Iok-pek-kì 第 9 章 - 巴克禮全羅

1

Iok-pek ìn kóng,

2

Góa chin-chiàⁿ chai sī án-ni; In-ūi lâng tī Siōng-tè ê bīn-chêng, thái ōe sǹg-chòe-gī ah?

3

Nā beh kap I piān-lūn, Chheng-hāng iā bōe ìn I chı̍t-hāng.

4

I ê sim sī tì-hūi, I ê la̍t sī tōa; Chī-chūi tí-khòng I, iā tit-tio̍h an-jiân?

5

I î-sóa soaⁿ, soaⁿ iā m̄-chai; I siū-khì tiong, hō͘ soaⁿ pang--lo̍h-khì.

6

I hō͘ tōe tín-tāng, lī-khui i ê pún-ūi, Tōe ê thiāu chiū iô-choah.

7

I bēng-lēng jı̍t, jı̍t chiū bô chhut; Koh hong-ba̍t chèng chhiⁿ.

8

I ka-kī thí-khui thiⁿ; Koh kiâⁿ-ta̍h tī hái-éng ê téng-bīn.

9

I chhòng-chō Pak-táu, Chham-chhiⁿ, Báu-chhiⁿ, kap lâm-hng ê bı̍t-kiong.

10

I kiâⁿ tāi-chì tōa kàu bōe chhek-to̍k-tit, Kiâⁿ kî-sū sǹg-bōe-liáu.

11

Khòaⁿ ah, I tùi góa chia keng-kè, góa iā bô khòaⁿ-kìⁿ, I kiâⁿ kè--khì, góa iā m̄-chai.

12

Khòaⁿ ah, I chhiúⁿ-khì, chī-chūi ōe chó͘-tòng I? Chī-chūi káⁿ mn̄g I, Lí chòe sím-mı̍h?

13

Siōng-tè tek-khak bô siu-hôe I ê siū-khì, Hû-chō͘ La̍h-hap-pek ê, khut-lo̍h tī I ê ē-bīn.

14

Hô-hòng góa thái-thó káⁿ ìn I, Á-sī kéng sím-mı̍h ōe lâi kap I piān-lūn?

15

Góa sui-jiân sī kong-gī, iā m̄-káⁿ ìn I; To̍k-to̍k tùi sím-phòaⁿ góa--ê kiû-un.

16

Góa nā kiû-kiò I, I nā ìn góa, Góa iā m̄-sìn I ū thiaⁿ góa ê siaⁿ.

17

In-ūi I ēng tōa-hong phah góa; Bô iân-kò͘ ke-thiⁿ góa ê siong.

18

I m̄ iông-ún góa chhóan chı̍t-ê khùi; To̍k-to̍k ēng khó͘ chhiong-móa góa.

19

Nā lūn kiông-béng, khòaⁿ ah, I ê la̍t tī-chia, Nā lūn sím-phòaⁿ, chī-chūi ōe kā góa tiāⁿ-tio̍h kî-jı̍t?

20

Góa sui-jiân chòe-gī, góa ka-kī ê chhùi beh tēng góa ê chōe; Góa sui-jiân ôan-chôan, i beh hián-bêng góa ê hêng-ge̍k.

21

Góa sī ôan-chôan-ê, góa bô kò͘ ka-kī; Góa khòaⁿ-khin góa ê o̍ah-miā.

22

Thong-thong sī chı̍t-iūⁿ, só͘-í góa kóng, Ôan-chôan--ê kap kiâⁿ-pháiⁿ-ê, I lóng châu-bia̍t.

23

Chai-ē nā hut-jiân phah-sí lâng, I chiū thí-chhiò bô-chōe ê lâng tú-tio̍h chhì-liān.

24

Sè-kài kau-hù tī pháiⁿ-lâng ê chhiú; I jia-khàm sím-phòaⁿ-si ê bīn; Nā m̄-sī I, sī chī-chūi ah?

25

Góa ê jı̍t-chí pí cháu-bûn-su--ê khah-kín, Kín-kín kè--khì, bô khòaⁿ-kìⁿ sím-mı̍h hok-khì.

26

Kín-kín kè-khì chhin-chhiūⁿ khòai-chûn; Koh chhin-chhiūⁿ eng kín-kín pe--lo̍h-khì la̍k-mı̍h.

27

Góa nā kóng beh bōe-kì-tit góa ê ai-òan, Beh kóe góa ê iu-iông chòe hoaⁿ-hí;

28

Góa chiū kiaⁿ góa chiah ê iu-khó͘; In-ūi góa chai Lí tek-khak bô lia̍h góa chòe bô-chōe.

29

Góa beh siū tēng-chōe, Góa siáⁿ-sū khang-khang tio̍h-bôa ah?

30

Góa nā ēng seh ê chúi ka-kī sóe, Ēng kiⁿ chheng-khì góa ê chhiú,

31

Lí beh hiat góa tī kau-á-tóe, Góa ê saⁿ iā beh iàm-ò͘ⁿ góa.

32

In-ūi I m̄-sī sè-kan lâng chhin-chhiūⁿ góa, hō͘ góa thang ìn I, Iā hō͘ góan thang tùi-sìn.

33

Góan tiong-kan bô ū phòaⁿ-tòan--ê. Thang hō͘ góan jī-pí hâng-ho̍k i.

34

Gōan I sóa I ê kóaiⁿ-á lî-khui góa, Bô ēng I ê ui-giâm hō͘ góa kiaⁿ;

35

Góa chiū káⁿ kóng, iā bô kiaⁿ I; Chóng-sī góa pún m̄-sī hit-khóan.