Iok-pek-kì 第 12 章 - 巴克禮全羅

1

Iok-pek ìn i kóng,

2

Lín chin-chiàⁿ sī peh-sìⁿ ah, Lín sí, tì-hūi iā kap lín sí.

3

Góa iā ū sim-su, chhin-chhiūⁿ lín chı̍t-iūⁿ; Góa bô khah-su lín; Chiah ê tāi-chì sím-mı̍h lâng m̄-chai?

4

Góa sī kiû-kiò Siōng-tè, tit-tio̍h I thiaⁿ ê lâng, Iáu-kú hō͘ tâng-phōaⁿ ki-chhì; Kong-gī ôan-chôan ê lâng, iā hō͘ lâng ki-chhì.

5

An-jiân ê lâng sim-lāi khòaⁿ-khin hōan-lān; Che hōan-lān piān-piān teh thèng-hāu kha tio̍h-tak ê lâng.

6

Kiông-tō ê pò͘-pîⁿ heng-thong, Jiá-tio̍h Siōng-tè ê lâng tit-tio̍h an-jiân. Chiū-sī Siōng-tè tōa siúⁿ-sù tī in ê chhiú--ê.

7

Taⁿ lí khì mn̄g cháu-siù, in beh kà-sī lí; Iā khì mn̄g khong-tiong ê chiáu, in beh kā lí kóng;

8

Á-sī kap tōe kóng, i beh kà-sī lí; Hái-tiong ê hî iā beh kā lí kóng-bêng.

9

Tī chiah-ê it-chhè, chī-chūi m̄ chai, Sī Iâ-hô-hoa ê chhiú chòe án-ni?

10

It-chhè tōng-bu̍t ê sìⁿ-miā, kap jîn-lūi ê chhóan-khùi, Lóng tī I ê chhiú.

11

Hī-khang kiám bōe chhì-giām giân-gú, Chhin-chhiūⁿ chiūⁿ-kiuⁿ chhì chu-bī mah?

12

Nî-lāu--ê ū tì-hūi, Hè-siū chōe-ê ū kiàn-sek.

13

Tì-hūi kap lêng-le̍k chāi-tī Siōng-tè; I ū kè-e̍k kap kiàn-sek.

14

Khòaⁿ ah, I thiah-húi-ê, bōe-ōe koh khí-chō; I koaiⁿ-kìm ê lâng, bô thang koh tháu-pàng.

15

Khòaⁿ ah, I kìm-chí hiah ê chúi, chúi chiū ta--khì; I koh hō͘ chúi lâu-chhut, tōe chiū piàn-chhian.

16

Kôan-lêng kap hāu-le̍k chāi-tī I; Siū bê-he̍k, kap bê-he̍k lâng--ê, lóng sio̍k tī I.

17

I hō͘ bô͘-sū tú-tio̍h chhiúⁿ-lia̍h; Koh hō͘ sím-phòaⁿ-si pìⁿ-chiâⁿ gōng-lâng.

18

I tháu-pàng kun-ông ê khún-pa̍k, Koh ēng tòa pa̍k in ê io.

19

I hō͘ chè-si tú-tio̍h chhiúⁿ-lia̍h, Koh chhia-tó ū kôan-lêng ê lâng.

20

I kóe-chho̍ah tiong-sìn ê lâng ê ōe, Koh tû-khì lāu-lâng ê kiàn-sek.

21

I hō͘ kùi-cho̍k siū lêng-jio̍k; Koh tháu-khui ū la̍t ê lâng ê io-tòa.

22

I tùi o͘-àm-tiong hián-chhut chhim-ò ê sū; Koh tòa-chhut sí-ìm kàu kng-bêng ê só͘-chāi.

23

I hō͘ pang-kok heng-ōng, iā koh húi-bia̍t i; I hō͘ pang-kok khui-khoah, iā koh chhian-sóa in.

24

Tōe-chiūⁿ peh-sìⁿ ê thâu-lâng, I tû-khì in ê sim-su; Hō͘ in phiau-liû tī bô lō͘ ê khòng-iá.

25

In bô kng, tī o͘-àm-tiong sì-kòe bong; Koh hō͘ in tian-lâi tian-khì, chhin-chhiūⁿ chiú-chùi ê lâng chı̍t-iūⁿ.