Iok-pek-kì 第 10 章 - 巴克禮全羅

1

Góa ê sim m̄-ài o̍ah: Góa beh tōa-táⁿ kóng-chhut góa ê ai-òan; Góa sim-lāi ê khó͘-thàng, góa chiah beh kóng.

2

Góa beh tùi Siōng-tè kóng, Bo̍h-tit tēng góa ū-chōe, Tio̍h chí-sī góa, Lí ūi sím-mı̍h in-toaⁿ kap góa cheng-piān.

3

Lí kiâⁿ ap-chè, koh khòaⁿ-khin Lí ê chhiú só͘-chō-ê, Koh ēng kng chiò pháiⁿ-lâng ê kè-bô͘, Lí kiám lia̍h chiah-ê chòe-hó mah?

4

Lí ê ba̍k-chiu kiám sī bah-ê, Á-sī Lí teh khòaⁿ chhin-chhiūⁿ lâng teh khòaⁿ mah?

5

Lí ê jı̍t-chí kiám chhin-chhiūⁿ lâng ê jı̍t-chí? Á-sī Lí ê nî chhin-chhiūⁿ lâng ê nî mah?

6

Lí chiah kiù-khàm góa ê chōe-gia̍t, Cha-chhat góa ê chōe-kòa.

7

Lí sī m̄-chai góa bô chōe, Iā bô chı̍t-ê ōe kiù góa thoat-lī Lí ê chhiú mah?

8

Lí ê chhiú ū chhòng-chō góa, tiau-tok góa ê sù-chi pah-thé, Lí iáu-kú teh húi-bia̍t góa.

9

Kiû Lí kì-liām, Lí bat chè-chō góa chhin-chhiūⁿ chhiau-thô͘ chı̍t-poaⁿ; Lí beh hō͘ góa koh kui tī thô͘-hún mah?

10

Lí kiám m̄-sī piàⁿ-chhut góa chhin-chhiūⁿ ni, Hō͘ góa kiat kui-thn̂g chhin-chhiūⁿ ni-piáⁿ mah?

11

Lí ēng phê kap bah hō͘ góa chhēng, Koh ēng kut kap kun hō͘ góa liân-lo̍k.

12

Lí ēng o̍ah-miā kap chû-ài hō͘ góa, Lí ê kòan-kò͘ pó-chôan góa ê sìⁿ-miā.

13

Chiah ê sū Lí lóng khǹg tī Lí ê sim; Góa chai Lí pún ū chit ê ì-sù.

14

Góa nā hōan-chōe, Lí chiū chù-ì góa; Iā bô beh lia̍h góa chòe bô chōe.

15

Góa nā kiâⁿ-pháiⁿ, chiū ū chai-ē, Góa nā chòe-gī, iā m̄-káⁿ kia̍h-khí thâu; Móa-sim kiàn-siàu, Chhin-ba̍k khòaⁿ-kìⁿ góa ê kan-khó͘.

16

Góa nā thâu kia̍h-kôaiⁿ, Lí chiū jip beh lia̍h góa chhin-chhiūⁿ sai, Koh hián-chhut Lí ê kî-īⁿ tī góa.

17

Lí koh siat Lí ê kan-chèng kong-kek góa. Ke-thiⁿ Lí ê siū-khì tī góa; Kun-peng chı̍t-tūi kè chı̍t-tūi, kong-kek góa.

18

Lí siáⁿ-sū hō͘ góa chhut-thai? m̄-ta̍t-tio̍h hit-sî tn̄g-khùi, Bô hō͘ lâng ê ba̍k-chiu khòaⁿ-kìⁿ góa.

19

Án-ni góa chiū ū, ná chhin-chhiūⁿ bô; Chı̍t-ē chhut-thai chiū sàng jı̍p bōng.

20

Góa ê jı̍t-chí kiám m̄-sī chin-chió mah? Kiû Lí chhiáⁿ-thêng, pàng-khoan góa,

21

Hō͘ góa tī khì, bô tò-tńg, chiū-sī khì o͘-àm kap sí-ìm ê tōe ê tāi-seng, Thang lio̍h-á tit-tio̍h an-ùi.

22

Hit ê tōe àm-àm chhin-chhiūⁿ o͘-ba̍k, Sī sí-ìm hūn-tūn, I ê kng chhin-chhiūⁿ o͘-ba̍k.