Iok-pek-kì 第 14 章 - 巴克禮全羅

1

Tùi hū-jîn-lâng só͘ siⁿ ê lâng jı̍t-chí té-chió, Ū chōe-chōe hôan-ló.

2

I chhut chhin-chhiūⁿ hoe, sòa siā-khì, I cháu-khì chhin-chhiūⁿ iáⁿ, iā bô thêng-teh.

3

Chhin-chhiūⁿ chit-hō ê lâng, Lí kiám khui Lí ê ba̍k-chiu khòaⁿ i ah? Koh chhōa góa siū Lí ê sím-phòaⁿ?

4

Chī-chūi ōe hō͘ chheng-khì-ê tùi bô chheng-khì-ê chhut-lâi? Bô chı̍t-ê ōe.

5

I ê jı̍t-chí kì-jiân siū hān-tiāⁿ, i ê ge̍h ê siàu-gia̍h chāi-tī Lí; Lí iā siat i ê kài-hān, hō͘ i bōe-ōe pôaⁿ-kè;

6

Chiū kiû Lí ba̍k-chiu o̍at-tńg bô khòaⁿ i, hō͘ i ōe an-tit, Chhin-chhiūⁿ chhiàⁿ-kang lâng chòe-ôan i ê kang.

7

In-ūi chhiū nā chhò--khí-lâi, iáu-kú ū ǹg-bāng koh puh-íⁿ; Nńg ê ki hoat bô soah.

8

Sui-jiân i ê kun tī tōe--nih chin lāu, I ê châng iā sí tī thô͘--nih;

9

Kàu tit-tio̍h chúi lūn-te̍k chiū ōe koh hoat-íⁿ, Iā chhin-chhiūⁿ chai-chèng ê mı̍h hoat-ki.

10

Chóng-sī lâng sí, chiū tó tı̍t-tı̍t, Khùi chı̍t-ē tn̄g, lâng tī toh-lo̍h?

11

Hái-tiong ê chúi beh cho̍at-tn̄g, Hô-chúi beh siau-bô ta--khì;

12

Lâng iā-sī án-ni, tó-lo̍h-khì bōe koh khí-lâi, Kàu thiⁿ bô--khì, iā bōe cheng-sîn; Tn̂g-tn̂g khùn kiò bōe chhíⁿ.

13

Gōan Lí khǹg góa tī im-kan, Siu góa tī ún-ba̍t ê só͘-chāi, thèng-hāu Lí ê siū-khì soah, Kā góa tiāⁿ-tio̍h jı̍t-kî, lâi kì-liām góa.

14

Lâng sí ōe koh-o̍ah mah? Góa chiū thun-lún góa lô-khó͘ ê jı̍t, Thèng-hāu góa thòe-ōaⁿ ê jı̍t kàu.

15

Lí chı̍t-ē kiò, góa chiū ìn Lí; Lí ōe him-bō͘ Lí ê chhiú só͘-chòe-ê.

16

Chóng-sī taⁿ Lí sǹg góa ê kha-pō͘; Kiám bô kàm-chhat góa ê chōe-kòa mah?

17

Góa ê kè-sit hō͘ Lí hong tī tē-á-lāi; Góa ê chōe-kòa Lí pa̍k tiâu-tiâu.

18

Soaⁿ pang chiū sòaⁿ-sòaⁿ khì, Chio̍h-thâu sóa-lī i ê pún-ūi.

19

Chúi ōe bôa-liáu chio̍h-thâu; Tōa-chúi ōe chhiong-bô tōe-chiūⁿ ê thô͘; Lí iā án-ni cho̍at lâng ê ǹg-bāng.

20

Lí éng-óan khah-iâⁿ i, i chiū kè-khì; Lí piàn-ōaⁿ i ê bīn-māu, lâi chhe i khì.

21

I ê kiáⁿ-jî tit-tio̍h êng-kng, i m̄-chai, In tú-tio̍h kàng-kē, i iā m̄-chai.

22

To̍k-to̍k i ê jio̍k-sin ka-kī teh thàng-thiàⁿ, I ê sîn-hûn ka-kī teh iu-būn.