Iok-pek-kì 第 17 章 - 巴克禮全羅

1

Góa ê khùi cho̍at lah, góa ê jı̍t-chí bia̍t-chīn lah; Góa ê hûn-bōng piān lah.

2

Sı̍t-chāi ū ki-chhì góa-ê tī góa chia; góa ê ba̍k-chiu siông-siông khòaⁿ-kìⁿ in chhì-kek góa ê sū.

3

Gōan Lí ēng chún-tǹg hō͘ góa, kā góa chòe pó-jīn tī Lí ê bīn-chêng, Ū chī-chūi khéng kap góa tùn-chhiú?

4

In-ūi Lí jia-khàm in ê sim, hō͘ in bô bêng-lí, Só͘-í Lí bô beh hō͘ in seng-kôaiⁿ.

5

Lâng kau-hù i ê pêng-iú khì hō͘ lâng chhiúⁿ-to̍at, I ê kiáⁿ ê ba̍k-chiu beh sit-bêng.

6

Góa chiâⁿ-chòe peh-sìⁿ-tiong ê chhiàu-tâm; Góa hō͘ lâng nōa phùi kàu bīn--nih.

7

Góa ê ba̍k-chiu in-ūi iu-būn lâi ian-n̄g, Góa ê pah-thé lóng chhin-chhiūⁿ iáⁿ.

8

In-ūi án-ni chèng-tı̍t ê lâng beh gông-ngia̍h, Bô-chōe ê lâng beh kek-lē ka-kī lâi kong-kek bô kèng-khiân ê lâng.

9

Gī ê lâng iā beh kian-siú i só͘ kiâⁿ ê lō͘, Chhiú chheng-khì ê lâng beh ná ke-thiⁿ i ê khùi-la̍t.

10

Chóng-sī lín chèng-lâng chhiáⁿ lín koh lâi, In-ūi lín tiong-kan góa chhē bô chı̍t-ê tì-hūi ê lâng.

11

Góa ê jı̍t-chí í-keng kè-sin, góa ê kè-e̍k, Góa ê sim só͘-siūⁿ-ê, í-keng tōan-cho̍at.

12

In lia̍h mî chòe jı̍t, kóng, Kng kūn tī o͘-àm.

13

Góa nā ǹg-bāng im-kan chòe góa ê chhù, Góa nā pho͘ bîn-chhn̂g tī o͘-àm tiong;

14

Góa nā tùi hiú-nōa kóng, Lí sī góa ê lāu-pē, Tùi thâng kóng, Lí sī góa ê lāu-bú góa ê chí-bē;

15

Án-ni góa ê ǹg-bāng tī toh-lo̍h? Góa ê ǹg-bāng chī-chūi ōe khòaⁿ-kìⁿ ah?

16

Kàu chòe-chı̍t-ē an-hioh tī thô͘--nih ê sî, Che ǹg-bāng beh lo̍h-kàu im-kan ê mn̂g-chhòaⁿ hia.