Iok-hān 第 6 章 - 巴克禮全羅

1

Chiah ê sū í-āu, Iâ-so͘ kè-khì Ka-lī-lī hái hit pêng, chiū-sī Thê-pì-lí-a hái.

2

. Ū chōe-chōe lâng tè I, sī in-ūi khòaⁿ-kìⁿ I só͘ kiâⁿ tī pīⁿ lâng ê sîn-jiah.

3

. Iâ-so͘ chiūⁿ soaⁿ, kap I ê ha̍k-seng chē tī hia.

4

. Pôaⁿ-kè-choeh, chiū-sī Iû-thài lâng ê choeh, kūn lah.

5

. Iâ-so͘ kia̍h ba̍k khòaⁿ-kìⁿ chōe-chōe lâng chiū-kūn I, chiū kā Hui-le̍k kóng, Lán beh tùi tá-lo̍h bóe piáⁿ lâi hō͘ chiah ê lâng chia̍h ah?

6

. I kóng chit-ê sī teh chhì i; in-ūi I ka-kī chai só͘ beh kiâⁿ ê.

7

. Hui-le̍k ìn I kóng, Ēng nn̄g pah ê gûn-á lâi bóe piáⁿ, ia̍h bô kàu-gia̍h hō͘ in ta̍k lâng tit-tio̍h tām-po̍h.

8

. I ê ha̍k-seng tiong chı̍t lâng, chiū-sī Se-bûn Pí-tek ê hiaⁿ-tī, An-tek-lia̍t, kā I kóng,

9

. Tī chia chı̍t ê gín-ná ū gō͘ ê tōa-be̍h piáⁿ, nn̄g bé hî; chóng-sī chiong chiah-ê hō͘ hiah chōe lâng, ū kàu tá-lo̍h?

10

. Iâ-so͘ kóng, Lín kah hiah ê lâng chē-teh. Hit só͘-chāi chōe-chōe chháu. Lâng chiū lóng chē, siàu-gia̍h iok-lio̍k gō͘ chheng.

11

. Iâ-so͘ the̍h hiah ê piáⁿ; chiok-siā liáu-āu, chiū pun hō͘ chē ê lâng; hî ia̍h sī án-ni, lóng chiàu in só͘ ài.

12

. In í-keng chia̍h pá, Iâ-so͘ kā I ê ha̍k-seng kóng, Khioh só͘ chia̍h chhun ê sut-á, bián-tit ū phah-sńg,

13

. Chiū chiong só͘ chia̍h chhun gō͘ ê tōa-be̍h piáⁿ ê piáⁿ-chhùi, khioh móa cha̍p-jī kheng.

14

. Hiah ê lâng khòaⁿ-kìⁿ I só͘ kiâⁿ ê sîn-jiah, chiū kóng, Chit-ê chin-chiàⁿ sī só͘ beh lâi sè-kan ê sian-ti.

15

. Iâ-so͘ chai chèng lâng beh lâi, ài ngī-lia̍h I, hō͘ I chòe ông, chiū koh thè-khì jı̍p soaⁿ, chí-ū I ka-kī tī hia.

16

. Hông-hun àm, I ê ha̍k-seng lo̍h-khì kàu hái-piⁿ;

17

. chiūⁿ chûn, beh kè hái khì Ka-pek-lông. Í-keng àm, Iâ-so͘ iáu-bē kàu.

18

. In-ūi hong chin thàu, hái-éng chiū ná tōa.

19

. Tùi án-ni ha̍k-seng kò chûn, iok-lio̍k kiâⁿ poeh lí, á cha̍p lí, khòaⁿ-kìⁿ Iâ-so͘ kiâⁿ hái-bīn, ná óa-kūn chûn, chiū kiaⁿ.

20

. Nā-sī Iâ-so͘ tùi in kóng, Sī góa, bián kiaⁿ.

21

. Ha̍k-seng chiū hoaⁿ-hí chih-chiap I chiūⁿ chûn; chûn liâm-piⁿ kàu in só͘ beh khì ê só͘-chāi.

22

. Keh jı̍t, khiā tī hái hit pêng hōaⁿ ê chèng lâng, khòaⁿ-kìⁿ hit ūi bô pa̍t chiah chûn-á, chí-ū chı̍t chiah nā-tiāⁿ, koh Iâ-so͘ bô kap I ê ha̍k-seng tah hit chiah chûn, chí-ū ha̍k-seng ka-kī khì;

23

. (chóng-sī ū kúi chiah chûn-á tùi Thê-pì-lí-a lâi, kàu kūn tī Chú chiok-siā liáu-āu chèng lâng chia̍h piáⁿ ê só͘-chāi);

24

. chèng lâng khòaⁿ-kìⁿ Iâ-so͘ kap I ê ha̍k-seng lóng bô tī hia, chiū tah hit kúi chiah chûn-á, kàu Ka-pek-lông chhē Iâ-so͘.

