Iok-pek-kì 第 7 章 - 巴克禮全羅

1

Lâng tī sè-kan kiám-m̄-sī lô-khó͘ ê sî-kî mah? I ê jı̍t-chí kiám m̄-sī chhin-chhiūⁿ chhiàⁿ-kang lâng ê jı̍t-chí mah?

2

Chhin-chhiūⁿ lô͘-po̍k chhiat-chhiat him-bō͘ jı̍t-lo̍h ê iáⁿ, Chhin-chhiūⁿ chhiàⁿ-kang lâng ǹg-bāng kang-chîⁿ;

3

Góa iā án-ni it-tēng keng-kè chōe-chōe khang-hu ê ge̍h, Koh ū ià-siān ê mî kā góa tiāⁿ-tio̍h.

4

Góa tó-teh ê sî, chiū kóng, Sím-mı̍h sî thang khí-lâi? mî kàu hiah tn̂g. Góa hoan-lâi hoan-khì tı̍t-tı̍t kàu thiⁿ-kng.

5

Góa kui seng-khu lóng sī thâng kap kui-tè ê thô͘; Góa ê phê-hu siu chhùi, chiū koh chhut-lâng.

6

Góa ê jı̍t-chí pí so khah-kín, Tı̍t-tı̍t kè-khì bô só͘ ǹg-bāng.

7

Tio̍h kì-tit góa ê o̍ah-miā ná chhóan chı̍t ê khùi; Góa ê ba̍k-chiu bōe koh khòaⁿ-kìⁿ hó-kéng.

8

Khòaⁿ góa ê lâng, i ê ba̍k-chiu beh bô koh khòaⁿ-kìⁿ góa; Lí ê ba̍k-chiu beh siòng góa, chóng-sī góa bô tī-teh.

9

Hûn siau-sòaⁿ chiū kè-khì, Án-ni, lâng lo̍h im-kan iā bōe koh khí-lâi.

10

I bô koh tò-lâi ka-kī ê ke, Pún só͘-chāi iā bô koh jīn-tit i.

11

Só͘-í góa bô beh iok-sok góa ê chhùi; Góa ê sîn iu-khó͘, góa beh án-ni kóng-chhut. Góa ê sim khó͘-thàng, góa beh án-ni hun-sò͘.

12

Góa kiám-sī tōa-hái, á-sī kau-lêng mah? Lí kéng-jiân siat chı̍t-ê kam(**kám)-sī góa ê ah?

13

Góa nā kóng, Góa ê bîn-chhn̂g beh an-ùi góa, Góa ê chhn̂g-pho͘ beh kóe góa ê iu-būn;

14

Lí chiū ēng bîn-bāng hō͘ góa kiaⁿ, Ēng īⁿ-siōng hō͘ góa lún.

15

Tì-kàu góa ài chhui-sí; Ài sí-bô, khah-iâⁿ chhun chiah ê kut.

16

Góa iàm-hūn sìⁿ-miā, m̄-ài éng-óan o̍ah-teh; Gōan lí chhut-chāi góa; in-ūi góa ê jı̍t-chí lóng-sī khang-hu.

17

Lâng sī sím-mı̍h, tì-kàu Lí lia̍h i chòe-tōa, Tì-kàu Lí chiong i khòa tī sim--nih,

18

Tì-kàu Lí ta̍k chá-khí kàm-chhat i, Sî-khek chhì-giām i?

19

Lí beh kàu tī-sî chiah o̍at-tńg bô khòaⁿ góa, Khoan góa tiap-á-kú, hō͘ góa thun-nōa-cheh?

20

Kàm-chhat lâng--ê ah, góa nā ū chōe, gāi-tio̍h Lí sím-mı̍h? Lí siáⁿ-sū ēng góa chòe Lí ê chìⁿ-pé? Tì-kàu góa khòaⁿ ka-kī chòe tāng-tàⁿ.

21

Lí siáⁿ-sū m̄ sià-bián góa ê kè-sit, tû-khì góa ê chōe-kòa? In-ūi góa taⁿ beh tó tī tîn-ai; Lí beh tì-ì chhē góa, chóng-sī góa í-keng bô tī-teh.