Iok-pek-kì 第 20 章 - 巴克禮全羅

1

Ná-má lâng Só-hoat ìn kóng,

2

Góa ê sim-lāi tio̍h-kip, Só͘-í góa ê sim-su pek góa tio̍h ìn.

3

Góa thiaⁿ-kìⁿ hit ê lêng-jio̍k Góa ê chek-pī, Góa tì-hūi ê sim kà góa ìn.

4

Lí kiám m̄-chai tùi kó͘-chá, Tùi ū lâng tī sè-kan í-lâi;

5

Pháiⁿ-lâng ê tāi-ia̍t bô kú-tn̂g, Bô kèng-khiân ê lâng ê hoaⁿ-hí ba̍k-nih-kú nā-tiāⁿ?

6

I ê kôaiⁿ sui-jiân tú-thiⁿ, I ê thâu-khak sui-jiân kàu hûn--nih;

7

I kàu-bé beh bia̍t-bô, chhin-chhiūⁿ i ê pùn chı̍t-iūⁿ; Pêng-sò͘ khòaⁿ-kìⁿ i ê lâng beh kóng, I tī toh-lo̍h ah?

8

I beh chhin-chhiūⁿ bîn-bāng pe--khì, bô thang chhē-tio̍h; I beh siū kóaⁿ-cháu, chhin-chhiūⁿ mî--sî ê īⁿ-siōng.

9

Pêng-sò͘ khòaⁿ-kìⁿ i ê, i ê ba̍k-chiu bōe koh khòaⁿ-kìⁿ i; I ê pún só͘-chāi iā bô koh khòaⁿ-kìⁿ i.

10

I ê kiáⁿ-jî beh tùi sòng-hiong lâng kiû-un, I ê chhiú beh hêng hè-châi.

11

I ê kut móa-móa ū siàu-liân ê la̍t; Chóng-sī beh kap i saⁿ-kap tó tī thô͘--nih.

12

Chōe-ok tī i ê chhùi sui-jiân tiⁿ, Sui-jiân i khǹg tī i ê chı̍h-ē;

13

Sui-jiân pó-sioh, m̄-khéng pàng-sak, Tiāⁿ-tiāⁿ kâm tī i ê chhùi;

14

I ê chia̍h-mı̍h kàu i ê tn̂g-á chiū piàn, Chiâⁿ-chòe to̍k-chôa ê táⁿ tī i ê lāi-bīn.

15

I thun-chia̍h châi-pó, beh koh thò͘-chhut; Siōng-tè beh tùi i ê pak-tó͘ jîm--chhut-lâi.

16

I beh suh to̍k-chôa ê to̍k; Chôa ê chı̍h iā beh hāi-sí i.

17

I bōe tit-tio̍h khòaⁿ-kìⁿ kang-hô, Lâu bı̍t kap lin ê khoe.

18

I tio̍h-bôa só͘ tit-tio̍h--ê, tio̍h hêng lâng, bô thang chia̍h--lo̍h-khì, Bōe-ōe chiàu só͘ kau-e̍k ê châi-bu̍t lâi hoaⁿ-hí.

19

In-ūi i ap-chè sòng-hiong lâng, koh khì-sak i; Kiông-chiàm lâng ê chhù, iā bōe-ōe khí-chō.

20

In-ūi i ê sim-lāi bē-bat an-chēng, I só͘ hoaⁿ-hí-ê lóng bōe pó-chôan.

21

Bô chı̍t-kiāⁿ bô hō͘ i thun--lo̍h-khì, Só͘-í i ê hok-lo̍k bōe kú-tn̂g.

22

Tng i hó-gia̍h chhiong-chiok ê sî, beh kàu o̍eh-to̍eh ê só͘-chāi; Kan-khó͘ ê lâng lóng beh chhut-chhiú phah i.

23

I ê pak-tó͘ beh pá ê sî, Siōng-tè beh kàng béng-lia̍t ê siū-khì tī i; I teh chia̍h ê sî, beh kàng siū-khì tī i ê téng-bīn.

24

I siám-lī thih ê khì-kū, Tâng ê keng beh siā-thàu i.

25

I chı̍t-ē pu̍ih i, chiū tùi i ê seng-khu chhut-lâi, Kng-nà-nà ê chìⁿ-bé beh tùi i ê táⁿ chhut; Kiaⁿ-hiâⁿ beh kàu tī i.

26

It-chhè ê o͘-àm siu-khǹg ūi-tio̍h i ê châi-pó, Lâng só͘ bô pûn ê hé beh sio-bia̍t i; Koh beh sio-húi lâu tī i ê pò͘-pîⁿ ê.

27

Thiⁿ beh hián-bêng i ê chōe-ok, Tōe beh khí-lâi kong-kek i.

28

I ê ke-hé beh bô--khì, Lóng beh siau-bia̍t tī Siōng-tè siū-khì ê jı̍t.

29

Che chiū-sī pháiⁿ-lâng tùi Siōng-tè só͘ tit ê hūn-gia̍h; Sī Siōng-tè kā i tiāⁿ-tio̍h ê sán-gia̍p.