Iok-pek-kì 第 27 章 - 巴克禮全羅

1

Iok-pek koh sòa-chiap thê-khí i ê giân-lūn kóng,

2

Siōng-tè to̍at góa ê lí-iû; Chôan-lêng--ê khó͘-chhó͘ góa ê sim-sîn; Góa chí I ê éng-o̍ah lâi kóng;

3

(In-ūi góa ê o̍ah-miā iáu-kú ôan-chôan tī góa ê lāi-bīn, Siōng-tè ê khì iáu-kú tī góa ê phīⁿ-khang;)

4

Góa ê chhùi-tûn koat-tòan bô kóng put-gī, Góa ê chı̍h iā bô kóng khúi-chà.

5

Góa tòan-tòan bô chheng lín chòe gī, Góa kàu sí, iā m̄ sǹg góa chòe bô ôan-chôan.

6

Góa chip-siú góa ê gī, bô beh pàng-sak, Góa ê sim chı̍t-sì-lâng bô chek-pī góa.

7

Gōan góa ê tùi-te̍k chhin-chhiūⁿ pháiⁿ-lâng, Gōan hit ê khí-lâi kong-kek góa ê, chhin-chhiūⁿ put-gī ê lâng.

8

Bô kèng-khiân ê lâng, sui-jiân chhiúⁿ-tio̍h châi-lī, Siōng-tè chhú i ê o̍ah-miā ê sî, iáu ū sím-mı̍h ǹg-bāng?

9

Hōan-lān lîm-kàu i ê sî, Siōng-tè kiám beh thiaⁿ i ê kiû-kiò?

10

I kiám ōe ēng Chôan-lêng--ê chòe hoaⁿ-hí? I sî-siông kiû-kiò Siōng-tè mah?

11

Siōng-tè só͘ chòe ê, góa beh kà-sī lí, Chôan-lêng--ê só͘ ū-ê, góa iā bô ún-môa.

12

Khòaⁿ ah, lín pún-sin lóng ū khòaⁿ-kìⁿ, Siáⁿ-sū it-chīn hu-ké ah?

13

Pháiⁿ-lâng tùi Siōng-tè só͘ siū ê hūn-gia̍h, Kiông-pō ê lâng tùi Chôan-lêng--ê só͘ tit-tio̍h ê sán-gia̍p, chiū-sī chit-ê.

14

I ê kiáⁿ-jî nā ke-thiⁿ chōe-chōe, sī beh hō͘ to thâi-sí; I ê hō͘-è bô thang chia̍h kàu gia̍h.

15

I só͘ chhun ê lâng beh tú-tio̍h un-e̍k lâi bâi-chòng, Iā i ê kóaⁿ-hū bô thî-khàu.

16

I sui-jiân chek-chū gûn chhin-chhiūⁿ tîn-ai, Koh pī-pān i-chiûⁿ chhin-chhiūⁿ thô͘;

17

I chòe i pī-pān, chóng-sī gī-lâng beh chhēng i, Bô-chōe ê lâng beh pun i ê gûn.

18

I chhin-chhiūⁿ chiù-thâng khí chhù, Koh chhin-chhiūⁿ chiú-kiⁿ-ê tah i ê liâu-á.

19

I hó-gia̍h tó-teh, chóng-sī bô tit-tio̍h siu-bâi; I thí-khui ba̍k-chiu, chiū bô--khì.

20

Kiaⁿ-hiâⁿ beh chhin-chhiūⁿ tōa-chúi jip-tio̍h i; Mî--sî ê tōa-hong beh sàu i khì.

21

Tang-hong chhe i, i chiū khì; Koh kóaⁿ i lī-khui pún só͘-chāi.

22

In-ūi Siōng-tè siā-tio̍h i, iā bô khoan-sù; I khó͘-bōe-thang thoat-lī I ê chhiú.

23

Lâng beh tùi i phah pho̍k-á, Iā beh chhut kháu-hō, kóaⁿ i lī-khui pún só͘-chāi.