25

. Í-keng tú-tio̍h I tī hái ê hit pêng hōaⁿ, chiū kā I kóng, Lia̍p-pí, lí sím-mı̍h sî kàu chia?

26

. Iâ-so͘ ìn kóng, Góa sı̍t-sı̍t kā lín kóng, Lín chiah-ê chhē góa, m̄ sī in-ūi khòaⁿ-kìⁿ sîn-jiah, sī in-ūi chia̍h piáⁿ kàu pá nā-tiāⁿ.

27

. Bo̍h-tit ūi-tio̍h ōe pāi-hōai ê bí-niû lâi tio̍h-bôa, tio̍h ūi-tio̍h tn̂g-tn̂g tī-teh éng-o̍ah ê bí-niû lâi tio̍h-bôa, chiū-sī Jîn-chú só͘ beh hō͘ lín ê; in-ūi I sī Pē Siōng-tè só͘ khàm-ìn ê.

28

. In chiū tùi I kóng, Góan tio̍h cháiⁿ-iūⁿ kiâⁿ, lâi chòe Siōng-tè ê kang?

29

. Iâ-so͘ ìn kóng, Sìn I só͘ chhe ê, chit-ê chiū-sī Siōng-tè ê kang.

30

. In kā I kóng, Lí kiâⁿ sím-mı̍h sîn-jiah, hō͘ góan khòaⁿ, lâi sìn lí ah? Lí kiâⁿ sím-mı̍h ah?

31

. Góan ê chó͘ tī khòng-iá chia̍h má-ná; chiàu só͘ kì-chài kóng, Ēng tùi thiⁿ lâi ê piáⁿ hō͘ in chia̍h.

32

. Iâ-so͘ kā in kóng, Góa sı̍t-sı̍t kā lín kóng, M̄ sī Mô͘-se ēng tùi thiⁿ lâi ê piáⁿ hō͘ lín, chiū-sī góa ê Pē ēng tùi thiⁿ lâi ê chin piáⁿ hō͘ lín.

33

. In-ūi Siōng-tè ê piáⁿ, chiū-sī hit ê tùi thiⁿ lo̍h-lâi, iā ēng o̍ah-miā siúⁿ-sù sè-kan ê.

34

. In chiū tùi I kóng, Chú ah, siông-siông ēng chit hō piáⁿ hō͘ góan.

35

. Iâ-so͘ kā in kóng, Góa chiū-sī o̍ah-miā ê piáⁿ; chiū-kūn góa ê lâng koat-tòan bōe iau, sìn góa ê lâng éng-éng bōe chhùi-ta.

36

. Nā-sī góa bat kā lín kóng, Lín í-keng khòaⁿ-kìⁿ góa, ia̍h iû-gôan m̄ sìn.

37

. Kìⁿ-nā Pē só͘ hō͘ góa ê, beh lóng chiū-kūn góa; chiū-kūn góa ê lâng, góa koat-tòan bô khì-sak i.

38

. In-ūi góa tùi thiⁿ kàng-lo̍h m̄ sī kiâⁿ ka-kī ê chí-ì, chiū-sī kiâⁿ chhe góa ê ê chí-ì.

39

. Taⁿ chhe góa ê ê chí-ì, chiū-sī kìⁿ-nā I só͘ hō͘ góa ê, góa bô sit-lo̍h chı̍t-ê, sī tī bo̍at-jı̍t hō͘ i koh-o̍ah.

40

. In-ūi góa ê Pē ê chí-ì chiū-sī kìⁿ-nā khòaⁿ-kìⁿ Kiáⁿ lâi sìn I ê lâng, lóng ū éng-o̍ah; iā góa tī bo̍at-jı̍t hō͘ i koh-o̍ah.

41

. Iû-thài lâng in-ūi Iâ-so͘ kóng, Góa sī tùi thiⁿ kàng-lo̍h ê piáⁿ, chiū nga̍uh-nga̍uh-liām I, kóng,

42

. Chit-ê kiám m̄ sī Iok-sek ê kiáⁿ Iâ-so͘ mah? I ê pē-bú sī lán só͘ bat ê. Taⁿ cháiⁿ-iūⁿ kóng, Góa sī tùi thiⁿ kàng-lo̍h ah?

43

. Iâ-so͘ ìn kóng, Lín bo̍h-tit án-ni nga̍uh-nga̍uh-liām.

44

. Nā m̄ sī chhe góa ê Pē ín-chhōa i, chiū bô lâng ōe chiū-kūn góa; chiū-kūn góa ê, góa tī bo̍at-jı̍t beh hō͘ i koh-o̍ah.

45

. Tī chiah ê sian-ti ū kì-chài kóng, In lóng beh hō͘ Siōng-tè kà in. Kìⁿ-nā tùi Pē thiaⁿ-kìⁿ lâi o̍h ê lâng, chiū chiū-kūn góa.

