Iok-pek-kì 第 18 章 - 巴克禮全羅

1

Su-a lâng Pí-le̍k-ta̍t ìn kóng,

2

Lí teh chhē ōe-phāng beh kàu sím-mı̍h sî ah? Lí tio̍h chim-chiok siūⁿ, jiân-āu góan chiah kóng.

3

Góan siáⁿ-sū hō͘ lí lia̍h-chòe cheng-siⁿ, Hō͘ lí khòaⁿ-chòe lāu-siông ah?

4

Lí chit-ê tōa siū-khì thiah-lı̍h ka-kī ê, Tōe kiám ōe ūi-tio̍h lí lâi siū khì-sak mah? Chio̍h-pôaⁿ kiám ōe sóa-khui gôan-ūi mah?

5

Pháiⁿ-lâng ê kng sı̍t-chāi beh hoa, I ê hé-iām beh bô kng.

6

I pò͘-pîⁿ-lāi ê kng beh pìⁿ-chòe o͘-àm, I téng-bīn ê teng iā beh hoa--khì.

7

I giám-ngī ê kha-pō͘, beh tú-tio̍h chó͘-gāi, I ê kè-bô͘ beh pòaⁿ-tó i ka-kī.

8

In-ūi i ê kha hāi i ka-kī jı̍p hām-khiⁿ, I kiâⁿ tī o̍ah-tauh ê téng-bīn.

9

Khôan-thò beh tîⁿ-tio̍h i ê kha-āu-tiⁿ, Lô-bāng beh lia̍h-tio̍h i.

10

O̍ah-khàu ūi-tio̍h i tâi tī thô͘--nih, Pòaⁿ-soh ūi-tio̍h i tiuⁿ tī lō͘-nih.

11

Sì-ûi ū kiaⁿ-hiâⁿ, beh hō͘ i kiaⁿ, Koh tui-kóaⁿ i ê kha-āu-tiⁿ.

12

I ê khùi-la̍t beh soe-bî, Chai-ē piān-piān tī i ê sin-piⁿ.

13

I beh thun i ê phê-bah. Pháiⁿ chèng-thâu beh thun-chia̍h i ê chi-thé.

14

I beh tī só͘ óa-khò ê pò͘-pîⁿ siū pu̍ih--chhut-lâi, Tòa kàu thang kiaⁿ ê ông hia.

15

Bô sio̍k-i--ê beh khiā-khí tī i ê pò͘-pîⁿ; Beh ū jiû-n̂g iā tī i só͘ khiā-khí ê só͘-chāi.

16

Tī ē-tóe i ê kun-thâu beh ko͘-tâ, Tī téng-bīn i ê ki beh chián-tû.

17

I ê kì-liām beh bia̍t-bô tī tōe-chiūⁿ, I ê miâ-jī iā bô lâu tī koe-chhī--nih.

18

I beh tùi kng-bêng-tiong siū kóaⁿ kàu o͘-àm; Koh beh siū kóaⁿ-chhut sè-kài.

19

Tī i ê peh-sìⁿ-tiong beh bô-kiáⁿ bô-sun, Tī i kià-kha ê só͘-chāi, iā bô lâu chı̍t-lâng tī-teh.

20

Ūi-tio̍h i ê jı̍t-chí, āu-lâi ê lâng gông-ngia̍h, Chhin-chhiūⁿ chêng ê lâng ê kiaⁿ-hiâⁿ.

21

Put-gī ê lâng ê ke, sı̍t-chāi sī án-ni, Che chiū-sī m̄-bat Siōng-tè ê lâng ê só͘-chāi.