Iok-pek-kì 第 23 章 - 巴克禮全羅

1

Iok-pek ìn kóng,

2

Taⁿ góa ê ai-òan sǹg-chòe pōe-ge̍k; Góa só͘ siū ê chek-ho̍at khah-tāng tī góa ê thó͘-khùi.

3

Gōan góa ōe chai tùi cháiⁿ-iūⁿ chhē Siōng-tè, Hō͘ góa thang kàu I ê chō-ūi!

4

Góa beh pâi-lia̍t àn-kiāⁿ tī I ê bīn-chêng, Góa ê chhùi kàu-gia̍h thang piān-bêng.

5

Góa iā tit-tio̍h chai I ìn góa ê ōe, Iā bêng-pe̍k I tùi góa só͘-kóng-ê.

6

I kiám beh ēng tōa kôan-lêng kap góa kè-kàu mah? Tek-khak bô án-ni; I beh àⁿ-lo̍h thiaⁿ góa.

7

Tī-hia chèng-tı̍t--ê ōe kap I piān-lūn, Án-ni, góa beh éng-óan thoat-lī sím-phòaⁿ góa ê.

8

Khòaⁿ ah, góa chìn-chêng khì, I bô tī-hia; Góa thè-āu khì, iā bô khòaⁿ-kìⁿ I;

9

Tī tò-pêng I teh kiâⁿ tāi-chì, góa bô khòaⁿ-kìⁿ I; Tī chiàⁿ-pêng I tiàm-ba̍t, góa iā bô khòaⁿ-kìⁿ I.

10

Chóng-sī I chai góa só͘ kiâⁿ ê lō͘; I chhì-liān góa liáu-āu, góa beh chhin-chhiūⁿ kè thòan-liān ê kim.

11

Góa ê kha tè I ê kha-pō͘; Góa chip-siú I ê lō͘, iā bô phian-chho̍ah.

12

I chhùi-tûn ê bēng-lēng góa bē bat ûi-pōe; Góa tùi-tiōng I chhùi-lāi ê ōe, iâⁿ-kè góa só͘ tio̍h ēng ê bí-niû.

13

I ū it-tēng ê sim-chì, chī-chūi ōe kā I o̍at-tńg ah? I ê sim só͘ ài-ê, chiū kiâⁿ i.

14

Só͘ kā góa tiāⁿ-tio̍h--ê, I beh chiâⁿ i; Chit hō ê sū I iáu ū chōe-chōe.

15

Só͘-í góa tī I ê bīn-chêng gī-gī-chhoah; Góa siūⁿ-tio̍h chiū kiaⁿ.

16

In-ūi Siōng-tè hō͘ góa sit-táⁿ, Chôan-lêng--ê hō͘ góa gī-gī-chhoah;

17

In-ūi góa ê kiaⁿ-hiâⁿ m̄-sī ūi-tio̍h o͘-àm, Iā m̄-sī in-ūi o͘-àm jia-khàm góa ê bīn.