46

. Che m̄ sī kóng ū lâng bat khòaⁿ-kìⁿ Pē, chí ū tùi Siōng-tè lâi ê, I bat khòaⁿ-kìⁿ Pē.

47

. Góa sı̍t-sı̍t kā lín kóng, Sìn ê lâng ū éng-o̍ah.

48

. Góa sī o̍ah-miā ê piáⁿ.

49

. Lín ê chó͘ tī khòng-iá chia̍h má-ná, in ia̍h sí.

50

. Chit-ê chiū-sī tùi thiⁿ kàng-lo̍h ê piáⁿ, hō͘ lâng chia̍h ê, iā bōe sí.

51

. Góa sī o̍ah ê piáⁿ, tùi thiⁿ kàng-lo̍h ê; lâng nā chia̍h chit ê piáⁿ, chiū o̍ah kàu éng sè-tāi; koh góa só͘ beh hō͘ lâng ê piáⁿ, chiū-sī góa ê bah ūi-tio̍h sè-kan ê o̍ah-miā chiah siúⁿ-sù ê.

52

. Tùi án-ni Iû-thài lâng saⁿ-chiⁿ, kóng, Chit lâng thái ōe ēng I ê bah hō͘ lán chia̍h?

53

. Iâ-so͘ chiū kā in kóng, Góa sı̍t-sı̍t kā lín kóng, Lín nā bô chia̍h Jîn-chú ê bah, bô lim I ê huih, chiū lín ê lāi-bīn bô o̍ah.

54

. Chia̍h góa ê bah, lim góa ê huih ê lâng ū éng-o̍ah; bo̍at-jı̍t góa beh hō͘ i koh-o̍ah.

55

. Góa ê bah sī chin ê chia̍h-mı̍h, góa ê huih sī chin-sı̍t thang lim ê.

56

. Chia̍h góa ê bah, lim góa ê huih ê lâng, i tiàm-tī góa, góa ia̍h tiàm-tī i.

57

. Chhin-chhiūⁿ o̍ah ê Pē chhe góa, koh góa tùi Pē lâi o̍ah; chia̍h góa ê, beh tùi góa lâi o̍ah, ia̍h sī án-ni.

58

. Che chiū-sī tùi thiⁿ kàng-lo̍h ê piáⁿ; m̄ sī chhin-chhiūⁿ lia̍t-chó͘ ê chia̍h má-ná, iā sí-khì; chia̍h chit ê piáⁿ ê lâng, beh o̍ah kàu éng sè-tāi.

59

. Chiah ê ōe sī Iâ-so͘ tiàm tī Ka-pek-lông hōe-tn̂g lâi kà-sī lâng ê sî só͘ kóng ê.

60

. I ê ha̍k-seng tiong chōe-chōe lâng thiaⁿ-liáu chiū kóng, Chit ê ōe chin oh; chī-chūi ōe thiaⁿ i?

61

. Iâ-so͘ sim-lāi chai I ê ha̍k-seng in-ūi chit-ê nga̍uh-nga̍uh-liām, chiū kā in kóng, Chit-ê sī that-gāi-tio̍h lín mah?

62

. Siat-sú lín khòaⁿ-kìⁿ Jîn-chú chiūⁿ kàu i gôan-pún ê só͘-chāi nı̍h?

63

. Hō͘ lâng o̍ah ê chiū-sī Sîn: jio̍k-thé chiū bô lī-ek; góa só͘ kā lín kóng ê ōe sī sîn, sī o̍ah-miā.

64

. Nā-sī lín tiong-kan ū m̄ sìn ê lâng lah. In-ūi Iâ-so͘ tùi khí-thâu chiū chai chī-chūi m̄ sìn I, chī-chūi beh bōe I.

65

. Koh kóng, In-ūi án-ni, góa bat kā lín kóng, nā m̄ sī tùi Pē hō͘ i, bô lâng ōe chiū-kūn góa.

66

. Tùi án-ni I ê ha̍k-seng chōe-chōe thè-khì, bô koh kap I kiâⁿ.

67

. Iâ-so͘ chiū kā cha̍p-jī ê ha̍k-seng kóng, Lín ia̍h beh khì mah?

68

. Se-bûn Pí-tek ìn I kóng, Chú ah, lí ū éng-o̍ah ê ōe, góan beh khì chhē chī-chūi ah?

69

. Góan í-keng sìn, koh chai lí sī Siōng-tè ê Sèng-ê.

70

. Iâ-so͘ ìn kóng, Góa kiám m̄ sī kéng lín cha̍p-jī lâng, ia̍h lín tiong-kan chı̍t-ê sī mô͘-kúi ah?

71

. I kóng án-ni sī chí Ka-lio̍k lâng Se-bûn ê kiáⁿ Iû-tāi, in-ūi i sī cha̍p-jī ha̍k-seng ê chı̍t-ê teh-beh bōe I ê.