Iok-pek-kì 第 31 章 - 巴克禮全羅

1

Góa kap góa ê ba̍k-chiu lı̍p-iok, Thái-thó ōe chù-ì khòaⁿ chāi-sek-lú ah?

2

In-ūi Siōng-tè tùi téng-bīn só͘ tiāⁿ-tio̍h ê hūn-gia̍h, Chôan-lêng--ê tùi téng-bīn só͘ phài ê ki-gia̍p sī sím-mı̍h ah?

3

Kiám m̄-sī hōan-lān lîm-kàu put-gī--ê, Chai-hāi lîm-kàu chok-gia̍t--ê mah?

4

I kiám m̄-sī kàm-chhat góa ê lō͘. Tiám-sǹg góa ê kha-pō͘ mah?

5

Góa nā kap hu-ké saⁿ-kap kiâⁿ, Kha nā kóaⁿ-kín tè khúi-chà;

6

(Gōan góa hō͘ kong-tō ê thian-phêng lâi chhìn, Hō͘ Siōng-tè chai góa ê sûn-chôan;)

7

Góa ê kha-pō͘ nā phian-lī chiàⁿ-lō͘, Góa ê sim nā kun-tè góa ê ba̍k-chiu, Nā ū lâ-sâm liâm tī góa ê chhiú;

8

Chiū gōan góa só͘ chèng-ê, pa̍t-lâng chia̍h i, Góa só͘ chhut-sán--ê, i ê kun siū pu̍ih-chhut.

9

Góa ê sim nā hō͘ hū-lú ín-iú khì, Á-sī góa bih tī chhù-piⁿ ê mn̂g teh tán;

10

Chiū gōan góa ê hū-jîn-lâng kā lâng oe-bō, Pa̍t-lâng iā kap i tâng-pâng;

11

In-ūi che sī tōa-pháiⁿ. Sī sím-phòaⁿ-si eng-kai pān ê chōe;

12

Che sī hé, sio kàu bia̍t-bô, Pu̍ih-tû góa it-chhè só͘ chhut-sán--ê ê kun.

13

Góa ê lô͘-po̍k lú-pī kap góa piān-lūn ê sî, Góa nā biáu-sī in ê lí-iû;

14

Chiū Siōng-tè khí-lâi, góa beh cháiⁿ-iūⁿ ah? I sím-mn̄g, góa beh cháiⁿ-iūⁿ ìn ah?

15

Chō góa tī the--nı̍h-ê, kiám-m̄-sī iā chō i mah? Chō-chiâⁿ góan tī pak-tó͘--ê, kiám m̄-sī chı̍t-ê mah?

16

Góa nā kìm-chí sòng-hiong lâng ê ì-gōan, Á-sī hō͘ kóaⁿ-hū ê ba̍k-chiu khòaⁿ kàu ian-n̄g;

17

Á-sī góa ka-kī chia̍h tām-po̍h mı̍h, Bô-pē ê kiáⁿ chia̍h bô hūn ah?

18

(Tùi góa siàu-liân i kap góa saⁿ-kap tōa-hàn, chhin-chhiūⁿ kap lāu-pē chı̍t-iūⁿ; Góa tùi chhut lāu-bú ê pak-tó͘ chiū khan-sêng kóaⁿ-hū;)

19

Góa nā khòaⁿ-kìⁿ lâng in-ūi bô saⁿ lâi sí, Á-sī khòaⁿ-kìⁿ sòng-hiong lâng seng-khu bô thang jia-kah;

20

I ê io nā bô kā góa chiok-hok, I iā bô tùi góa ê iûⁿ ê mn̂g ka-kī sio,

21

Góa nā in-ūi khòaⁿ-kìⁿ tī siâⁿ-mn̂g ū pang-chān góa ê, Chiū khí-chhiú kong-kek bô-pē ê kiáⁿ;

22

Gōan góa ê chhiú tùi keng-kah lut--lo̍h-khì, Góa ê chhiú-chat tùi kut chı̍h--khì;

23

In-ūi tùi Siōng-tè lâi ê chai-ē hō͘ góa kiaⁿ-hiâⁿ; In-ūi I ê ui-giâm, góa tng bōe khí.

24

Góa nā ēng n̂g-kim chòe ǹg-bāng, Tùi hó-kim kóng, Lí sī góa só͘ óa-khò ê;

25

Góa nā in-ūi châi-bu̍t hong-sēng, In-ūi Góa ê chhiú thàn chōe-chōe lâi hoaⁿ-hí;

26

Góa nā khòaⁿ-kìⁿ jı̍t teh hoat-kng, Ge̍h kng-kng teh kiâⁿ;

27

Góa ê sim tī àm-tiong siū ín-iú, Á-sī góa ê chhùi kap góa ê chhiú saⁿ-chim;

28

Che iā sī sím-phòaⁿ-si eng-kai pān ê chōe, In-ūi góa án-ni sī pōe-biū tī téng-bīn ê Siōng-tè.

29

Góa nā lia̍h òan-hūn góa--ê ê chai-ē chòe khòai-lo̍k, Á-sī ūi-tio̍h i tú-tio̍h chai-ē lâi tek-ì;

30

(Kî-sı̍t góa bô iông-ún góa ê chhùi hōan-chōe, Chiù-chó͘ kiû hō͘ in sí;)

31

Nā góa pò͘-pîⁿ-lāi ê lâng bô kóng, Chī-chūi ōe chhē-tio̍h chı̍t-ê bô chia̍h i ê hó-mı̍h kàu pá--ê?

32

(Chhut-gōa-lâng bô hioh tī koe-lō͘, Góa kā kiâⁿ-lō͘ ê lâng khui mn̂g;)

33

Góa nā chhin-chhiūⁿ A-tong jia-iám góa ê kè-sı̍t, Khǹg góa ê chōe-gia̍t tī góa ê heng-chêng;

34

Ūi-tio̍h kiaⁿ tōa-tūi ê chèng-lâng, Kiaⁿ chong-cho̍k ê biáu-sī, Tì-kàu chēng-chēng m̄-káⁿ chhut-mn̂g--

35

Gōan ū chı̍t-ê teh thiaⁿ góa! (Khòaⁿ ah, ū góa só͘ ūi ê hō, gōan Chôan-lêng--ê ìn góa;) Gōan tit-tio̍h góa ê tùi-te̍k só͘ siá ê kò-chn̄g!

36

Góa tek-khak beh pē i tī góa ê keng-thâu, Tì i chòe bián-liû.

37

Góa beh tùi I kóng-bêng góa kha-pō͘ ê siàu-gia̍h, Beh chhin-chhiūⁿ jîn-kun chiū-kūn I.

38

Góa ê chhân-hn̂g nā chhut-siaⁿ kò góa, Lôe-kau saⁿ-kap thî-khàu;

39

Góa nā chia̍h i ê chhut-sán, bô hō͘ i kè-chîⁿ, Á-sī hō͘ gia̍p-chú sit-lo̍h i ê sìⁿ-miā;

40

Chiū gōan chhì-á hoat-siⁿ thòe sió-be̍h, Pháiⁿ-chháu hoat-siⁿ lâi thòe tōa-be̍h. Iok-pek ê ōe bêng-pe̍k lah.