Iok-hān 第 7 章 - 巴克禮全羅

1

Chiah ê sū í-āu, Iâ-so͘ sì-kòe kiâⁿ tī Ka-lī-lī, m̄ ài kiâⁿ tī Iû-thài, in-ūi Iû-thài lâng ài beh thâi I.

2

. Hit sî Iû-thài lâng ê choeh, chiū-sī tah-liâu-choeh, kūn lah.

3

. I ê hiaⁿ-tī chiū tùi I kóng, Lí tio̍h lī-khui chia, khì Iû-thài, hō͘ lí ê ha̍k-seng ia̍h thang khòaⁿ-kìⁿ lí só͘ kiâⁿ ê sū.

4

. Lâng ài chhut-miâ, chiū bô tī àm-chīⁿ ê só͘-chāi chòe tāi-chì. Lí nā kiâⁿ chiah ê sū, chiū tio̍h chiong ka-kī hián-bêng tī sè-kan.

5

. In-ūi I ê hiaⁿ-tī ia̍h bô sìn I.

6

. Iâ-so͘ chiū kā in kóng, Góa ê sî iáu-bē kàu; nā-sī lín ê sî siông-siông piān.

7

. Sè-kan bōe-ōe òan-hūn lín; sī òan-hūn góa, in-ūi góa kan-chèng i ê só͘ kiâⁿ sī pháiⁿ.

8

. Lín chiūⁿ-khì hù choeh; góa iáu-bē thang chiūⁿ-khì hù chit ê choeh; in-ūi góa ê sî iáu-bē móa.

9

. Í-keng kā in kóng án-ni, chiū iû-gôan tiàm Ka-lī-lī.

10

. I ê hiaⁿ-tī í-keng chiūⁿ-khì hù choeh, I pún-sin ia̍h chiūⁿ-khì, m̄ sī hián-jiân, sī chhin-chhiūⁿ àm-chīⁿ.

11

. Iû-thài lâng tī choeh-kî tiong chhē Iâ-so͘ kóng, I tī tá-lo̍h?

12

. Chèng lâng ūi-tio̍h I chōe-chōe chī-bú chī-chū; ū-ê kóng, sī hó lâng; ū-ê kóng, M̄ sī, sī bê-he̍k chèng lâng nā-tiāⁿ.

13

. To̍k-to̍k bô lâng hián-jiân kóng I ê sū, in-ūi kiaⁿ Iû-thài lâng ê iân-kò͘.

14

. Tng choeh-kî ê tiong-chām Iâ-so͘ chiūⁿ tiān kà-sī.

15

. Iû-thài lâng chiū kî-kòai, kóng, Chit ê lâng bē ū jı̍p o̍h, tùi tá-lo̍h bat chheh?

16

. Iâ-so͘ chiū ìn kóng, Góa ê kà-sī m̄ sī sio̍k tī ka-kī, sī sio̍k tī chhe góa ê.

17

. Lâng nā gōan kiâⁿ I ê chí-ì, chiū ōe chai chit ê kà-sī sī tùi Siōng-tè chhut, á-sī góa tùi ka-kī lâi kóng ê.

18

. Tùi ka-kī lâi kóng ê, sī kiû ka-kī ê êng-kng; to̍k-to̍k kiû chhe i ê ê êng-kng, hit ê lâng chiū-sī chin, ia̍h i ê lāi-bīn bô put-gī.

19

. Mô͘-se kiám bô ēng lu̍t-hoat thôan hō͘ lín mah? Nā-sī lín tiong-kan bô chı̍t lâng kiâⁿ lu̍t-hoat. Lín siáⁿ-sū ài beh thâi góa?

20

. Chèng lâng ìn kóng, Lí hōan-tio̍h kúi, chī-chūi ài beh thâi lí?

21

. Iâ-so͘ ìn kóng, Góa bat kiâⁿ chı̍t hāng sū, lín lóng lia̍h chòe kî-kòai.

22

. In-ūi án-ni Mô͘-se ēng kat-lé thôan hō͘ lín, (kî-sı̍t m̄ sī tùi Mô͘-se, sī tùi lia̍t-chó͘); ia̍h lín tī an-hioh-jı̍t kā lâng kiâⁿ kat-lé.

23

. Lâng nā tī an-hioh-jı̍t siū kat-lé, bián-tit ûi-ke̍h Mô͘-se ê lu̍t-hoat; chiū góa tī an-hioh-jı̍t hō͘ chı̍t lâng chôan-thé lóng hó, lín in-ūi án-ni siū-khì góa mah?

24

. Bo̍h-tit chiàu gōa-māu lâi gí-tòan, tio̍h thàn kong-gī lâi gí-tòan.

25

. Tùi án-ni Iâ-lō͘-sat-léng ê lâng, ū-ê kóng, Chit-ê kiám m̄ sī in só͘ ài thâi ê mah?

26

. Lí khòaⁿ, I hó-táⁿ teh kóng, ia̍h bô lâng tùi I kóng sím-mı̍h. Kiám sī chiah ê koaⁿ-hú chin-chiàⁿ chai chit-ê sī Ki-tok mah?

