Iok-pek-kì 第 21 章 - 巴克禮全羅

1

Iok-pek ìn kóng,

2

Lín tio̍h tì-ì thiaⁿ góa ê ōe, Ēng chit-ê chòe lín ê an-ùi.

3

Chhiáⁿ khoan-iông góa, góa beh koh kóng, Góa kóng-liáu, kù-chāi lí ki-chhì.

4

Lūn-kàu góa, góa kiám-sī tùi lâng ai-òan? Góa ê sim-sîn cháiⁿ-iūⁿ bô tio̍h-kip ah?

5

Lín tio̍h khòaⁿ góa lâi gông-ngia̍h, Ēng chhiú ng-chhùi.

6

Góa nā siūⁿ-tio̍h, chiū kiaⁿ, Thong seng-khu ngia̍uh-ngia̍uh-chhoah.

7

Pháiⁿ-lâng siáⁿ-sū o̍ah-teh, chia̍h tn̂g hè-siū, Sè-le̍k kiông-sēng ah?

8

In khòaⁿ-kìⁿ kiáⁿ-sun, kap in pîⁿ-pîⁿ sêng-lı̍p; In ê hō͘-è tī in ê ba̍k-chiu-chêng iā sī án-ni.

9

In ê ke-kòan an-jiân bô kiaⁿ; Siōng-tè ê kóaiⁿ iā bô phah in.

10

In ê gû-káng siⁿ-thòaⁿ bô tn̄g, In ê gû-bú siⁿ-kiáⁿ, iā bô tūi-thai.

11

In chhe gín-ná chhut-khì, chhin-chhiūⁿ iûⁿ-kûn, In ê kiáⁿ-jî sì-kòe tiô-thiàu.

12

In tè lin-long-kó͘ kap khîm lâi chhiùⁿ-koa, Koh in-ūi phín-siau ê siaⁿ lâi hoaⁿ-hí.

13

In tō͘ kè jı̍t, sū-sū heng-thong; ba̍k-nih-kú lo̍h im-kan.

14

In tùi Siōng-tè kóng, Tio̍h lī-khui góan, Góan m̄ ài bat Lí ê lō͘.

15

Chôan-lêng-ê sī chī-chūi, hō͘ góan tio̍h ho̍k-sāi I ah? Góan kî-kiû I, ū sím-mı̍h lī-ek ah?

16

Khòaⁿ ah, in ê hok-khì m̄-sī tī in ê chhiú; Gōan pháiⁿ-lâng ê kè-bô͘ lī-khui góa hn̄g-hn̄g.

17

Pháiⁿ-lâng ê teng beh hoa, chai-ē kàu tī in; Siōng-tè ê siū-khì hō͘ in tú-tio̍h kan-khó͘, ū jōa-chōe pái ah?

18

In chhin-chhiūⁿ hong-chêng ê chháu-á-iù, Chhin-chhiūⁿ kông-hong chhe--khì ê chho͘-khng ū jōa-chōe pái ah?

19

Lín kóng, Siōng-tè chiong i ê chōe-ok kā i ê kiáⁿ chek-chū teh; Góa kóng, M̄-ta̍t-tio̍h pò-èng i pún-sin hō͘ i ka-kī chai;

20

Hō͘ i chhin-ba̍k khòaⁿ-kìⁿ ka-kī pāi-hōai, Pún-sin lim Chôan-lêng-ê ê siū-khì.

21

I ê nî-ge̍h pòaⁿ-tiong-tn̂g cho̍at-tn̄g, Kè-sì-liáu, i tī i ê ke ū sím-mı̍h khòai-lo̍k ah?

22

Siōng-tè sím-phòaⁿ hiah-ê tī kôaiⁿ-ūi ê, Chī-chūi ōe chiong tì-sek kà-sī I ah?

23

Ū lâng kàu-sí khùi-la̍t chiâu-pī, Móa-móa tit-tio̍h pêng-chēng an-jiân.

24

I ê heng-ha̍h chin pûi, I ê kut-chhé lūn-te̍k.

25

Ū-lâng kàu-sí, sim thòng-khó͘, Lóng bē-bat chhì-tio̍h hok-khì.

26

In lóng chı̍t-iūⁿ tó tī thô͘--nih, Hō͘ thâng khàm-ba̍t.

27

Khòaⁿ ah, góa chai lín ê ì-sù, Kap lín oan-óng góa ê kè-bô͘.

28

In-ūi lín kóng, Pà-ông ê chhù tī toh-lo̍h? Pháiⁿ-lâng pêng-sî khiā-khí ê chhù tī toh-lo̍h?

29

Lín bô mn̄g kè-lō͘ ê lâng mah? Kiám bōe jīn-tit in ê chèng-kù mah?

30

Chiū-sī pháiⁿ-lâng tī chai-ē ê jı̍t tit-tio̍h lâu-teh, Tī siū-khì ê jı̍t tit-tio̍h thoat-lī.

31

I só͘-kiâⁿ-ê, chī-chūi tng-bīn kóng i? I só͘-chòe-ê, chī-chūi pò-èng i?

32

Chóng-sī i ōe hō͘ lâng kng kàu thióng-soaⁿ, Koh ū kò͘-siú--ê tī i ê bōng.

33

Soaⁿ-kok ê thô͘-ôan i lia̍h-chòe tiⁿ; Beh ū chèng-lâng tè tī i ê āu-bīn, Chhin-chhiūⁿ tī i tāi-seng--ê bōe-sǹg-tit.

34

Lín só͘ ìn-tap ê ōe khêng-chin lóng sī ké, Lín cháiⁿ-iūⁿ khang-khang an-ùi góa ah?