Iok-pek-kì 第 11 章 - 巴克禮全羅

1

Ná-má lâng Só-hoat ìn kóng,

2

Ōe hiah chōe, kiám m̄-tio̍h ìn mah? Kāu-ōe ê lâng, kiám thang chheng-chòe-gī mah?

3

Lí teh khoa-kháu, lâng kiám tio̍h chēng-chēng mah? Lí teh thí-chhiò ê sî, bô lâng hō͘ lí kiàn-siàu mah?

4

Lí kóng, Góa ê tō-lí sûn-chôan, Góa tī lí ê ba̍k-chiu-chêng chheng-khì.

5

Chóng-sī gōan Siōng-tè kóng-ōe, Koh khui I ê chhùi piān-pok lí;

6

Chí-sī lí tì-hūi ê ò-biāu, Che tì-hūi ū ta̍k-poaⁿ ê kong-hāu; Lí tio̍h chai Siōng-tè bô lóng-chóng kì-tit lí ê chōe-kòa.

7

Lí kiám-ōe chhek-to̍k Siōng-tè ê ò-biāu mah? Lí kiám-ōe chhek-to̍k Chôan-lêng-ê kàu thiat-tí mah?

8

I kôaiⁿ chhin-chhiūⁿ thiⁿ, lí iáu ōe chòe sím-mı̍h? Pí im-kan khah-chhim, lí iáu ōe chai sím-mı̍h?

9

I ê liōng sī pí tōe khah-tn̂g, Pí hái khah-khoah.

10

I nā keng-kè, lâi koaiⁿ-kìm lâng, Tiàu lâng sím-phòaⁿ, chī-chūi ōe chó͘-tòng I ah?

11

In-ūi I chai hu-kè ê lâng; Sui-jiân bô chù-ì, iā lóng khòaⁿ-kìⁿ chōe-kòa.

12

Khang-hu ê lâng lóng bô sim-su, Lâng chhut-sì chhin-chhiūⁿ iá-lû ê lû-kiáⁿ.

13

Lí nā toan-chiàⁿ lí ê sim, Koh ǹg I kia̍h-khí chhiú;

14

Lí ê chhiú-lāi nā ū chōe-kòa, chiū tio̍h tû-khì hn̄g-hn̄g, Iā m̄-thang iông-ún put-gī tiàm tī lí ê pò͘-pîⁿ lāi.

15

Hit-sî lí tek-khak kia̍h-khí lí bô hâ-chhû ê bīn; Lí iā beh khiā-chāi, lóng bô kiaⁿ-hiâⁿ.

16

In-ūi lí beh bōe-kì-tit lí ê kan-khó͘; Chiū nā kì-tit, iā chhin-chhiūⁿ chúi lâu-kè--khì chı̍t-iūⁿ.

17

Lí ê seng-ho̍at khah-iâⁿ jı̍t-tiong-tàu, Sui-jiân àm, iû-gôan chhin-chhiūⁿ chá-khí-sî.

18

Lí beh an-ún, in-ūi ū só͘ ǹg-bāng; Lí beh sì-kòe sûn-khòaⁿ, chiū thang an-sim khùn.

19

Lí beh tó-teh, iā bô ū phah-kiaⁿ lí ê, Koh ū chōe-chōe lâng tùi lí kiû-un.

20

Chóng-sī pháiⁿ-lâng ê ba̍k-chiu beh hoe; In bô lō͘ thang tô-cháu, in só͘ ǹg-bāng chhin-chhiūⁿ khùi-tn̄g.