Iok-pek-kì 第 15 章 - 巴克禮全羅

1

Thê-bān lâng Í-lī-hoat ìn kóng,

2

Tì-hūi ê lâng kiám beh ēng khang-hu ê tì-sek lâi ìn, Á-sī ēng tang-hong chhiong-móa i ê pak-tó͘ mah?

3

I kiám beh ēng bô lī-ek ê ōe, Kap bô lō͘-ēng ê ōe lâi piān-lūn mah?

4

Lí sı̍t-chāi hòe-bô kèng-ùi, Tī Siōng-tè ê bīn-chêng chó͘-tòng kèng-khiân ê sim.

5

In-ūi lí ê chōe-kòa kà-sī lí ê chhùi, Lí kéng khúi-chà ê lâng ê chı̍h.

6

Tēng lí ê chōe--ê sī lí ê chhùi, m̄-sī góa; Lí ê chhùi-tûn kan-chèng lí ê m̄-tio̍h.

7

Lí sī thâu-chı̍t-ê chhut-sì ê lâng mah? Á-sī pí chiah ê soaⁿ khah tāi-seng siū-chō mah?

8

Siōng-tè pì-ba̍t ê chí-ì, lí bat thiaⁿ-kìⁿ mah? Tì-hūi kiám sī lí to̍k tit mah?

9

Ū sím-mı̍h lí chai, góan m̄-chai mah? Á-sī lí bêng-pe̍k, góan bô bêng-pe̍k ah?

10

Góan tiong-kan ū thâu-mn̂g pe̍h ê, kap nî-lāu ê, Pí lí ê lāu-pē iáu khah lāu.

11

Siōng-tè ê an-ùi, í-kı̍p I un-hô khǹg lí ê ōe, Lí khòaⁿ-chòe sió-khóa mah?

12

Lí ê sim siáⁿ-sū lia̍h lí khì? Lí ê ba̍k-chiu siáⁿ-sū teh gîn?

13

Chiah hō͘ lí ê sîn hóan-tùi Siōng-tè, Iā hō͘ lí ê chhùi kóng hiah ê ōe.

14

Sè-kan lâng sī sím-mı̍h, ōe sǹg-chòe chheng-khì ah? Hū-jîn-lâng só͘-siⁿ-ê sī sím-mı̍h, ōe sǹg-chòe kong-gī mah?

15

Khòaⁿ ah, Siōng-tè bô sìn-jīm I ê sèng-ê; Chiah ê thiⁿ tī I bīn-chêng iā bô chheng-khì.

16

Hô-hòng khó-ò͘ⁿ hú-pāi ê lâng, Lim chōe-ok chhin-chhiūⁿ lim-chúi-ê ah?

17

Góa beh chí-sī lí, lí tio̍h thiaⁿ góa; Góa beh kóng-khí só͘ khòaⁿ-kìⁿ ê.

18

(Chiū-sī tì-hūi ê lâng tùi lia̍t-chó͘ só͘ thôan lâi, Iā bô ún-ba̍t ê.

19

Chit ê tōe to̍k-to̍k siúⁿ-sù in; Iā bô gōa-lâng tùi in tiong-kan keng-kè.)

20

Pháiⁿ-lâng it-seng ê jı̍t-chí sī thòng-khó͘, Chiū-sī ūi kiông-pō ê lâng só͘ tiāⁿ-tio̍h ê nî-gia̍h.

21

Thang kiaⁿ ê siaⁿ siông-siông tī i hī-khang; Tī pêng-an ê sî, húi-bia̍t--ê beh kàu i hia.

22

I m̄-sìn ōe tùi o͘-àm tńg--lâi; I hō͘ to-kiàm thèng-hāu i.

23

I sì-kòe liû thó chia̍h, kóng, Toh-lo̍h ū ah? I chai ū o͘-àm ê jı̍t piān-piān teh thèng-hāu i.

24

Hōan-lān khùn-khó͘ hō͘ i kiaⁿ-hiâⁿ, koh iâⁿ i; Chhin-chhiūⁿ kun-ông pī-pān chhut tīn chı̍t-iūⁿ.

25

In-ūi i chhun-chhiú kong-kek Siōng-tè, Ēng kiau-ngō͘ khòng-kū Chôan-lêng--ê.

26

I ēng ngī ê ām-kún, kāu ê tîn-pâi, Cháu-lâi tí-te̍k Chôan-lêng--ê.

27

In-ūi i ê bīn chin pûi, I ê io pûi kàu ū lâ.

28

I khiā-khí tī hong-hòe ê siâⁿ, Bô lâng khiā-khí ê chhù, Chiū-sī tit-beh piàn-chòe thô͘-tui ê.

29

I bōe tit-tio̍h hó-gia̍h, châi-bu̍t bōe tn̂g-tn̂g tī-teh; In ê thó͘-sán iā bōe siⁿ-thòaⁿ tī tōe--nih.

30

I bōe thoat-lī o͘-àm; Hé-iām beh sio-ta i ê ki, I beh tùi Siōng-tè chhùi-lāi ê khì lâi bô--khì.

31

I m̄-thang óa-khò hu-ké, lâi ka-kī phiàn; In-ūi hu-ké beh chiâⁿ-chòe i ê pò-èng.

32

I ê jı̍t-kî bē kàu ê tāi-seng, chit ê tāi-chì beh chiâⁿ; I ê ki bōe chhiⁿ-chhùi.

33

I beh chhin-chhiūⁿ phû-tô-chhiū, i ê lia̍p bē se̍k chiū lak, Koh chhin-chhiūⁿ kaⁿ-ná-chhiū lak i ê hoe.

34

Bô khiân-sêng ê lūi tek-khak bô siⁿ-thòaⁿ, Pò͘-lō͘--ê ê pò͘-pîⁿ, beh hō͘ hé sio--khì.

35

In hôai-īn chân-hāi, siⁿ-chhut chōe-gia̍t, Pak-lāi só͘ pī-pān-ê sī khúi-chà.