Iok-pek-kì 第 24 章 - 巴克禮全羅

1

Chôan-lêng-ê siáⁿ-sū bô chiong sî-kî siu-khǹg? Bat I ê lâng siáⁿ-sū bô khòaⁿ-kìⁿ I ê jı̍t ah?

2

Ū lâng î-sóa tōe-kài, Chhiúⁿ-to̍at kui-kûn ê cheng-siⁿ, lâi chhī i.

3

In kóaⁿ bô-pē ê kiáⁿ ê lû, khan kóaⁿ-hū ê gû chòe chún-tǹg.

4

In chhia sòng-hiong lâng lī-khui lō͘; Tōe-chiūⁿ ê kan-khó͘ lâng saⁿ-kap khì bih.

5

Khòaⁿ ah, in chhin-chhiūⁿ iá-lû tī khòng-iá, Chhut-khì chòe-kang, khûn-khûn chhē chia̍h; Khòng-iá kā in ê kiáⁿ chhut chia̍h-mı̍h.

6

Koah chhân--nih ê niû-chháu, Bán pháiⁿ-lâng só͘ chhun ê phû-tô.

7

Thong-mî thǹg-pak-theh bô chhēng-saⁿ tó-teh; Kôaⁿ-léng bô kah-phē.

8

Tī soaⁿ--nih hō͘ tōa-hō͘ ak-tâm; In-ūi bô jia-cha̍h chiū bih-óa tī chio̍h-kha.

9

Tùi lāu-bú ê heng-chêng chhiúⁿ bô-pē ê kiáⁿ khì; Koh tùi sòng-hiong lâng the̍h chún-tǹg;

10

Tì-kàu lâng bô-saⁿ, thǹg-theh lâi kiâⁿ; Iau-iau teh taⁿ tiū-pé.

11

Tī hiah ê lâng ûi-chhiûⁿ lāi, khoeh iû, ta̍h chiú-khut, Ka-kī iáu-kú chhùi-ta.

12

Tī chōe-chōe peh-sìⁿ ê siâⁿ-lāi ū lâng ai-ai chhan, Siū-siong ê lâng ê sim pi-ai; Chóng-sī Siōng-tè bô kàm-chhat hit ê put-gī.

13

Iā ū lâng ûi-pōe kng-bêng, M̄-bat i ê lō͘, Iā bô tiàm tī i ê lō͘-chiūⁿ.

14

Thâi-lâng--ê thiⁿ-phú-kng chiū khí-lâi, Thâi-sí kan-khó͘--ê kap sòng-hiong lâng, Tī mî--sî chhin-chhiūⁿ chha̍t.

15

Kan-îm ê lâng ê ba̍k-chiu thèng-hāu kàu hông-hun, Kóng, Bô lâng ba̍k-chiu ōe khòaⁿ-kìⁿ góa; Koh jia-khàm i ê bīn.

16

In tī mî--sî iah chhù-khang, jı̍t--sî ka-kī bih, Iā m̄-chai hit ê kng.

17

In-ūi in khòaⁿ thiⁿ-kng-chá chòe sí-ìm, In-ūi in tī sí-ìm chin kòaiⁿ-sì.

18

I tī chúi-bīn chin khin-khòai, In ê hūn-gia̍h tī tōe-chiūⁿ siū chiù-chó͘; I bô koh o̍at-tńg lâi kiâⁿ phû-tô-hn̂g ê lō͘.

19

Khòng-hān kap sio-jo̍ah siau-bô seh-chúi; Im-kan tùi-tī hōan-chōe ê lâng iā sī án-ni.

20

Hôai-īn i ê thai beh bōe-kì-tit i; thâng chia̍h i, beh lia̍h chòe tiⁿ; I bô koh siū kì-liām; Put-gī beh chhin-chhiūⁿ chhiū siū at-chı̍h.

21

I khi-hū bô hôai-īn bô siⁿ-kiáⁿ ê hū-jîn-lâng; Bô hó khóan-thāi chiú-kóaⁿ-lâng.

22

Koh ēng I ê kôan-lêng pó-chôan kiông-béng ê lâng; Sui-jiân i ê o̍ah-miā cho̍at-bāng, iáu-kú ōe koh khí-lâi.

23

I siúⁿ-sù i an-jiân, i chiū ū só͘ óa-khò, I ê ba̍k-chiu iā khòaⁿ-kò͘ in ê lō͘.

24

In seng-kôaiⁿ, tiap-á-kú chiū bô--khì; In kàng-kē, hō͘ lâng siu-sı̍p, chhin-chhiūⁿ chèng-lâng, Koh chhin-chhiūⁿ be̍h-sūi siū koah--khí-lâi.

25

Nā m̄-sī án-ni, chī-chūi ōe chèng-bêng góa sī pe̍h-chha̍t--ê, Iā hō͘ góa ê ōe kui tī khang-khang ah?