Iok-pek-kì 第 22 章 - 巴克禮全羅

1

Thê-bān lâng Í-lī-hoat ìn kóng,

2

Lâng kiám-ōe lī-ek Siōng-tè mah? Tì-hūi ê lâng sı̍t-chāi sī lī-ek ka-kī.

3

Lí chòe lâng kong-gī, kiám hō͘ Chôan-lêng--ê hoaⁿ-hí mah? Lí só͘ kiâⁿ ôan-chôan, kiám ōe hō͘ I tek-lī mah?

4

Kiám-sī in-ūi lí kèng-ùi I, Lâi chek-pī lí, sím-phòaⁿ lí mah?

5

Lí ê chōe-ok kiám-m̄-sī tōa mah? Lí ê chōe-kòa sı̍t-chāi bô kiông-chīn.

6

Lí bô in-toaⁿ the̍h hiaⁿ-tī ê tǹg-thâu; Koh thǹg bô thang chhēng ê lâng ê saⁿ.

7

Ià-siān ê lâng, lí bô ēng chúi hō͘ in lim, Iau-gō ê lâng, lí tùi in siu-khǹg chia̍h-mı̍h.

8

Ū lêng-le̍k ê lâng tit-tio̍h thó͘-tōe; Thé-biān ê lâng tiàm tī hit tiong-kan.

9

Lí hō͘ kóaⁿ-hū khang-chhiú tò-khì, Bô-pē ê kiáⁿ ê chhiú-kut siū at-chı̍h.

10

Só͘-í o̍ah-tauh sì-bīn ûi lí; Kiaⁿ-hiâⁿ hut-jiân kàu, kiáu-jiáu lí,

11

Á-sī o͘-àm hō͘ lí bô thang khòaⁿ-kìⁿ, Chōe-chōe chúi im-ba̍t lí.

12

Siōng-tè kiám-m̄-sī tī thiⁿ ê kôaiⁿ mah? Tio̍h khòaⁿ chhiⁿ-sîn ê ke̍k-thâu, cháiⁿ-iūⁿ hiah-kôaiⁿ;

13

Lí chiū kóng, Siōng-tè chai sím-mı̍h? I kiám ōe khòaⁿ-thàu o͘-àm lâi sím-phòaⁿ mah?

14

Ba̍t-hûn jia-khàm I, hō͘ I bōe khòaⁿ-kìⁿ; I kiâⁿ tī kiong-chhong ê téng-bīn.

15

Lí kiám ài thàn kó͘-chá ê lō͘, Chiū-sī pháiⁿ-lâng só͘ kiâⁿ-ê mah?

16

In sī bē kàu-sî siū bia̍t--khì, In ê tōe-ki hō͘ tōa-chúi lâu-khì.

17

In tùi Siōng-tè kóng, Tio̍h lī-khui góan, Koh kóng, Chôan-lêng--ê ōe kā góan chòe sím-mı̍h ah?

18

Chóng-sī I ēng hó-mı̍h chhiong-móa i ê chhù; Gōan pháiⁿ-lâng ê kè-bô͘ lī-khui góa hn̄g-hn̄g.

19

Gī-lâng beh khòaⁿ-kìⁿ lâi hoaⁿ-hí; Bô-chōe ê lâng beh thí-chhiò in;

20

Kóng, Hiah-ê khí-lâi kong-kek góan ê, kó-jiân siū chián-tû; In só͘ chhun-ê lóng hō͘ hé sio-khì.

21

Taⁿ lí tio̍h kap Siōng-tè chhin-bı̍t, chiū ōe tit-tio̍h pêng-an; Án-ni hok-khì beh lîm-kàu lí.

22

Taⁿ tio̍h sêng-siū I chhùi-lāi ê kà-sī; Chiong I ê ōe khǹg tī lí ê sim.

23

Lí nā kui-ǹg Chôan-lêng--ê, tùi lí ê pò͘-pîⁿ-lāi tû-khì put-gī, Lí chiū tit-tio̍h heng-khí.

24

Lí tio̍h hiat pó-pòe tī tîn-ai--nih, Hiat O-hui ê kim tī khoe-hô chio̍h-thâu ê tiong-kan;

25

Chôan-lêng--ê chiū beh chòe lí ê pó-pòe, chòe lí ê bûn-gûn.

26

Lí chiū beh lia̍h chôan-lêng--ê chòe hoaⁿ-hí, Bīn kia̍h-kôaiⁿ ǹg Siōng-tè.

27

Lí kî-tó I, I chiū thiaⁿ lí, Lí iā beh siā lí ê gōan.

28

Lí tiāⁿ-tio̍h beh chòe sím-mı̍h, hit ê tāi-chì tek-khak chiâⁿ; Kng iā beh chiò lí ê lō͘.

29

In kàng-kē ê sî, lí iû-gôan thang kóng, Seng-kôaiⁿ; Khiam-pi ê lâng Siōng-tè beh chín-kiù i.

30

Liân ū-chōe ê lâng Siōng-tè iā beh kiù i; In-ūi lí ê chhiú chheng-khì, i beh tit-tio̍h kiù.