-sin ū o̍ah-miā;

27

. koh hō͘ I ū kôan thang sím-phòaⁿ, in-ūi I sī chòe Jîn-chú.

28

. Bo̍h-tit lia̍h chit-ê chòe kî-kòai; in-ūi sî beh kàu, kìⁿ-nā tī bōng-lāi ê beh thiaⁿ I ê siaⁿ, chiah chhut-lâi;

29

. kiâⁿ hó ê koh khí-lâi, tit-tio̍h o̍ah; kiâⁿ pháiⁿ ê koh khí-lâi, siū sím-phòaⁿ.

30

. Góa ka-kī bōe chòe sím-mı̍h; góa chiàu só͘ thiaⁿ-kìⁿ lâi sím-phòaⁿ; góa ê sím-phòaⁿ ia̍h sī kong-gī; in-ūi góa bô kiû ka-kī ê ì-sù, chiū-sī kiû chhe góa ê ê ì-sù.

31

. Góa nā ūi-tio̍h ka-kī chòe kan-chèng, góa ê kan-chèng chiū bô chin.

32

. Iáu ū ūi-tio̍h góa chòe kan-chèng ê; góa chai I só͘ ūi-tio̍h góa chòe kan-chèng ê sī chin.

33

. Lín bat chhe lâng chiū-kūn Iok-hān, i ū ūi-tio̍h chin-lí chòe kan-chèng.

34

. Nā-sī góa só͘ siū ê kan-chèng , m̄ sī tùi lâng; to̍k-to̍k góa kóng chiah-ê, sī beh hō͘ lín tit-tio̍h kiù.

35

. Iok-hān chiū-sī teng, tiám to̍h koh kng; lín chêng-gōan chiām-sî hoaⁿ-hí i ê kng.

36

. Chóng-sī góa ū kan-chèng, pí Iok-hān ê khah tōa; in-ūi Pē só͘ kau-tāi góa lâi chiâⁿ ê sū, chiū-sī góa só͘ kiâⁿ chiah ê sū, kan-chèng góa sī Pē só͘ chhe ê.

37

. Chhe góa ê Pē, I ia̍h bat ūi-tio̍h góa chòe kan-chèng. Lín chiông-lâi m̄ bat thiaⁿ-kìⁿ I ê siaⁿ, ia̍h m̄ bat khòaⁿ-kìⁿ I ê hêng-siōng.

38

. Koh lín bô I ê tō-lí chûn tī lín, in-ūi I só͘ chhe ê, lín m̄ sìn I.

39

. Lín káng-kiù chiah ê sèng-keng, in-ūi phah-sǹg hit tiong-kan lín ū éng-o̍ah; ia̍h ūi-tio̍h góa chòe kan-chèng ê, chiū-sī chiah ê sèng-keng;

40

. lín iū bô beh chiū-kūn góa lâi tit-tio̍h o̍ah.

41

. Góa bô tùi lâng siū êng-kng.

42

. Chóng-sī góa chai lín bô ū Siōng-tè ê thiàⁿ tī lín ê sim.

43

. Góa tī góa ê Pē ê miâ lâi, lín m̄ chiap-la̍p góa; nā ū pa̍t lâng tī ka-kī ê miâ lâi, lín beh chiap-la̍p i.

44

. Lín tāi-ke saⁿ-kāng kiû êng-kng, m̄ kiû tùi to̍k-it ê Siōng-tè lâi ê êng-kng; cháiⁿ-iūⁿ ōe sìn?

45

. Bo̍h-tit phah-sǹg góa beh tùi Pē kò lín; ū teh kò lín ê, chiū-sī lín só͘ óa-khò ê Mô͘-se.

46

. Lín nā sìn Mô͘-se, ia̍h beh sìn góa, in-ūi i só͘ siá ê ū lūn góa.

47

. Lín nā m̄ sìn i ê chheh, thái ōe sìn góa ê ōe ah?