Iok-pek-kì 第 8 章 - 巴克禮全羅

1

Su-a lâng Pí-le̍k-ta̍t ìn kóng,

2

Chiah ê ōe lí beh kóng kàu tī-sî? Lí chhùi-lāi ê ōe chhin-chhiūⁿ kông-hong beh kàu jōa-kú?

3

Siōng-tè kiám ū phian-su lâi sím-phòaⁿ? Chôan-lêng--ê kiám ū phian-su, bô kong-gī?

4

Lí ê kiáⁿ-jî nā ū tek-chōe I, I kau-hù in tī in ê kè-sit ê chhiú-thâu.

5

Lí nā tì-ì chhē Siōng-tè, Koh tùi Chôan-lêng--ê kiû un;

6

Lí nā chheng-khì chèng-tı̍t, I beh ūi-tio̍h lí chhíⁿ--khí-lâi, Koh hō͘ lí kong-gī ê chhù heng-thong.

7

Lí khí-thâu sui-jiân bî-sòe, Kàu-bé beh chin hoat-ta̍t.

8

Chhiáⁿ lí chhâ-mn̄g chêng-tāi, Tui-liām in ê lia̍t-chó͘ só͘ chhâ-chhut-ê;

9

In-ūi lán put-kò sī cha-hng chiah ū, m̄-chai pòaⁿ-hāng; Lán tī sè-kan ê jı̍t-chí chhin-chhiūⁿ iáⁿ;

10

In kiám bô kà-sī lí, kā lí kóng, Kóng-chhut i sim-pak ê ōe?

11

Lô͘-úi bô thô͘-bê, ōe hoat mah? Lô͘-tek bô chúi, ōe tōa châng mah?

12

Tng i chhiⁿ-chhùi, iáu-bē koah-khí-lâi, Pí lóng-chóng ê chháu tāi-seng ko͘-tâ.

13

Kìⁿ-nā bōe-kì-tit Siōng-tè ê lâng, i ê lō͘-kèng iā sī án-ni; Bô kèng-khiân ê lâng, i ê ǹg-bāng beh bô--khì.

14

I só͘ i-óa-ê beh cho̍at-tn̄g; I só͘ óa-khò-ê sī ti-tu-bāng.

15

I beh óa-khò chhù, chóng-sī chhù beh tó; I beh khîⁿ-tiâu chhù, chóng-sī chhù bōe kú-tn̂g tī-teh.

16

I siū jı̍t chiò, chiū chhiⁿ-chhùi. I ê tîn soan kàu móa-hn̂g.

17

I ê kun khûn tī chio̍h-tui, Thàu-kàu chio̍h ê só͘-chāi.

18

I nā tùi i ê só͘-chāi tû-khì, hit só͘-chāi chiū m̄ sêng-jīn i, Kóng, Góa bē-bat khòaⁿ-kìⁿ lí.

19

Khòaⁿ ah, che chiū-sī i ê lō͘ ê khòai-lo̍k, Í-āu beh ū pa̍t-ê tùi tōe--nih siⁿ--chhut-lâi.

20

Khòaⁿ ah, Siōng-tè tek-khak bô khì-sak ôan-chôan ê lâng, Iā bô hû-chō͘ kiâⁿ-pháiⁿ ê lâng.

21

I iáu beh hō͘ lí móa-chhùi chhiò-gī-gī, Hō͘ lí ê chhùi-tûn chhut hoaⁿ-hí ê siaⁿ.

22

Òan-hūn lí ê lâng beh móa-sin kiàn-siàu, Pháiⁿ-lâng ê pò͘-pîⁿ beh kui tī bô.