Iok-pek-kì 第 19 章 - 巴克禮全羅

1

Iok-pek ìn kóng,

2

Lín hō͘ góa ê sim iu-khó͘, Ēng ōe siong-hāi góa, beh kàu tī-sî ah?

3

Lín che cha̍p-pái lêng-jio̍k góa, Lín pháiⁿ khóan-thāi góa, iā bô ka-kī kiàn-siàu.

4

Góa nā kó-jiân ū kè-sit, Che kè-sit sī chāi-tī góa ka-kī.

5

Lín kó-jiân beh tùi góa khoa-kháu tōa, Koh ēng góa ê lêng-jio̍k chek-pī góa;

6

Chiū tio̍h chai che sī Siōng-tè óng-khut góa, Ēng I ê lô-bāng ûi góa.

7

Khòaⁿ ah, góa in-ūi oan-óng lâi âu-kiò, iā bô tit-tio̍h thiaⁿ, Góa háu-kiù, iā bô tit-tio̍h kong-tòan.

8

I ûi-cha̍h góa ê lō͘, hō͘ góa bōe-tit kè-khì, Koh hō͘ góa ê lō͘-kèng o͘-àm.

9

I thǹg--khì góa ê êng-kng, Liù--khì góa ê thâu-khak-téng ê bián-liû.

10

I tī sì-ûi húi-hōai góa, góa chiū bô--khì; Góa ê ǹg-bāng pu̍ih--khí-lâi, chhin-chhiūⁿ pu̍ih chhiū.

11

I ê siū-khì lia̍t-lia̍t kong-kek góa, I lia̍h góa chòe I ê tùi-te̍k ê chı̍t-ê.

12

I ê kun-peng chı̍t-chôe lâi, chō in ê lō͘ lâi kong-kek góa, Chat-iâⁿ tī góa ê pò͘-pîⁿ ê sì-ûi.

13

I hō͘ góa ê hiaⁿ-tī keh-khui hn̄g-hn̄g, Saⁿ-bat ê lâng kap góa chhiⁿ-so͘.

14

Góa ê chhin-lâng kap góa tōan-cho̍at, Góa chhin-bı̍t ê pêng-iú lóng bōe kì-tit góa.

15

Kià-kha tī góa chhù-lāi ê lâng, í-kı̍p góa ê lú-pī, lóng khòaⁿ góa chòe gōa-lâng; In khòaⁿ góa chòe gōa-pang lâng.

16

Góa kiò góa ê lô͘-po̍k, i m̄ ìn, Góa tio̍h chhin-chhùi kiû i.

17

Góa chhùi ê khì-bī hō͘ góa ê bó͘ iàm-chiān; Kap góa siâng-pak-ê iā iàm-chiān góa ê chhàu-bī.

18

Liân gín-ná iā khòaⁿ-khin góa; góa nā khí-lâi, in lóng ki-chhì góa.

19

Góa chhin-bı̍t ê pêng-iú lóng iàm-chiān góa; Góa pêng-jı̍t só͘ thiàⁿ ê lâng, tùi góa pìⁿ-bīn.

20

Góa ê phê mo͘h tī góa ê kut; Góa chí-ū chhun chhùi-khí-hōaⁿ.

21

Góa ê pêng-iú ah, lín tio̍h khó-lîn góa, khó-lîn góa; In-ūi Siōng-tè ê chhiú bong--tio̍h góa.

22

Lín siáⁿ-sū chhin-chhiūⁿ Siōng-tè khún-pek góa, Lia̍h góa ê bah chòe bô thang pá-chiok mah?

23

Taⁿ gōan chiong góa ê ōe siá--khí-lâi, Koh kì tī chheh--nih;

24

Ēng thih-chām ēng iân khek-tiâu tī chio̍h--nih; Hō͘ i éng-éng tī-teh.

25

In-ūi góa chai kiù-sio̍k góa--ê sī o̍ah-ê; Jı̍t-āu i beh khiā tī thô͘ ê téng-bīn;

26

Góa chit ê phê pāi-hōai liáu-āu, Góa beh tī jio̍k-thé ê gōa-bīn tit-tio̍h kìⁿ Siōng-tè.

27

Góa pún-sin beh khòaⁿ-kìⁿ I sī ūi-góa--ê, Góa chhin-ba̍k khòaⁿ-kìⁿ I m̄-sī gōa-lâng; Góa ê sim-tn̂g tī góa ê lāi-bīn kàu iûⁿ--khì.

28

Lín nā kóng, Góan beh cháiⁿ-iūⁿ khún-pek i! Tāi-chì ê kun-pún chāi-tī góa;

29

Lín tio̍h kiaⁿ to-kiàm, in-ūi siū-khì chiū ū to-kiàm ê hêng-ho̍at, Hō͘ lín chai ū sím-phòaⁿ.