27

. Nā-sī lán bat chit ê lâng tùi tá-lo̍h lâi; m̄ kú Ki-tok lâi ê sî bô lâng chai I tùi tá-lo̍h lâi.

28

. Tùi án-ni Iâ-so͘ tī tiān-nı̍h kà-sī, kiò kóng, Lín bat góa, ia̍h chai góa tùi tá-lo̍h lâi; góa m̄ sī chū-choan lâi, chhe góa lâi ê sī chin-sı̍t, lín m̄ bat I.

29

. Góa bat I; in-ūi góa tùi I lâi, ia̍h I chhe góa.

30

. In chiū ài beh lia̍h I; chóng-sī bô lâng hē chhiú, in-ūi I ê sî iáu-bē kàu.

31

. Chèng lâng tiong chōe-chōe lâng sìn I, kóng, Ki-tok lâi ê sî, kiám beh kiâⁿ sîn-jiah pí chit lâng só͘ kiâⁿ ê khah chōe mah?

32

. Hoat-lī-sài lâng thiaⁿ-kìⁿ chèng lâng án-ni chī-bú chī-chū teh kóng I, chiū chiah ê chè-si-thâu kap Hoat-lī-sài lâng chhe gê-ia̍h beh lia̍h I.

33

. Iâ-so͘ chiū kóng, Góa iáu ū tiap-á kú kap lín tī-teh, āu-lâi beh tò-khì chiū-kūn chhe góa ê.

34

. Lín beh chhē góa, ia̍h chhē bōe tio̍h; góa só͘ tòa ê só͘-chāi, lín bōe-ōe kàu.

35

. Iû-thài lâng chiū saⁿ-kap kóng, I beh tá-lo̍h khì, tì-kàu lán chhē I bōe tio̍h? kiám beh chiū-kūn Hi-lī-nî tiong sì-sòaⁿ khiā-khí ê Iû-thài lâng, lâi kà-sī Hi-lī-nî lâng mah?

36

. I só͘ kóng, Lín beh chhē góa bōe tio̍h; góa só͘ tòa ê só͘-chāi, lín bōe-ōe kàu; che sī sím-mı̍h ōe ah?

37

. Tng choeh-kî ê bé jı̍t, chiū-sī siōng tōa ê jı̍t, Iâ-so͘ khiā-teh, kiò kóng, Nā ū chhùi-ta ê lâng, tio̍h chiū-kūn góa lâi lim.

38

. Sìn góa ê lâng, chhin-chhiūⁿ sèng-keng só͘ kóng, ū o̍ah chúi ê khoe, beh tùi i ê pak-lāi lâu-chhut.

39

. I kóng án-ni sī chí sìn I ê lâng só͘ beh siū ê Sèng Sîn; hit sî bē ū siúⁿ-sù Sèng Sîn; in-ūi Iâ-so͘ bē ū tit-tio̍h êng-kng.

40

. Chèng lâng tiong ū-ê thiaⁿ-kìⁿ chiah ê ōe lâi kóng, Chit lâng chin-chiàⁿ sī hit ê sian-ti.

41

. Ū-ê kóng, Chit lâng chiū-sī Ki-tok. Nā-sī ū-ê kóng, Ki-tok kiám tùi Ka-lī-lī chhut mah?

42

. Sèng-keng kiám bô kóng, Ki-tok sī Tāi-pı̍t ê hō͘-è, tùi Tāi-pı̍t ê pún-hiuⁿ Pek-lī-hêng chhut mah?

43

. Tùi án-ni chèng lâng in-ūi I lâi hun-pêng.

44

. Kî-tiong ū lâng ài lia̍h I; chóng-sī bô lâng hē chhiú.

45

. Gê-ia̍h chiū lâi kìⁿ chiah ê chè-si-thâu kap Hoat-lī-sài lâng; in chiū tùi gê-ia̍h kóng, Siáⁿ-sū bô tòa I lâi?

46

. Gê-ia̍h ìn kóng, Chiông-lâi bē ū lâng kóng ōe chhin-chhiūⁿ I án-ni.

47

. Hoat-lī-sài lâng ìn kóng, Lín ia̍h siū bê-he̍k mah?

48

. Chiah ê koaⁿ-hú á-sī Hoat-lī-sài lâng, kiám ū lâng sìn I?

49

. To̍k-to̍k chiah-ê m̄ bat lu̍t-hoat ê peh-sìⁿ, sī siū chiù-chó͘ ê.

50

. In tiong-kan ū Nî-ko-tí-bó͘, chiū-sī chêng chiū-kūn Iâ-so͘ ê, kā in kóng,

51

. Bô tāi-seng thiaⁿ lâng ê ōe, lâi chai i ê só͘ kiâⁿ; lán ê lu̍t-hoat kiám ū tēng i ê chōe mah?

52

. In chiū ìn i kóng, Lí ia̍h sī tùi Ka-lī-lī chhut mah? Lí khì chhâ-khó, chiū chai Ka-lī-lī bô chhut sian-ti.