Iok-pek-kì 第 26 章 - 巴克禮全羅

1

Iok-pek ìn kóng,

2

Bô khùi-la̍t--ê, lí ū pang-chān i kàu cháiⁿ-iūⁿ! Chhiú-kut nńg-ê, lí ū chín-kiù i kàu cháiⁿ-iūⁿ!

3

Lí ū cháiⁿ-iūⁿ kà-sī bû-ti ê lâng, Koh tōa hoat-bêng chin-sı̍t ê tì-sek?

4

Lí tùi chī-chūi kóng-ōe? Chī-chūi ê sîn tùi lí chhut?

5

Im-hûn ngia̍uh-ngia̍uh-chhoah, Tī chúi-ē, í-kı̍p tī-hia khiā-khí--ê.

6

Tī I ê bīn-chêng im-kan lō͘-hiān, A-pa-tùn iā bô khàm-ba̍t.

7

I thí-khui pak-hng tī khong-tiong ê téng-bīn, Tiàu tōe tī bô ū mı̍h ê téng-bīn.

8

Ēng chúi pau tī I ê ba̍t-hûn-lāi; Hûn tī chúi ê ē-bīn iā bōe phòa-lı̍h.

9

I jia-cha̍h I ê chō-ūi, Koh pho͘ I ê hûn tī hí(**hit) téng-bīn.

10

I tī chúi-bīn u̍ih-chhut kài-hān, Kàu kng kap àm kau-kài ê só͘-chāi.

11

Thiⁿ ê thiāu tín-tāng, In-ūi I ê chek-pī lâi gông-ngia̍h.

12

I ēng lêng-le̍k kek-tōng tōa-hái, I ēng tì-sek phah-phòa La̍h-hap-pek.

13

Ēng I ê khì hō͘ thiⁿ ū chheng-chhái, I ê chhiú chha̍k-thàu gâu-cháu ê chôa.

14

Khòaⁿ ah, chiah-ê put-kò sī I só͘-chòe ê sió-khóa-ê; Lán só͘ tùi I thiaⁿ-kìⁿ ê siaⁿ sòe kàu cháiⁿ-iūⁿ? I tōa kôan-lêng ê lûi, chī-chūi ōe chhek-to̍k ah?