Iok-pek-kì 第 6 章 - 巴克禮全羅

1

Iok-pek ìn kóng.

2

Gōan góa ê iu-būn kè chhìn-tāng, Gōan góa it-chhè ê chai-hāi pîⁿ-pîⁿ hē tī thian-phêng;

3

Tek-khak pí hái-soa khah-tāng; Só͘-í góa ê ōe lōan-lōan kóng.

4

In-ūi Chôan-lêng--ê ê chìⁿ siā-tio̍h góa; Góa ê sim-sîn lim-tio̍h i ê to̍k. Siōng-tè hō͘ góa kiaⁿ ê sū pâi-tīn kong-kek góa.

5

Iá-lû ū chháu, kiám beh chhut-siaⁿ? Gû ū chháu-liāu, kiám beh háu mah?

6

Mı̍h chiáⁿ bô chham iâm, kiám ōe chia̍h-tit mah? Nn̄g ê chheng kiám ū chu-bī mah?

7

Góa ê sim iàm-chiān, m̄-ài kha̍p-tio̍h ê, In chòe góa pháiⁿ bī-sò͘ ê chia̍h-mı̍h.

8

Gōan góa tit-tio̍h só͘-kiû-ê; Góa só͘ him-bō͘-ê gōan Siōng-tè siúⁿ-sù góa.

9

Chiū-sī gōan Siōng-tè teh-chhùi góa, Pàng I ê chhiú, lâi cho̍at góa ê sìⁿ-miā.

10

Nā án-ni, góa chiū tit-tio̍h an-ùi; Tī thòng-khó͘ bô tit-tio̍h lîn-bín ê tiong-kan, iáu ōe khòai-lo̍k; In-ūi góa bô ûi-pōe Chì-sèng--ê ê ōe.

11

Góa ū sím-mı̍h khùi-la̍t, hō͘ góa iáu teh ǹg-bāng? Góa ū sím-mı̍h kiat-kio̍k, hō͘ góa iáu thang thun-lún?

12

Góa ê la̍t kiám sī chio̍h ê la̍t? Góa ê bah kiám sī tâng-ê mah?

13

Pang-chān góa-ê, kiám-m̄-sī lóng bô--khì mah? Góa ê tì-hūi, kiám-m̄-sī lī-khui góa khì mah?

14

Cho̍at-bāng ê lâng, chiū nā bô kèng-ùi chôan-lêng ê Chú, I ê pêng-iú iā tio̍h ēng jîn-chû khóan-thāi i.

15

Góa ê hiaⁿ-tī gō͘ góa, chhin-chhiūⁿ khoe, Koh chhin-chhiūⁿ khoe-chúi lâu-kè ê tōe;

16

In-ūi ū peng-tè chiū lô, Ū seh khǹg tī hí(**hit) lāi-bīn;

17

Sio-lō ê sî-chūn, in chiū siau-bô, Jo̍ah ê sî, chiū tùi in ê só͘-chāi ta--khì.

18

Iân-khoe kui-tīn teh-kiâⁿ ê lâng oan-lâi oat-khì, In chiūⁿ kàu pha-hng ê só͘-chāi chiū sí.

19

Thê-má kui-tīn kiâⁿ ê lâng teh liâu-bāng, Sī-pa kui-kûn ê lâng teh thèng-hāu.

20

In ūi-tio̍h só͘ ǹg-bāng lâi kiàn-siàu, kàu-tè chiū làu-khùi.

21

Taⁿ lín chin-chiàⁿ bô mı̍h; Khòaⁿ-kìⁿ thang kiaⁿ ê sū chiū lún.

22

Góa kiám bat kóng, Chhiáⁿ lín hō͘ góa? Á-sī, Tùi lín ê châi-sán ēng mı̍h sàng góa?

23

Á-sī, Kiù góa thoat-lī tùi-te̍k ê chhiú ah? Á-sī, Sio̍k góa thoat-lī kiông-pō ê lâng ê chhiú ah?

24

Chhiáⁿ lín kà-sī góa, góa chiū chēng-chēng; Iā hō͘ góa bêng-pe̍k tī sím-mı̍h sū ū chhò-gō͘.

25

Chèng-tı̍t ê ōe, i ê la̍t tōa kàu cháiⁿ-iūⁿ! Chóng-sī lín teh piān-pok, sī piān-pok sím-mı̍h?

26

Lín siūⁿ beh piān-pok lâng ê ōe mah? Cho̍at-bāng ê lâng ê giân-lūn, sī chhin-chhiūⁿ hong.

27

Lín liam-khau ài tit-tio̍h bô-pē ê kiáⁿ, Ēng lí ê pêng-iú chòe bóe-bōe ê mı̍h.

28

Taⁿ chhiáⁿ lín kam-gōan khòaⁿ góa; Góa koat-tòan bô tng lín ê bīn lâi kóng pe̍h-chha̍t.

29

Chhiáⁿ lín o̍at-tńg, m̄-thang ū put-gī, Koh o̍at-tò-tńg, góa ê kong-gī iáu-kú tī-teh.

30

Góa ê chı̍h ū put-gī mah? Góa ê chhùi bōe hun-piat chai-hāi mah?